الكوبلن و لا علبة الدركسيون

[ahmedyehia515]

مساء الخير على أحسن شباب فى احسن منتدى,

المشكلة ببساطة انو من شهر كده ابتجيت اسمع صوت طرقعه مع كسر الدرسكيون على الأخر على الواقف أو على الماشى. قولت ده الكبالن بس كان عندى امتحانات فقولت كام اسبوع كده و اعملها. بعد اسبوع ابتديت اسمع صوت تزييق و انا برد الدركسيون من الشمال و عفشجى قاللى ده علبة الدركسيون، بس يومين و التزييق راح، النهارده بقه ابتديت اسمع صوت فى اللحظة اللى ببتدى ألف الدركسيون يمين او شمال، و برده فى اللحظة اللى برجعه فيها للنص. الصوت جاى من تحت رجلى و الصوت على الراقف و على الماشى. الصوت ده بيطلع بس لما أمشى بالعربية شوية. دلوقتى انا خلصت امتحانات انهارده و نازل بكره أغير الكبالن ان شاء الله، كنت عايز اعرف الصوت ده سببه ايه عشان طبعاً كلكم عرفين ابداع الصنايعية بيوصل لدرجة إيه.

العربية فابيا 1400 سى سى موديل 2001 هاتش باك

و شكراً

[reamoz]

الكبالن مش بتطقطق غير والعربية ماشية
ممكن يكون المسمار والصامولة اللي بيربط عامود الدركسيون بالعلبة مهوي وعايز يتقرط عليه لو مش كدة ممكن يكون بيض طرف بارة الدركسيون أو العلبة نفسها

[ahmedyehia515]

الكبالن مش بتطقطق غير والعربية ماشية
ممكن يكون المسمار والصامولة اللي بيربط عامود الدركسيون بالعلبة مهوي وعايز يتقرط عليه لو مش كدة ممكن يكون بيض طرف بارة الدركسيون أو العلبة نفسها

و فى الحالتين لازم عفشجى كويس هوه اللى يكشف عليها

[ahmedsamir79]

غالبا مش كبالن

[sab3aawy]

غالبا دى صليبة عمود الطارة، اللى رابطة عمود الطارة بعلبة الديريكسيون، اما انها مش مربوطة كويس او انها تآكلت وتحتاج للتغيير، لكن ده لا يمنع برضه ان فيه احتمال بسيط تكون العلبة نفسها، لذلك ابدأ بالكشف على الصليبة، لو سليمة اكشف على العلبة

[reamoz]

غالبا دى صليبة عمود الطارة، اللى رابطة عمود الطارة بعلبة الديريكسيون، اما انها مش مربوطة كويس او انها تآكلت وتحتاج للتغيير، لكن ده لا يمنع برضه ان فيه احتمال بسيط تكون العلبة نفسها، لذلك ابدأ بالكشف على الصليبة، لو سليمة اكشف على العلبة

هي دي اللي قصدي عليها

[ahmedyehia515]

انهارده رحت مع واحد صاحبى للعفشجى بتاعه و اول حاجة الراجل ده من نوعية الصنايعية اللى يحسسك انه بيشتغل فى مفاعل نووى. المهم قلتله نبتدى نتأكد على موضوع تربيط العفشة. المهم خدنه لفة عشان اسمعه الصوت و قال قتواه العظيمة، اللى فهمته انه سوسته المساعد اليمين خدت مصب او نقرة جامده و خرجت من مكانها ( ليها بيت تحت ورا الطنبورة كده و واحد تانى زيه بس من فوق) قلتله طب و الحل، قاللى نفك المساعد كله و نرجعها. طبعاً قلتله شكراً، مساعد أيه اللى تفكه. وأنا راجع جت فى بالى فكرة و قلت ليه لأه، أنا كل يوم رايح جاى فى الرمل مش ممكن يكون الرمل مع المياه نشفو فى بيت السوستة ده و عشان كده بيخلوا السوستة تخرج من مكانها لما تييجى تلف. جبت علبتبن wd-40 و رفعت العربية فى جراج البيت و نضفت المكان اللى السوستة بتبات فيه و خليت البواب يلف الدركسيون يميين على الآخر و شمال عشان أنضف المكان كله.

خرجت اجرب العربية و يا حلاوة يا ولاد, الصوت راح خالص لفيت بالعربية 3 ساعات عشان اتأكد و كله تمام و بقالى يومين ماشى اهو و الصوت أختفى تماماً

[magyver]

طييب تماااااااااااااام
اللة ينور الف بركة

[ahmed_h_g]

يعنى المشكله كانت فين وأنهى صوت اللى راح ؟

[ahmedyehia515]

يعنى المشكله كانت فين وأنهى صوت اللى راح ؟

بص يا سيدى، صوت الطرقعة عند لف الدركسيون على الآخر يمين او شمال و العربية ماشية و بيروح لو العربية واقفة ده انتهى بتغيير الكبالن

كان فى صوت طرقعة عند لف الدركسيون على الواقف او على الماشى نص لفة بص يمين او شمال و استمر بعد تغيير الكبالن و كل يوم كان بيزيد، هو ده اللى كان سببه موضوع خروج السوستة من مكانها و اتحل بالwd-40

[ahmedsamir79]

الحمد لله
الله ينور

[ahmed_h_g]

بص يا سيدى، صوت الطرقعة عند لف الدركسيون على الآخر يمين او شمال و العربية ماشية و بيروح لو العربية واقفة ده انتهى بتغيير الكبالن

كان فى صوت طرقعة عند لف الدركسيون على الواقف او على الماشى نص لفة بص يمين او شمال و استمر بعد تغيير الكبالن و كل يوم كان بيزيد، هو ده اللى كان سببه موضوع خروج السوستة من مكانها و اتحل بالwd-40

الف شكر

[shalaby2001]

كويس انك تفكر وتلاقى الحل. ممتاز بجد