صوت تزييق فى المطبات - ماروتى

[Ahmed Hamdy]

عربيتى ماروتى .. كل شوية ألاقيها بتزيق فى المطبات والحتت المكسرة .. رحت أول مرة لعفشجى قالى دى علبة الدركسيون .. !!! وبعدين قالى مؤقتا حنغسلها ونشحمها بس ده حل مؤقت .. عمل كده مشيت شوية كويس ورجعت تانى ..
رحت لواحد تانى قالى دى المقصات عايزة تتغسل وتتشحم .. فكها لقى بيضة مكسورة .. رحت غيرت المقصات لان بيضة المقص فيه هو نفسه مش لوحدها .. وبرضه بعد التغيير لقيت التزييقة .. رحت لعفشجى حكيتله القصة قالى ده ميكانيكى قلتله أيوه .. قالى لأ حنظبطها .. وتقريبا شحمها أو كده اختفى الصوت .. برضه قعدت شهرين تلاتة ورجع تانى .. وهكذا ..
هو مفيش حل نهائى للموضوع ده ؟؟؟

كمان بسمع صوت طقة كده جاى من تحت رجلى وأنا بطلع بالعربية أو طالع مطب بالراحة .. مش عارف برضه سببه ..

[tmedhat]

انت شحمها مرة كل 3 شهور فى البنزينة ودة بيزيل الاوساخ العالقة بالعفشة وبيمنع التزييقة دى

[x100]

ثلاثة شهور بس دانتا كدة محافظ على العربية انا مكنتش بكمل شهر ونص بالبيجو 104 ولازم اربط العفشة واشحم وازييت انت فى مصر يا بية

[sobhysm]

أنا عندى نفس الاعراض بس العربية 128 يا ريت تفيدونى علشان رحت أشحم العربية فى البنزينة قالى ال128 ما لهاش مشاحم ومشحمهاش يا ريت تفيدونى يا رجالة المنتدى وشكراً للأخ كاتب الموضوع علشان أنا كنت لسة هكتب عن المشكلة دية

[Honda_lover]

كمان بسمع صوت طقة كده جاى من تحت رجلى وأنا بطلع بالعربية أو طالع مطب بالراحة .. مش عارف برضه سببه ..

ده المقص مش مربوط كويس او المسامير الي مثبتاه في جسم العربية من تحت (الشسيه) فيه منهم مسمار مفوت.

[Ahmed Hamdy]

ده المقص مش مربوط كويس او المسامير الي مثبتاه في جسم العربية من تحت (الشسيه) فيه منهم مسمار مفوت.

أنا متشكر لحضرتك ..
أنا رحت امبارح لعفشجى قالى دى علبة الدركسيون محتاجة حشو .. مع إنى عاملها من كام شهر ..

مش عارف كلامه صح ولا ايه ؟؟؟

[Honda_lover]

الكلام اللي انا قولتهولك ده صح 100% ومتجرب قبل كده في كذا عربية روح للعفشجي وقولو اعمل كده وجرب ومش هتخسر حاجة

[Ahmed Hamdy]

طيب أنا لما كنت عند العفشجى قلتله على موضوع التزييق ده قالى مفيش حاجة بس اغسل العربية من تحت ..قلتله طيب أشحمها قالى لأ دى مش بتتشحم .. العربية ماروتى ..
لما غسلتها فعلا التزييق راح بس أسبوع ورجع تانى ..

نفسى فى حاجة تخلى التزييق ده يروح فترة على الأقل شهر .. !!!

[amarakl]

لأى اعطال سوزكى انا واحد صاحبى بيصلح عربيته فى مركز صغير فى عابدين صاحبه مهندس وعنده قطع غيار جديده وأستيراد وراجل ممتاز والله معاملته ممتازه بس هو دايما مزحوم لو عايز تروحله أبعتلى على اليميل وانا اوصفلك مكانه amarakl@hotmail.com

[Ahmed Hamdy]

أنا كنت بفكر أجيب Wd40 وأرشه من تحت العربية على المقصات والميزان وكده ... ينفع ولا غلط ؟؟

[ahit]

ده المقص مش مربوط كويس او المسامير الي مثبتاه في جسم العربية من تحت (الشسيه) فيه منهم مسمار مفوت.

انا أوقات بسمع الطقطقة دى فى المطبات و خاصة و الدريكسيون ملفوف مع إن الميكانيكى فكلى المقص و شحمه و ركبه تانى بمسامير جديدة و لسه الصوت موجود ؟؟؟
يا ترى إيه سبب المشكلة ؟

[mohamed9999]

انا كنت بدور فى البحث لقيت مشكلتكم ...........الظاهر ان التزيييق دا ملوش حل مع انه لسه ظاهر عندى من يومين

[thedeveloper87]

معلش سؤال كده عالماشي:
يعني ايه تشحيم (أقصد في البنزينة) ومشاحم؟ ولو بيشحم أجزاء معينة في العفشة مش كده هيخلي الأجزاء دي عرضه لإن تلم تراب أكتر؟؟؟؟؟

[wanderer]

ثلاثة شهور بس دانتا كدة محافظ على العربية انا مكنتش بكمل شهر ونص بالبيجو 104 ولازم اربط العفشة واشحم وازييت انت فى مصر يا بية

طيب تربيط العفشة انا عرفه ,اما التشحيم والتزييت دا ايه وبيتعمل فين

[sameh127]

- اغسل العفشة في البنزينة بماء و صابون سائل "إبعد تماما عن الجاز"
- رش سبراي wd-40 على كل الوصلات والكاوتشات في العفشة و تحاشى تماما وضع اي نقطة شحم علي العفشة مرة اخري ودائما استخدم wd-40 عند الحاجة و اتفرج علي الفرق