تيل الفرامل والطنابير - المشكلة

[Mohammad Okasha]

السلام عليكم
انا متابع مجهوداتكم العظيمة من فترة. وشاكر جدا لكل الناس هنا.
عندي مشكله في تيل الفرامل والطنابير. الميكانيكي بيقول ممكن تتظبط بالخراطة ونملا تيل الفرامل وده هيكلف حوالي 150 جنيه.
واحد تاني بس مهندس ميكانيكا وعنده ورشة وانا بثق فيه بيقول نغير الطنابير والتيل. وده هيكلف كتير قوي حوالي 1200 جنيه.
انا محتار. الميكانيكي بيقول ان ده شغل صح وعلى ضمانته. والمهندس حاسس انه بيحب الاسهل مع اني بثق فيه.
عربيتي بولو 2001.
ياريت حد يساعدني وانا شاكر للجميع وبصراحة استفدت كتير من الناس العظيمه الل هنا.

اخوكم محمد عكاشة

[memo_hefnawy]

التيل مبدأيا لازم يتغير و تجيب أصلى مش مضروب لأن ده حياتك و حياة ناس مش لعبه و ملو التييل ده شغل بلدى سئ جدا ولو الطنابير سليمة يبوظها

أما خرط الطنابير والله ممكن لو الريجه إللى فيها بسيطة و الله أعلم

إستنى آراء بقى الناس خاصة سبعاوى:)

[أبو عبدالله]

كلام محمود مظبوط انت ممكن تشوف فرق كبير في المبلغ بس لما يحصل لا قدر الله شئ هتندم اشد الندم
والشغل الصح بيبقى واضح زي الشمس

التيل اللي بيتعمل دهطبعا مش بيبقى زي الاصلي بتاع العربيه اذا كان في العمر اأفتراضي بتاعه او اداءه كمان
وممكن يبوظ الطنبوره كمان وده احتمال كبير

اما الطنبوره ففعلا لو موضوع الرجه ده خفيف فمن الممكن ان تروح المخرطه وتتظبط وده مفيهوش حاجه
وربنا معاك

[mohamed el hussien]

كلامكم صح 100 في 100
التيل لازم يتغير (للامان بس مش اكتر)
والطنابير فعلا ممكن تتخرط

بس خرط الطنابير بيكون مرة واحدة بس في عمر الطنابير

[hazem_khidr]

عندي مشكله في تيل الفرامل والطنابير. الميكانيكي بيقول ممكن تتظبط بالخراطة ونملا تيل الفرامل وده هيكلف حوالي 150 جنيه.

علي فكره شكلك بتتكلم علي التيل الخلفي مش الامامي علشان التيل الامامي مش بيتكملي و قدام عندك اسطوانات
المهم التمن دا غالي مش رخيص هيا تتكلف اقل من كده و دا بيعمل ايه ؟
الطنبوره من كتر احتكاك تيل الفرامل فيها ف بتبتدي تتاكل و لما تتاكل من جوه بتلافيها فيه فرق واضح بينها و بين شفه الطنبوره(المفروض بتبقي مستقيمه كلها حته واحده ) ف انت لما بتخرط الطنبوره بتساويها تاني علي وضعها الحالي بس لو جيت تركب تيل اصلي مش حيركب علشان الطنبوره اللي عندك بقت رقيقه و التيل مصمم علي طنابير ستاندر ف ايه الحل؟؟؟
الحل انك بتملي التيل بتاعك عند اللي خرط الطنابير و بيركب تيل اتخن من الاصلي علشان يعوض الفرق الناقص في الطنبوره(يعني الطنبوره بقت رفيعه حيتخن التيل شويه علشان تديك نفس المسافات القديمه) و فيه ناس بيبقي عندهم تيل امريكي بيركبوه علي حديد التيل بتاعك و بيبقي كويس مش وحش اوي .
لكن لو الطنابير عندك مخروطه قبل كده انا مش برجح الفكره دي علشان كده حتبقي الطنبوره رقيقه اوي و ممكن فرمله جامده تلاقي الطنبوره ادمرت .
ف تيل الفرامل مش بيبقي مغشوش هو بيشتروه عباره عن كتل و بيركبوه علي حسب المقاس عندك. اعملها لو دي اول مره الطنابير تتخرط و ما تخافش مش حيجري حاجه بس عمرها الافتراضي اقل من الجديده اكيد.
بس دا الحل انما لو عاوز تكلف هات الجديد طبعا لا يعلي عليه بس دا حل يمشيك سنه من غير مشاكل او اكتر بشويه كمان

