مشكلة فتيس بيجو 504

[SPIDER20055]

اعزائى المختصين فى نايل موتورز ....اغيثونى
انا ورثت عربية بيجو 504 مو 79 جى ال عن والدى الله يرحمه والكرة الارضية كلها بتنق على العربية واجمعت على ان العربية جديدة وانا اللى بتدلع
بس والله العظيم العربية مبهدلانى اخر بهدلة وانا زهقت وهابيعها ..بس قبل ما ابيعها نفسى اصلحها عشان مبحبش ابيع حاجة بايظة بستحرم الموضوع ده وبردو عشان محدش يبخس تمنها
الموضوع باختصار فى الفتيس او الدبرياج مش عارف
الفتيس كل فترة بحالات :مرة واحدة الاقى العصاية بتاعة الفتيس مش عاوز تاخد ولا غيار نهائى بتعض خصوصا فى الغيار الاول والثانى
طبعا بعد اللف كعب داير على الميكانيكية اللى للاسف مفيش حد قابلته بيفهم فيهم لغاية النهاردة حتى اللى فاتحين بيجو بس ومبيشتغلوش غير فيها
غيرت مجموعتين دبرياج كاملين وخلونى شيلت المجموعة الاصلية بتاعة العربية بسبب فتى واحد فيهم وغيرت مساتر دبرياج حوالى اربع مرات فوق وتحت واتياش وكل مرة اغير حاجة العيب يختفى مؤقتا ..اقول خلاص الحمد لله ..فجأة يظهر تانى
بيبان اكثر لما العربية بتسخن والطريق يقف
سبحان الله لما امشى على غيار الثالث او الرابع فترة والطريق مفتوح الاقى بعد كده كل الغيارات زى الملبن ..مرة واحدة الطريق يقف ..ترجع العصاية تقفش تانى
حطيت زيت فتيس خفيف وتقيل ..مفيش فايدة
نزلت الزيت خالص وحطيت جديد ..مفيش فايدة
واحد قاللى عصايتك موديل قديم ..عدلتها ..مفيش فايدة
واخر حاجة حصلتلى معاها ..انها بتاخد الغيار ويبات العصاية فى الغيار واسيب رجلى وادوس بنزين ......صوت الموتور يعلى والعربية مبتتحركش كانها متحجرة...ومرة واحدة اسمع من تحت العربية صوت ((((((((طق))))))) تروح ماشية ....هههههههههههه
انا زهقت والمفروض يوم الاتنين رايح لمفتى ميكانيكى جديد وصفهولى واحد ..افتى وقال ان ديل الفتيس ملحوم معووج ومخلى الاتياش مش عدلة فمفيش سوستة كفاية للغيار الاول والثانى
انا تعبت بجد ديه خامس مرة اشيل فيها الموتور وطبعا انتم عارفين شيل الموتور يعنى ايه ..يعنى مفيش حاجة بترجع مطرحها + انى عامل لها تكييف فطبعا بيطيرولى الشحنة غصب عنهم.....ومصنعيات..................
اسف للاطالة ..رجاء افيدونى قبل الذهاب للميكانيكى يوم الاثنين

[mohamed9999]

طبعا انت مغير اسطوانه و ديسك صح ولو مش مغيرهم طيب ما تغيرهم و تشوف

[pop_king3]

ربنا يكون فى عونك

[gazzar91]

أولاً رحمة الله على الوالد
أنا مقدرش أقولك حاجة غير اللي حضرتك عملتها بالفعل... و الميكانيكية مش بيفتوا.... العربية دي معقربة قوي قوي

و الله أعلم
في رعاية الله

[SPIDER20055]

متشكر على اهتمامكم..هى غالبا حاجة بسيطة بس هم مش شايفينها

[SPIDER20055]

يا جماعة ..............قولولى مبرووووووووووووووووك ...انا عرفت العيب بتاع الفتيس
الحمد لله رحت لواحد اسمه احمد عمارة - توكيل بيجو مصر القديمة -جنب جنينة الفسطاط - المهم هو مبدأيا كان شاكك ان ديل الفتيس ملحوم غلط وعووج عشان كده العصاية بتاعة الفتيس كانت بتعاكسنى
بس بعد ما طلع الفتيس بره العربية وجرب ..قالى الفتيس فيه حاجة مش مظبوطة من جوه
فك الفتيس كله وفجأة............لقى بليه اسمها البلية الشجرة تقريبا كانت فرطة جوه الفتيس البلى بيجرى جوه الفتيس وبييجى قدام التروس فى الغيارات وبالتالى العصاية بتعاكس فى كل الغيارات او بعضها
غيرت البلية وبس ع الباقى الغوايش والتروس.....قالى تمام
موضوع الشخشخة وانا ماشى....لقينا صاموله كبيرة كده على دريك الفتيس نفسه كانت سايبة وهيه اللى كانت عاملة صوت الشخشخة
المهم رجع الفتيس والموتور مكانهم والفتيس بقى احلى من اللانسر ...الغيارات بتييجى زى الملبن من الاول للمرشيديل

الحمد لله

بس بعت العربية بعد ما صلحتها ...جالى فيها سعر كويس فبعتها وانا دلوقتى بركب الاتوبيسات زى البوبى
وزعلان قوى انى مشيت بيها اكتر من سنة بعيبها واول ما صلحتها وعرفت العيب بعتها...بس يالله حلال على اللى اشتراها

شكرا على اهتمامكم مرة تانية ومشاركتكم

[ahmedtunning]

10000000000 مبروووك يا كبير وربنا يرزقك باجسن منها ان شاء الله