حكيت العربيه فى الرصيف :( عايزة حل بسرعه

[Yoyo.yasso]

السلام عليكم
عايزة حل للخدش ده وياريت حاجه اعرف اعملها بنفسي ومحتاجش اروح لحد
العربيه جديدة مبقالهاش شهرين :(

[sor2]http://www3.0zz0.com/2015/03/25/16/654030722.jpg[/sor2]

[sor2]http://www9.0zz0.com/2015/03/25/16/174329157.jpg[/sor2]

[Yoyo.yasso]

ولا اسيبها يعملوها فى التوكيل مع ميعاد الصيانه ؟
بس شكلها مؤرقنى نفسيا فعلا

[Ahmed emad has]

انا منصحش انك تعملي اي حاجة فيها لان مفيش حل غير الرش . وحرام انك ترشي العربية بعد اقل من شهرين والعربية هتفقد قيمتها وكتير من تمنها

[rotanamasoud]

سبيها تاخد العين (على فكره هو مش مجرد خدش فى انبعاج خفيف فى الصاج)

[Abo_Mazen]

حضرتك دي لازم سمكري هو اللي يشتغل فيها ..عشان الحكه دي عامله سوكه لجوه ..يبقى هو لازم يشيل الفرش من جوه ويردها على البارد لغاية ما تضبط ..وبعدين البوهيجي يدي المعجون بتاعه ويصنفر لغاية ما يلاقيها بقت مايه واحده ..يقوم راششها بعد ما يضبط الفلير بتاعه ..ده لو إحتاج ..ودي بترجع للبوهيجي ونظرته ..ولو البويه بتاعة العربيه ميتالك ده بقى موضوع تاني ..لإن في الميتاليك ما ينفعش ترقيع ..يعني ما ينفعش شغل التلقيط ..اللي هو نرش الحته اللي فيها مشكله وخلاص ..لأ ..في الميتالك بتترش القطعه كامله اللي حصل فيها الشغل ..يعني الباب كله ..الكبوت كله ..السقف كله ..الرفرف كله ..أنا أقصد القطعه كامله ..عشان اللون ما يخلفش معانا ..بصراحه حضرتك تعمليها في التوكيل أو تتعمل عند أي سمكري زيرو بره ..القرار معاك ..بس في سؤال ..هو حد شاف عربيه في مصر مش واخده خربوش أو مش واخده خبطه كده على ما قوسوم ..دي لو حصلت يبقى العربيه دي ما بتمشيش أصلا

[bluemail]

طالما العربيه لسه جديده يبقي خليها لما تروحي التوكيل في ميعاد الصيانه الجايه وشوفي هيقولوا ايه
دي كانت مشاركه لزميل لينا في المنتدي كان عنده حكه كده
-------------
بسيطة خالص ان شاء الله وماتزعلش نفسك . حضرتك حاتروح لأي حد بتاع حدايد وبويات وتجيب منه علبة كومباوند ميدو وعلبة بوليش ميدو برده وتعدي علي اي صيدلية وتجيب كيس قطن طبي وبعدين تبتدي بالكومباوند تاخد حتة كبيرة شوية علي حتة قطن وتدعك بيها جسم العربية في المنطقة اللي فيها الخدوش بحركة دائرية وتكون ضاغط شوية علي القطنة لغاية متلاقي الخدوش اختفت واللون الكحلي ده طلع وبعدين تمسح اثار الكومباوند بفوطة نضيفة وتكرر نفس الموضوع مع البوليش حاتلاقي النتيجة مرضية الي حد كبير جدا وحاتشيلك نسبة كبيرة من الخدوش دي .
الموضوع بسيط جدا ومش مكلف خالص الكومباوند والبوليش والقطن غالبا مش حايعدوا ال20 جنيه ومش مستاهله تروح لحد وخلي الادوات دي مع حضرتك علي طول لاي خدوش مستقبلية لاقدر الله وربنا يفرحك بعربيتك ويباركلك فيها :)
-------------
وده رابط الموضوع

http://www.nilemotors.net/Nile/461965-a.html#post3875912639

[Yoyo.yasso]

متشكرة جدا انا شوفت فعلا الموضوع ده و الردود بتاعت الاعضاء بس قولت ان فى فرق بين خدشي وخدشه لان هو واخد لون عربيه تانيه انما انا لا
بس هو انا ممكن اجرب ولا هتبقي مجازفه ؟
يعنى اروح التوكيل ولا اجرب موضوع البوليش الاول ؟ انا كده كده حاجزة ميعاد صيانه يوم ١٤/٤ ان شاء الله بس حجزاه تغيير زيت وصيانه عاديه هل علشان الخدوش بحجز بردو ولا وانا هناك بالمرة هيشوفوها من نفسهم

[Yoyo.yasso]

استاذ احمد و روتانا و m-m
هى مش بس شكلها مضايقنى
انا عايزة اخفيها قبل ما زوجى يرجع من السفر
انا كده كده هقوله بس لما يرجع يلاقيها متصلحه غير لما يرجع يشوفها بالمنظر ده
علشان كده مش هينفع اسيبها

[Abo_Mazen]

استاذ احمد و روتانا و m-m
هى مش بس شكلها مضايقنى
انا عايزة اخفيها قبل ما زوجى يرجع من السفر
انا كده كده هقوله بس لما يرجع يلاقيها متصلحه غير لما يرجع يشوفها بالمنظر ده
علشان كده مش هينفع اسيبها

البوليش ممكن ما يديش نتيجه كما ترغبين بالضبط ..وبعدين البوليش لو متعملش على قد الحاجه بالضبط ..يعني لا نزود ولا ننقص ممكن يعمل بهتان ..أو يبقع ..بصي ..ممكن حضرتك تستخدمي البوليش ..وبعدين ما يديش النتيجه المرجوه ..تقومي حضرتك طمعا في نتيجة أفضل تتقلي إيدك شويه ..يقوم البوليش ماسح في البويه يبقى شكلها أبشع ..عشان كده لو هتستخدمي البوليش يبقى بحرص ..وبعدين البوليش الخشن ما ينفعش مع بويه مش لسه طالعه من الفرن ..البوليش الخشن بيبقى مع البويه اللي لسه معضمضش ..عشان كده جربي البوليش الناعم الأول ..بس برضه هتفضل حتة إنها لازم تترد على البارد وتتمعجن لإن واضح من الصورة إن الحكه وصلت للمعجون

[Yoyo.yasso]

لا خلاص وعلى ايه
انا لما اروح التوكيل هخليهم يتصرفوا فيها وخلاص
متشكرة جدا على الافادة

[فتح الباب]

رايى انها تتصلح بره التوكيل لان التوكيل فى جسم السياره بيعطى نتيجه وحشه جدا وشوائب وغيره بعكس السمكرى خارج التوكيل

[Zing0]

بس في سؤال ..هو حد شاف عربيه في مصر مش واخده خربوش أو مش واخده خبطه كده على ما قوسوم ..دي لو حصلت يبقى العربيه دي ما بتمشيش أصلا

و حتى لو مبتمشيش, بتتخبط و هيا واقفة و أطفال الشوارع بيحطوا بصمتهم عليها بالمسامير

سمكرى صح يرد عالبارد و نجرب البولش الأول, مش هيخفيها نهائى بس على الأقل مش هتبقى واضحة غير من قريب
و سيبيها تأخد العين, فى بلدنا فى ناس متخصصة فى الحسد و الحقد مهما ربنا أنعم عليهم
ربنا يكفينا شر أذاهم و أعينهم.

[Yoyo.yasso]

اااميييين
طيب الله المستعان
هشوف سمكرى بيفهم وامرى لله