غسيل العربية و البارومة ؟؟

[Mohamed.Muslim]

السلام عليكم ...
ياريت اعرف منكم معدل غسيل العربية من تحت فى البنزينة كل أد ايه لأن فى ناس بتقول غسيل العربية من تحت كل شهر مثلا بيأدى لتكون البارومة , و ناس بتقول الغسيل الشهرى بيمنع تكون البارومة أو الصدأ و ناس بتقول اغسل كل شهرين !!..

[mahmoud_ali]

بص يا باشا بالنسبالى انا بغسل كل شهر مره بس اهم حاجه بنشف العربيه كويس جدا

[saddam]

صديقي المواطن
حسب مشيك في الطين يا مواطن والصح غسلها مرة شهريا ومفيش حاجة إسمها غسيل يجيب بارومة الذي يجلب البارومة هو الطين واﻷوساخ الراكدة أسفل العربية فلازم العربية دايما من تحت خفيفة ومفيهاش وساخة وأطيان متكدسة
وهذا ما لزم بيانه ودمتم
وبالتوفيق وإلى اﻷمام ومن نصر إلى نصر
ودمتم للنضال

[Mohamed.Muslim]

شكر كبير لردكم و ربنا يجازيكم خير ...

[mohamedrabia]

غسيل السيارة اهم ما فيه عدم تركيز رشاش الماء علي جسم السيارة علشان ميحصلش تجريح من ضغط المايه .... ويفضل التاكد من عدم وجود اي تخزين للمايه وان حدث اي غسيل لاجزاء السيارة الداخليه يفضل التنشيف جيدااا ومسح هذه الاجزاء بالجاز لانه يمنع الصدا ويزيله تماما ... وعموما غسيل السيارة بصورة مستمرة يضر السيارة وانما يفضل باستمرار لازاله اي اتربه خفيفه او متجمده فوطه ناشفه تكون محببه ويتم مسح السيارة بها بدون ماء افضل من الغسيل ... ساعتها هتغسل السيارة كل فترة ممكن تعدي الشهرين واكتر

[iNjECTOR]

أفضل حاجة تكون وسطي فى موضوع الغسيل وتابع دايما اماكن تمركز الطين فى عربيتك
مثلا زى الكارتيره - العتب - الاكصدامات

اما بالنسبة للبودى فانا بنصح انك تغسل عربيتك بـــ ArmorAll Wax&wash لان ده هيخلى العربية من بره :-
1- أنعم معنى كده ان التراب هيكون سهل جدا يتشال بأى فوطة مايكروفيبر وهيقلل عوامل الصنفرة
2- هيدارى 30 % من الجروح الصغيرة .
3- العربية هتلمع لفترة اطول بعد الغسلة .
--------------------------------------------------
تجربتى الشخصية انا تقريبا بغسل عربيتى مرتين فى الشهر لظروف عملى وخروجى يومي بالعربية
وانا بعد مبغسل العربية بالـــ Armorall بجيب Formula1 wax وده شمع سائل وبحطه على العربية وبسيبه حوالى 15 ساعة وميزة الشمع السائل عامة انه بيقعد فترة اطول على جسم العربية وبعدين بشيل الزيادة بفوطة مايكروفيبر وبعدين بجيب شمع تانى إسمه TopCar وده شمع صلب وميزة الشمع الصلب انه بيدى البريق النهائى وبعدين بلم الزياده منه

- كل 6 أشهر بستخدم شمع بلون العربية وبجيب نوعين بستخدمهم ورا بعض
الاول شمع Sonax بلون عربيتى لانه بيستخدم تكنولوجيا نانو وبيصلح والله كثيرا من الجروح والشمع اللى وراه بستخدم شمع برده بلون عربيتى إسمه Simoniz وميزة الشمع ده انه بيخلى العربية سوداء سوداء وبعد مبخلص من الاثنين بعيد الخطواط الاولى بإثتسناء غسيلها طبعا وبدا المرادى من Formula1 وبعدين TopCar

وبفضل الله عليا ان العربية بسم الله ماشاء الله فبريكة ( الله اكبر )
تحياتى للجميع
دمتم بود

[iNjECTOR]

15 ساعة

أقصد 15 دقيقة

[فتح الباب]

غسيل السياره يوميا لا يضر ابدا طالما يتم ازالة الاوساخ بفوطه ناعمه
والاهم هو عدم غسيل السياره ليلا فقط ما اقوله ليلا
تحياتى للجميع

[ahmedarab]

أفضل حاجة تكون وسطي فى موضوع الغسيل وتابع دايما اماكن تمركز الطين فى عربيتك
مثلا زى الكارتيره - العتب - الاكصدامات

اما بالنسبة للبودى فانا بنصح انك تغسل عربيتك بـــ armorall wax&wash لان ده هيخلى العربية من بره :-
1- أنعم معنى كده ان التراب هيكون سهل جدا يتشال بأى فوطة مايكروفيبر وهيقلل عوامل الصنفرة
2- هيدارى 30 % من الجروح الصغيرة .
3- العربية هتلمع لفترة اطول بعد الغسلة .
--------------------------------------------------
تجربتى الشخصية انا تقريبا بغسل عربيتى مرتين فى الشهر لظروف عملى وخروجى يومي بالعربية
وانا بعد مبغسل العربية بالـــ armorall بجيب formula1 wax وده شمع سائل وبحطه على العربية وبسيبه حوالى 15 ساعة وميزة الشمع السائل عامة انه بيقعد فترة اطول على جسم العربية وبعدين بشيل الزيادة بفوطة مايكروفيبر وبعدين بجيب شمع تانى إسمه topcar وده شمع صلب وميزة الشمع الصلب انه بيدى البريق النهائى وبعدين بلم الزياده منه

- كل 6 أشهر بستخدم شمع بلون العربية وبجيب نوعين بستخدمهم ورا بعض
الاول شمع sonax بلون عربيتى لانه بيستخدم تكنولوجيا نانو وبيصلح والله كثيرا من الجروح والشمع اللى وراه بستخدم شمع برده بلون عربيتى إسمه simoniz وميزة الشمع ده انه بيخلى العربية سوداء سوداء وبعد مبخلص من الاثنين بعيد الخطواط الاولى بإثتسناء غسيلها طبعا وبدا المرادى من formula1 وبعدين topcar

وبفضل الله عليا ان العربية بسم الله ماشاء الله فبريكة ( الله اكبر )
تحياتى للجميع
دمتم بود

ما شاء الله .. اية كل الحجات دي ....
يا تري حضرتك بتلاقي الحجات دي فين ؟؟ ويا تري اسعار الحجات دي كام تقريبا حالياً ؟؟؟

[Samir_Adel]

البارومة هو ثمرة الصدا.. و دة بيظهر عن طريق مياة راكدة جوة اي صاج. نصيحتي ليك ان تغسل شاسية مرة كل شهرين او تلاتة.. و جسم السيارة بفوطة ناشفة و ناعمة عشان تزيل الاتربة اللي مع الوقت ضارة علي البويا و ياريت بلاش بوليش ولا واكس ولا ماكس ولا الكلام دة عشان مهما كانت نتيجتها فا هي مليانة مواد كيماوية حادة و حامية علي جسم العربية و اخر حاجة، في الصيف و طول ما العربية واقفة، لازم تتغطي بغطة محترم.

[pepo2011]

الله ينور
دمتم للنفع والخير