مشكلة (كوبيه)

[hamada409]

السلام عليكم

دي أول مشاركة ليا هنا أنا المنتدى عاجبني جدا جدا و تقريبا قاعد طول النهار قدامه

مشكلتي هي كالآتي:-

معايا عربية كوبيه 2005 و كنت عملت بيها حادثة على كوبري أكتوبر إتخبطت في الرصيف اللي في النص على سرعة 140 و لما نزلت أشوف حصل حاجة ولا لأ جه واحد رزعلي العربية من ورا على سرعته!!!!

المهم وديت العربية لغبور (طبعا كل الناس عارفين غبور و حواراته) العربية قعدت هناك 15 يوم عشان كانوا لسة هيستوردو حاجتها مخصوص من كوريا قالولي إنهم هيغيرو مساعد و مقص و بلية وجشمة في مكان الحادثة (قدام شمال) ولما طلبت منهم يعملو الرزعة اللي ورا قالولي لأ ده قسم تاني خالص إسمه الهياكل ملناش دعوة بيه و إنتا بعد منصلحلك الحاجات دي تيجي بنفسك عشان تنقلها عندهم هناك!!!

المهم رحت أستلم العربية بعد ال 15 يوم و قلت أهدى شوية عالخبطة اللي ورا عشان مكنتش عارف أتحرك من غير العربية خالص ده غير إن الشغل بعيد جدا عن البيت

بعد ماخدت العربية و أنا ماشي في مصر إسكندرية لما عديت ال 60 لقيت نفسي بأسمع صوت زنة غريبة جدا وبحس بيها خفيف تحت العربية الغريب إنه طول مانا دايس بنزين مبسمعهاش و أول ماشيل رجلي تظهر و مبتظهرش غير بعد ال 60 و تفضل زي ماهيا طول مانا ماشي بس طبعا كنت بعدت أوي عن غبور و كان لازم أرجع الشغل تاني عشان كنت مستأذن بالعافية

المهم في الويك إند وديتهاهم تاني قالولي العفشة قدام و ورا سليمة تماما و مفهاش حاجة العيب ده بسبب الخبطة اللي ورا فتعالى إستلم عربيتك عشان تنقلها لقسم الهياكل

رحت فعلا و نقلتها قفلوا طبعاوقلتلهم قسم الصيانة بيقول إنه لازم الخبطة دي تتعمل عشان صوت الزنة يروح المهم رفعوا العربية و كشفوا عليها من تحت و قالولي دي مفهاش حاجة على العموم هنعمل الخبطة. الخبطة عملت شق كبير في الإكصدام اللي ورا و طبعا غبور توكيل فعمرهم ماهيلحموه و يركبوه+ إن الشنطة إتكبست سنة لجوة و قالولي هنغيرلك الإكصدام و السدرين اللي وراه (أول مرة أعرف إنه في حاجة إسمها سدر ورا لأ و 2 كمان حاجة غريبة)

قعدوا يشتغلوا في العربية أسبوع وبعدها قالولي العربية خلصت. روحت أستلمها و قلت قبل ماأدفع الفاتورة أبص عال عربية أشوفها إتعملت صح ولا لأ و فوجئت بإن البهوات غيرو الإكصدام و رشوه و خلاص و سابو الشنطة مكبوسة و عالية عن الصاج زي ماهيا!!!!!! إتنرفزت و قعدت أزعق و بصراحة أنا معذور يعني لو كنت وديتها لسمكري تحت الكوبري كان هيعمل الخبطة الملحوظة جدا دي المهم قالولي إستريح عشر دقايق نكون عملناها و فعلا عملوها بس برضه مطلعتش مظبوطة قوي بس خدتها و مشيت آخر ماتخنقت وبعدها إتصدمت الصدمة بقى الكبيرة جدا إنه الصوت لسة موجود زي ماهو!!!!!!!!!!!! و معرفتش أرجع عشان الساعة كانت بقت 6 و كان الإستقبال بتاعهم قفل طبعا وآديني أهو ماشي بيها و الصوت لسه موجود و الزنة اللي تحت موجودة و مش عارف أعمل إيه

معلش طولت عليكم بس أنا كنت محتاج أفضفض و قلت يمكن ألاقي حد يعرف يقوللي أعمل إيه أو حد حصت معاه حاجة زي كدة

[escapatsh]

ايوا يا حمدا الحمد لله على سلامتك المهم هوا صوت الزنة الي عندك يشبه أه يعيني صوت حاجه بتحك ولا صوت زنه كهربا وهل ليها علاقه بسرعت العربيه يعني بتزيد مع السرعه ولا هيا بتطلع لما بتشيل رجلك من علا ألبنزينن........
لو
الزنه مابتزيدش مع السرعه وبتزيد لما بتشيل رجلك ممكن تكون مواسير ال بنزين من تحت اتعوجت فالحمل بيزيد علا طرمبت البنزين فبتزن وغالبا الزنه بتكون ناحية التنك طبعا دا احتمال بس مش أكتر

[hamada409]

الله يسلمك ياباشا و شكرا على ردك

الزنة باظبط كده كأنك قارص عالموتور بس الصوت نفسو بيقطع يعني الصوت بيبقى شبه صوت الموتور و انتا قارص عليه بس الصوت ده نفسو بيبقى بيقطع و أيوة بيطلع أول ما بشيل رجلي من عالبنزين و ال rpm بيبقى عال 2.5 و بعد ال3 لكن مبسمعوش قبل ال 60

مش عارف بقى

[kasten]

معلش تحمل .. هذا قضاء الله وقدره
مع غبور .. انت فى يد تخينه
ههههههههههه