مشكلة فى دهان السيارة

[waleed_home]

من كام يوم كده كنت راكن العربية جنب ورشة دوكو سيارات وعلى الرغم انى كنت راكن بعيد عنه الا ان الهواء نقل الرزاز بتاع الرش الى عربيتى وما اخدتش بالى من الموضوع ده غير لما غسلت العربية وطبعا الرزاز ده بان جامد لأن لونه ابيض و العربية سوداء .

ياريت حد يقول لى اتصرف اذاى علشان اشيل الرزاز ده ؟

[waleed_home]

انا مش عارف الساده المشرفيين كتبوا على الموضوع ليه انه منقول ؟ دى مشكله حصلت لى و انا باخد راى الزملاء فى حلها ؟ نقلتها من مين ؟

[A.Saad]

منقول يعنى انه اتنقل من القسم اللى اكتب فيه لقسم اخر
والكلام ده بيكتب فى القسم القديم

المهم
جرب قطنة بتنر خفيف

[Sherif Khalifa]

اغسل العربية بجاز

[waleed_home]

طيب ايه راى حضراتكم فى البنزين ؟ هل ممكن يشيل ؟

[A.Saad]

اهم حاجة تحاول مش تسيبها كام يوم

[waleed_home]

اهم حاجة تحاول مش تسيبها كام يوم

لو تقصد انى الحقها قبل ما تنشف فهى اكيد نشفت لأن الحكاية دى بقالها 5 ايام
اهم حاجة عندى انى اختار حاجة تزيل الرزاز من غير ما تأثر على بوية العربية

[waleed_home]

اغسل العربية بجاز

طيب هل للجاز تأثير على دهان العربية الأصلى ؟

[Strong]

أنا مرة كنت راكن العربية تحت بيت واحد ولما رجعت لقيته دهن سقف البلكونة ورش العربية كلها رذاذ بوية معاه

المهم أنا حاولت أشيلها في الأول كانت البوية بتتشال بسهولة بدون ترك أي أثر بس أنا كسلت أكمل العربية كلها

وجيت بعد أسبوع أشيلهم منفعش فيهم أي حاجة
وديتها لأكتر من واحد بتاع بوية كلهم قالولي رش العربية كلها
أنا مرضيتش علشان البوية الأصلية متتعوضش

فجربت التنر بيحوش البوية لكن بيدوب البوية الأصلية وبيشوهها
الجاز ضعيف ومقدرش يعمل حاجة ومش بيأثر على بوية العربية
النفط مش بيعمل حاجة
البنزين هو اللي شالهم ومش بيأثر على البوية نهائيا لكن بعد معاناه كنت باملى القطنة بنزين واسيبها شوية على كل نقطتين بوية وبعدين اضغط وامسح البوية جامد كانت بتتشال
وبعد ما خلصت لقيت مكان حركة القطن مخربش جامد في البوية فجبت كمباوند الأول ومسحت أماكن البوية وبعديها بولش ، طبعا استعنت بصديق علشان كانت مهمة مملة

وأخيرا رجعت بوية العربية زي ما كانت أو أحسن كمان

[Sherif Khalifa]

طيب هل للجاز تأثير على دهان العربية الأصلى ؟

لو مرة واحد مفيش مشكلة
معرفش لو كذا مرة يعمل مشكلة ولا لا

كنت راكن جنب عامود و البلدية محليش ليها دهان العامود الا فى اليوم دا
العربية بقت اسود منقطة فضى

ودتها المحطة غسلها بجاز و بعد كدة اتغسلت عادى وكلة راح

[waleed_home]

فجربت التنر بيحوش البوية لكن بيدوب البوية الأصلية وبيشوهها
الجاز ضعيف ومقدرش يعمل حاجة ومش بيأثر على بوية العربية
النفط مش بيعمل حاجة
البنزين هو اللي شالهم ومش بيأثر على البوية نهائيا لكن بعد معاناه كنت باملى القطنة بنزين واسيبها شوية على كل نقطتين بوية وبعدين اضغط وامسح البوية جامد كانت بتتشال
وبعد ما خلصت لقيت مكان حركة القطن مخربش جامد في البوية فجبت كمباوند الأول ومسحت أماكن البوية وبعديها بولش ، طبعا استعنت بصديق علشان كانت مهمة مملة

وأخيرا رجعت بوية العربية زي ما كانت أو أحسن كمان

طيب انت ماجربتش الكومباوند لوحده فى الأول ؟

[Sherif Khalifa]

الكومبوند مش هيطل البوية اللازقة
لمعت العربية بالصاروخ وكان عندة نقطيتبن بوية مطلعوش

[alkingwr]

الحل انك تلمع العربية بالبولش و الكمبوند و كل الهبو هيطلع

[Eng_Mostafa_89]

جرب تطلعها بالبولش كدة بس بيحتاج دعك جامد

[swimmer25]

لو بوية العربية الفبريكة استخدم تنر لانها بتبقي ثابتة
وفي كل الحالات التنر كويس لانه مذيب سريع فمش هياخد منك وقت
بس تكون محضر فوطة مبلولة جامد او الاحسن ازازة مياه مع الفوطة وكل ما تنظف جزء صغير اغسله كويس بالمياه
لو الاماكن متفرقة يبقي مفيش قلق لان القطنة هتكون صغيرة وهتعمل الجزء الملطخ بالبوية بس بردو مع الغسيل
لو البوية نقط صغيرة وجنب بعض يبقي هتضطر تعمل المكان كله بس بسرعة جدا مع تقسيمه اجزاء صغيرة وغسل كل جزء فورا بعد استخدام التنر