ازاي أعرف إن العفشة محتاجة تتضبط

[dandashx]

حاسس إن العربية بتتهز من جوه أكتر مع المطبات والحفر اللي في الطريق، ومش عارف إذا كان ده طبيعي ولا لأ. ومن اسبوعين كلت مطب على 70كم فخلاني شكيت انه يكون السبب.
لما باركب تاكسي لانوس في نفس الطريق اللي بامشي فيه بعربيتي، باحس إن التاكسي أنعم ومعزول عن الاهتزازات أكتر من عربيتي، عربيتي كليو 2003 ومعرفش هل هي عفشتها كده ولا فيه مشكلة محتاج أبص عليها

السؤال عامة، إمتى الواحد يحس إن العفشة محتاجة تتضبط؟ أو نقول، إيه الأعراض اللي بتقوللي إكشف عالعفشة.

[saadelden]

الاعراض , لو فيه صوت تزييق او تخبيط
الدركسيون بيحدف لواحده

دي الحاجات الي بتبان اوي لو العفشه فيها مشكله
غير كدا روح ربطها و اكشف علي الجلب و الي بايظ غيره

[amrelsaqqa]

رد فعل العربية يكون مبالغ فيه شوية حتى مع ادق تفاصيل الطريق واقل السرعات

يعنى اقل تكسيرة في الطريق تلاقى العربية كلها مدربكة
تنزل حفرة حتى لو ماشى سلانسيه ، تلاقى العربية رزعت ودبت جامد ، وممكن تلاقى في جنب بيرزع اكتر من جنب
تاخد مطب تلاقى العربية اتشالت واتحطت حتى لو كنت ماشى بالراحة
تاخد مطب هوائى على سرعة تلاقى العربية بتتنطط من ورا كأنه كان مطب حقيقى
تحس بكل زلطة وكل طوبة في الطريق وخصوصا في الدركسيون وتلاقيه بيترجرج في ايديك جامد

طبعا مش لازم الاعراض دى كلها مع بعض

[dandashx]

رد فعل العربية يكون مبالغ فيه شوية حتى مع ادق تفاصيل الطريق واقل السرعات

يعنى اقل تكسيرة في الطريق تلاقى العربية كلها مدربكة
تنزل حفرة حتى لو ماشى سلانسيه ، تلاقى العربية رزعت ودبت جامد ، وممكن تلاقى في جنب بيرزع اكتر من جنب
تاخد مطب تلاقى العربية اتشالت واتحطت حتى لو كنت ماشى بالراحة
تاخد مطب هوائى على سرعة تلاقى العربية بتتنطط من ورا كأنه كان مطب حقيقى
تحس بكل زلطة وكل طوبة في الطريق وخصوصا في الدركسيون وتلاقيه بيترجرج في ايديك جامد

طبعا مش لازم الاعراض دى كلها مع بعض

الحاجات دي كلها نسبية. بالذات أخر حاجة.

أنا عندي رجرجة في الدركسيون مع الحفر اللي في الطريق بس مش عارف أحدد إذا كانت الرجرجة دي طبيعية ولا زيادة عن اللزوم. المفروض أعمل ايه عشان اعرف؟

[Sh_sunsea]

انا بدأت أشعر بالعكس - ان المطبات العربية بتترزع فيها جامد جدا - وتثبت مرة واحدة - حاسس اني ماشي على حديد مش على مساعدين

هل دي تهيؤات - والعكس هو الي معناه ان المساعدين او العفشة محتاجة ضبط - ولا الي انا باشعر بيه ده ليه اسباب ..؟

[amrelsaqqa]

الحاجات دي كلها نسبية. بالذات أخر حاجة.

أنا عندي رجرجة في الدركسيون مع الحفر اللي في الطريق بس مش عارف أحدد إذا كانت الرجرجة دي طبيعية ولا زيادة عن اللزوم. المفروض أعمل ايه عشان اعرف؟

انت ادرى واحد بعربيتك لو كانت مفيهاش العيوب دى قبل كدة يبقى اكيد فيه مشكلة

انت ممكن تروح لواحد عفشجى بس يكون بيفهم
يعنى مش اللى تقول له فك وركب وخلاص

يركب العربية يطلع بيها ياخدها لفة في طريق فاضى وفي شارع مكسر
هيقولك كل اللى فيها

[amrelsaqqa]

انا بدأت أشعر بالعكس - ان المطبات العربية بتترزع فيها جامد جدا - وتثبت مرة واحدة - حاسس اني ماشي على حديد مش على مساعدين

هل دي تهيؤات - والعكس هو الي معناه ان المساعدين او العفشة محتاجة ضبط - ولا الي انا باشعر بيه ده ليه اسباب ..؟

المساعد لما بيبوظ يا ما بيخف يا اما بيحجر

الوصف اللى انت بتقول له اقرب لانه يكون محجر ، بس طبعا الكشف على الحقيقة هو اللى يحدد

[dandashx]

المطبات مش حاسس فيها باختلاف كبير ونا طالع وانا نازل.

الاختلاف لما يكون شارع مش مستوي، يعني زي إشارة روكسي وشريط المترو اللي معدي في وسطها، لما اعدي عليها حتى لو بسرعة 20-30 كم/س باحس إن العربية بتترج جامد وباسمع صوت من تحت

ملحوظة: ماربطتش العفشة من زمان جدا، ممكن يكون الموضوع تربيط وبس، ولا المشكلة ممكن تكون أكبر

[ahmedjumpo]

المطبات مش حاسس فيها باختلاف كبير ونا طالع وانا نازل.

الاختلاف لما يكون شارع مش مستوي، يعني زي إشارة روكسي وشريط المترو اللي معدي في وسطها، لما اعدي عليها حتى لو بسرعة 20-30 كم/س باحس إن العربية بتترج جامد وباسمع صوت من تحت

ملحوظة: ماربطتش العفشة من زمان جدا، ممكن يكون الموضوع تربيط وبس، ولا المشكلة ممكن تكون أكبر

طيب ما تبداء بالارخص و هو تربيط العفشة و كمان و العفشجى بيربط هيقولك على حالة مكونات العفشة و اذا كان فيه حاجة محتاجة تتغير

[dandashx]

طيب ما تبداء بالارخص و هو تربيط العفشة و كمان و العفشجى بيربط هيقولك على حالة مكونات العفشة و اذا كان فيه حاجة محتاجة تتغير

هاعمل كده ان شاء الله

[motazgamal]

طيب اية اخبار المساعدين لو مغيرتهاش بقالك فاترة هات المونرو حلو

[dandashx]

أنا كشفت عالعفشة عند بريدجستون، وبعدين عند عفشجي، والاتنين قالولي كل حاجة تمام والحمد لله.

ملحوظة: المشكلة طلعت في الكاوتش ... لما غيرت الأربع فرد اللي كانوا في الضياع حصل اختلاف كبير والمشكلة اتحلت بنسبة كبيرة

[adelelgarhy]

انا يا جماعه لبست حفره بعربيه سيراتو كوبيه و كان معايا 2 فى العربيه و حسيت ان فيه حاجه فى العربيه من ادام يمين .. كشفت زوايا مرتين و ربطت على العفشه و غيرت الكوتش و بصيت عالجنط بس العربيه حاسسها مش ماسكه نفسها و الطاره بتلعب لوحدها ... ممكن حد يقولى اعمل ايه؟

[engwms]

متابع