رش دواخل

[exelence]

بعد اذنكم يا جماعه هل ممكن يبان ان العربيه راشه دواخل من صوره زى دى ؟

[amrelsaqqa]

واضح جدا انها راشة
خصوصا المنطقة اللى عند السدر وعند رقم الشاسيه
والمسامير والاسلاك المرشوشة ، ده حتى السنادة بتاعت الكبوت مرشوشة :d

[exelence]

متشكر جدا" يا باشا اصل العربية معروضه بسعر رخيص و ده اللى خلانى اشك و بصراحه معنديش خبره فى الحاجات دى.
هل الواحد ممكن يغامر و ياخد عربية زى دى ؟

[A.Saad]

فيه ناس مش فاهمة وبينضحك عليها
او عارفة بس مش معاها فلوس تجيب عربية انضف

[exelence]

ما انا علشان كده باسأل ايه المخاطر من عربية زى دى خصوصا" ان صاحبها بيروح و ييجى بيها و يسافر يمين و شمال

[waleed alsudy]

الموضوع ومش موضوع مخاطر الموضوع السعر
علشان مثلا لو هتيجي تبيعها اللي هيشتري هيروح قايل دي رشه جوه

[A.Saad]

الدواخل تترش فى حادثة جامدة اثرت على العربية كتير وسمعت للدواخل
علشان كدة الناس بتقلق منها وممكن تكون بتحدف او تترجرج على سرعات

[amrelsaqqa]

اولا السعر لازم تشتريها بسعرها اللى هو سعر عربية راشة جوة فعلا ، مش مجرد سعر مغري عن سعر العربية السليمة

ثانيا صعوبة البيع جدا ولما تبيعها لتاجر يخسف بتمنها الارض اكتر واكتر

ثالثا الاداء والامان
اسباب رش الدواخل اما البرومة ودي لو العربية موديل سبعينات تمانينات

او الحوادث وده السبب الشائع ، العربية بتبقى عامة متبهدلة جدا ملعوب في كل حاجة فيها لان معنى انها راشة دواخل ان الحوض ده في يوم من الايام كان فاضى من كل حاجة والتابلوه من جوة مفكوك بالكامل وهكذا ...

طبعا الحوادث بتكون مأثرة على متانة الشاسيه لانه لما بيتسخن بيضعف
كمان العربية في الغالب زواياها مش مظبوطة وبتحدف ومش ثابتة نهائى

والمشكلة كمان ممكن يكون متغير نص او العربية ملحومة او داخلة بطريقة غير شرعية للبلد ودى تأثر عليك في كذا حاجة انك لو عملت حادثة تاني بالعربية تلاقيها اتقطمت نصين ولك ان تتخيل .. او يكون تم تقوية الشاسيه باللحام اكتر من اللازم وبرضه ده غير امن لانه هينقللك الصدمة كلها للكبينة وتكون الاصابات اكثر خطورة ..

طبعا في حالة الدخول بطريقة غير شرعية او رقم شاسيه او موتور مضروب ، بيبقى فيها كلابشات على طول

[eng.m7md.ali]

تغيير النص دلوقتي انضف من الرش جوة

[exelence]

متشكر جدا" لردودكم يا حضرات
اعرف واحد اشترى عربيه و ما كانش يعرف انها مغيره نص غير لما راح لميكانيكى يصلح له فيها حاجه.
المحزن بقى انه باعها لواحد و الواحد ده جاب ميكانيكى يبص عليها و ما عرفش انها مغيره نص و اشتراها هو كمان من غير ما يعرف.

اسباب رش الدواخل اما البرومة ودي لو العربية موديل سبعينات تمانينات

كنت باسال نفسى كثير لو اى عربية بقى فيها بارومة مش المفروض انها تترش دواخل و فى الحاله دى صاحبها هيعمل ايه.
طب هى ليها حل تانى غير كده ؟