عايز اغير الكاوتش ومحتار فى المقاس والنوع ؟

[mido777]

السلام عليكم ورحمة الله
ازيكم يا شباب نايل موتورز ...

كنت عايز اغير الكاوتش(النترا 2007) ومش عارف اغيره هو هو نفس المقاس 15 - 65/185
ولا فيه نسا بتقولى ممكن تعرض حاجه بسيطه ويبقى 65/195

مع العلم ان على القائم بتاع العربية مكتوب 3 مقاسات الكاوتتش
15-65/185
15-65/195
16-55/205

هلى فعلا معنى الكلام اللى مكتوب على القائم ده ان العربية هي دى المقاسات اللى ممكن تركبلها ؟؟

ولو خليت الكاوتش 195 مش حيأثر على العفشة ؟؟؟

وبالنسبة لماركة الكاوتش
بفكر اجيب بتاعها الهانكوك الكورى .. و والدى عمال يقنعنى ب الميشلان الفرنساوى
وفيه ناس تانيه بقولى ميشلان امريكى ؟؟؟

ياريت حد يفكر معايا

[reamoz]

185/65 إرتفاع الكاوتش من حرف الجنط للأرض = 120.25مم عرض الكاوتش 185مم نفس مقاس الجنط

195/65 إرتفاع الكاوتش من حرف الجنط للأرض = 126.65مم عرض الكاوتش 195مم نفس مقاس الجنط يبقى العربية هترتفع عن الأرض بمقدار حوالي 6.5مم يعني قول نص سم كاوتش زيادة هيقلل الثبات في الملفات حاجة بسيطة لكن هيزود بردة المرونة حاجة بسيطة لكن تأثير زيادة المرونة ده هيضيعة الفرق في عرض المداس اللي هيزود معامل التشبث

205/55 إرتفاع الكاوتش من حرف الجنط للأرض = 112.75مم عرض الكاوتش 205مم جنط 16" هيفرق في الإرتفاع حوالي 12.25مم زيادة هتعوض الفرق في إرتفاع جنب الكاوتش علشان العربية ماتوطاش على الأرض لكن هتخلي الثبات في الملفات أعلى بس هتكون أنشف في المطبات

دي المعلومات عن كل مقاس وليك إنك تقارن وتختار اللي انته محتاجة

وبالنسبة لنوع الكاوتش الهانكوك الكوري طري وكويس

وطبعا الميشلان الفرنساوي وهمي وعمرة أطول لكن في طبعا فرق سعر كبير ممكن يوصل للضعف بردة إنت اللي هتقدر تختار

[mido777]

الف شكر يا باشا للشرح الوافى ده والمعلومات المهمة دية

طب كنت عايز اعرف رأيك انت ممكن تختار ايه ؟؟

[reamoz]

ولله حسب نظام سواقتك إنت
لو مش بتجري والعربية كانت كويسة معاك خليك في ال 185/65 زي ماهوه
لو بتجري وعايز ثبات أكتر ركب 195/60 ده إرتفاعه هيكون 117مم يعني اٌل 3ملي تقريبا عن اللي كان فيها بس هيزود الثبات في الملفات وكمان في الفرامل والعربية هتوطى حوالي 3مم
اما المقاس 20/55 ده هيعلي العربية حوالي 5مم لكن هتضطر تغير الجنوط ال15" وتشتري جنوط 16" بس هتكسب إرتفاع حوالي نص سم عن الأرض خصوصاً لو بتحك في المطبات وكمان ثبات عالي

[ahmed_h_g]

الميشلان الأسبانى كويس أنا مركبه بس مش مثبت معايا العربيه فى الملفات زى الجوديير مثلا"

[Esam Mosaad]

لو مش بتجري والعربية كانت كويسة معاك خليك في ال 185/65 زي ماهوه
لو بتجري وعايز ثبات أكتر ركب 195/60 ده إرتفاعه هيكون 117مم يعني اٌل 3ملي تقريبا عن اللي كان فيها بس هيزود الثبات في الملفات وكمان في الفرامل والعربية هتوطى حوالي 3مم

انا بشكرك على المعلومات الجميله
بس اتمنى انك تقدر تفدنى فى السؤال ده ونفسى افهموا

دلوقتى انا مقاس العريبه عندى 185/65 تمام لما غيرت الكاوتش حبيت اعرض اكتر
وجبت 195/60 تمام جنط 14

المفروض ان العريبه هتعلى شويه نظرا لان فى فرق ارتفاع بين 185 و ال 195
بس هنا انت بتقول ان العريبه هتوطى ومش فاهم بقى هيا هتوطى ولا تعلى مع العلم انى مش حاسس بفرق سواء فى الطول او الوطى