[محمد ابراهيم 1]

هى غاليه كده ليه ما تسأل عليها فى مكان تانى انا غيرت طنابير بيجو 405 تمنها 250 الاصلى وغيرت برضه بتوع اوبل كورسا 99 كانوا فى نفس الرينج تقريبا 240 وبرضه الاصلى ومن التوكيل مش عارف هى كل قطع غيار البولو غاليه كده ولا ايه عموما اسال عليها ودور وان شاء الله تلاقيها بسعر احسن من كده بكتير

[معاذ الشرباصى]

حسب موديل البولو بتاعتك

انا فعلا ساعة لما جيت اغير التيل الخلفى, قالى لازم نغير طنابير بالكامل او نخرط تيل

ساعتها سألت كذا حد, و قالى مفيش مشكلة لو مليت تيل خلفى, و لم اخرط الطنابير

[Mohammad Okasha]

والله انا شاكر جدا ليكم جميعا وخصوصا الأخ حازم. أنا قررت أروح للمهندس اللي عندة ورشة. هقوله لو ينفع منغيرش الطنابير. انا شايف انها مش وحشة قوي. وعموما هعمل اللي هو يقولي عليه. يعني لو شايف انها ممكن تتخرط نخرطها. بس في كل الحالات هركب التيل الأصلي. وده ممكن يضطرني اغير الطنابير زي ما قال الأخ حازم انه ممكن مينفعش اركب تيل أصلي على طنابير متآكله.
محمد عكاشة

[hazem_khidr]

العفو يا اخ محمد كلنا اخوات بس لو حتخرط ما تركب تيل جديد بقي خساره و مش حيبقي مضبوط اعمل لها تيل و ما تقلقش و اوعي تسمع كلام حد يقولك هات طنابير مستعمله مهما كانت برضه مش حتبقي كويسه و مستعمله في عربيات قبل كده (اوعي تشتري حاجه في فرامل و لا عفشه مستعمله ابدا)يعني ممكن تجيب بابا او تابلوه او حتي موتور و معاك الميكانيكي انما اسكترا او مساعدين او اسطوانات او طنابير ما انصحش ابدا بيها

[Atef Saleh]

يا سيد محمد طنابير عربيتك و التيل بتاعها سعرهم مش هيعدى 500 جنيه لو كانوا المانى اما فى حاله الاسبانى هيكون اقل من كده كتير و للاسف اللى قالك على السعر اللى انت كتبته ده معندوش ضميرو انا تحت امرك فى اى استفسار ......و شكرا

[Atef Saleh]

اخبارك ايه يا دكتور معاذ من مده طويله ما شوفتكش و لا سمعت صوتك كده يبقى العربيه ماشيه مظبوط من اخر مره على العموم يا دكتور عايزين نطمن عليك ......و شكرا

[Atef Saleh]

كلام الاستاذ حازم مظبوط 100 % لأن المستعمل مشاكله كتير اوى ابسطها انك مش هتعرف ترجع الحاجه اللى اشترتها لو طلعت مش شغاله و كمان فى حاجه تانيه انك لما تشترى جديد بتساهم فى زياده ثروه تجار قطع الغيار الغلابه اللى زى العبد لله .......و شكرا

[hazem_khidr]

و كمان فى حاجه تانيه انك لما تشترى جديد بتساهم فى زياده ثروه تجار قطع الغيار الغلابه اللى زى العبد لله

و هما تجار قطع الغيار الجديد غلابه برضه يا استاذ عاطف :mrgreen:
بهزر معاك ما تزعلش

[drakola_basem]

الهندسية لتوريد و تركيب تيل الفرامل و الدبرياج

https://www.facebook.com/handasia4brake

نتمنى ان تشاركونا على صفحتنا المتواضعة

[mhmodhsn]

اخواني أرجو افادتي عن طريقة أخذ الهواء من الفرامل للسيارة فيات 131 وأكون شاكراً لكم