ضروووووري جدااااا عندي مشاكل في العربيه لازم احلها بسرعة

[ahmed_said_13]

انا مهندس ميكانيكا و اشتريت عربية فورد اسكورت 1300 سي سي كاربراتير موديل 99 من 8 شهور و بصراحة تاعباني شوية ( كان فيها شوية مشاكل في الاول ) و دلوقتي مشكلتي معاها هي السحب و انا مقدر انا من اكثر السيارات ثباتا علي الطريق لكن عندي دايما حسب ما العفشجي بيقول غربلة في الدركسيون و ده فعلا بيحصل الدركسيون عندي بيتهز يمين و شمال بس علي السرعات البطيئة مش علي السريع يعني مش محتاجة ترصيص ( انا رصصت 3 مرات و كانت الجنوط فيها تظبيط) لو عايز اضبط العفشة اعمل اية حد يدلني علي عفشجي فورد يكون محترم يطلع العربية مفيهاش الهوا لان الحوارات دي حصلت بعد ما ركبت العربية ب 4 شهور و الموتور غيرتله فلتر هوا و جوان تاكيهات و البوجيهات الاصلي و ضبطت التاكيهات و السحب مش عاجبني حاسس انها اول ما ركبتها كانت بتسحب و دلوقتي لأ و لما رحت للميكانيكي قاللي الشكمان مكتوم شويه بس مش هو ده السبب - السبب الاسطوانه و الديسك و عايزين يتغيروا فهل اركب تيل جديده علي الاسطوانه و لا اغير الاتنين و لا اعمل ايه و الدركسيون تقيل عايز اعرف طريقة تخلية خفيف شوية علي الواقف و الواقف عشان الركنة و هل ده ممكن يكون عيب في حاجة في العفشة و علي العموم لو عايز اضبط اداء العربية دي اعمل اية لانها عربية انا عارف انها كويسة بحكم دراستي و لكن صاحبها اللي اشتريتها منه كان مبهدلها شوية و معلش انا عارف طولت عليكم بس انا هتجنن :b4_556: خلاص انا العربية عاجباني جدااااااااا و عشان كده عايزكم تساعدوني عشان اضبطها و شكرا و اسف علي الاطالة

[thedeveloper87]

معلومة لحضرتك ، الفورد الاسكورت مع واحد صاحبي وسحبها طبيعي تعبان لأن موتور 1300 سي سي بيجر جسم وزنه 1500 كيلو جرام ، دي حاجة ، الحاجة التانية بالنسبة لغربلة الدركسيون روح لبتاع كاوتش محترم خليه يكشف على الكاوتشات وعلى الجنوط ، لو الجنط مخبوط أو معووج هيغربل معاك مهما رصصت.

وبالنسبة للعفشجي اسأل في قسم الفورد وناس كتير هيدلوك إن شاء الله

[ahmed_said_13]

انا رحت 3 مرات لضبط الجنوط و كانت فعلا معووجه و رصصت و ظبطت زوايا و ربطت العفشة في التلات مرات
يبقي اية السبب

[Ahmed Hassan]

جرب تجيب الفردتين اللي قدام ورا و العكس

[ahmed_said_13]

عملت كده بردو و تقريبا النتيجة واحدة محسيتش بأي فرق لسة الغربله موجوده

[ahmed_said_13]

في مرة لما كنت بظبط زوايا الراجل لما بقوله علي العيب ده قاللي العجل عندك زواياه مظبوطة لكن جلب المقصات عايزة تتغير و حد يبصلك علي بارة الدركسيون ممكن تكون معووجة و يبص علي صلايب الدركسيون مش عارف ده صح و لا اية

[ahmed_said_13]

هو بالنسبه للديسك و الاسطوانه ممكن اعير الاسطوانة بس لاني اعتقد ان الديسك سليم

[Ahmed Hassan]

هو بالنسبه للديسك و الاسطوانه ممكن اعير الاسطوانة بس لاني اعتقد ان الديسك سليم

هوه الكلام ده تبع اي موضوع؟!!!

[ahmed_said_13]

معلش ده تبع موضوع تاني خالص الظاهر كنت نايم و انا بكتب
و دلوقتي صحيت - بالنسبة للعفشه ممكن جلب المقصات و صلايب الدركسيون و بارة الدركسيون يعملوا الغربلة دي لان حكاية هات الكاوتش اللي ورا قدام او رصص و اظبط الجنط عملتها كتير و لسة المشكلة موجوده اعمل اية

[aymanay32]

خلى صنايعى شاطر يرفع لك مقاسات العربية و يتاكد انها مش عاملة حادثة

[ahmed_h_g]

بالنسبه للسحب
لو صوت الموتور بيعلى على كل غيار أكتر من اللازم ومفيش سحب أكشف على طقم الدبرياج
بالنسبه للعفشجى فى واحد ممتاز فى عين شمس أسمه وحيد معرفه من أبو صلاح
رقمه هبعتهولك عالخاص لو محتاجه