الحقونى بسرعة

[medo_love9551]

لو سمحتوا يا رجال المنتدى الكرام عندى عربية شاهين موديل 2000 المشكله عندى انى لما بكون ماشى على خط مستقيم الدريكسيون بيكون مش معدول عملت مشاركة قبل كدة قالولى اعمل ضبط زوايا وبالفعل عملت ضبط زوايا ولم يتم شيء وقالى اروع لواحد بتاعى عفشة المهم رحت قالى ان فيه كاوتشة تراب اللى فى الاسكترا عاوزه تتغير وشداد وغيرتهم ولم يتم شيء المهم سالت احد الاصدقاء قالى انها حاجة اسمها المشرشر اللى فى الطارة او عمود الطارة ممكن يكون فيه سنه نعمة وعاوزة تتخرط مع العلم السيارة باور لانى فعلا لما باخد ملف الطارة بتتعوج وبعد شوية بتتعدل تانى والعوجان شمال او يمين على حسب الملف فالحل ايه....

[mohamed777]

ياباش المشلة دى كانت عندى بس المسألة كانت مختلفة شوي
والحل كان عند بتاع الزوايا
بس هى مالهاش دعوة بالزوايا
ازاى؟
بتاع الزوايا بعد مابخلص ظبط الزوايا بيفك طارة الدركسيون وبيعدلها ويخليها مستقيمة مع الكاوتش وبيربط الصاموله بتاعتها تانى ومن ساعتها بقى الدركسيون عدل مع الكاوتش على الطريق زى بعض
اما عندك فانت بتقول انها مع الملفات بتتعوج وبعدين ملف تانى تتعدل وترجع تتعورج تانى!!!!!!!!!

مش عارف دة بقى يبقى اية انا اللي اعرفة واللي حصل معايا قولتة....

[medo_love9551]

ياباشا الف شكر بس المشكله عندى انى بحس ان الطارة ساعات بتفوت

[mohamed777]

ممكن كده تكون السنون بتاعة الطارة اتكلت

[aYaBooY]

تروح لبتاع زوايا مش عفشجي يشوفلك فيه بوش في المشرشر و ده انا استبعده ولا فيه بوش في العلبة
لو في بوش في العلبة ادامك حل من تلاتة تصلح العلبة في شمبليون او تجيب واحدة استيراد او تجيب واحدة جديدة

[medo_love9551]

انا رحت لواحد بتاع عفشة وبص على العربية وقالى فيه 2 كاوتشه اللى بيمسكوا الاسكاترا عاوزين يتغيروا هما دول سبب المشكلة وبالفعل غيرهم والمشكله اتحلت والف شكر لكل من ساعدنى

[mohamed777]

الحمد لله والف مبروك

[aYaBooY]

طيب الحمد لله انها طلعت بسيطة

[amrbakly]

انا عندي نفس الحكاية دية في الأونو

لما ابقي ماشي في خط مستقيم الاقي المسطرة مايلة سنة بسيطة ناحية الشمال حتي بعد ما ظبطت زوايا

بس بصراحة مطنش يعني محستهاش حاجة تستاهل الواحد يفك الدركسيون و كدة علما بأن اي حاجة بتتفك عمرها ما بترجع زي الأول

علشان كدة سبتها

نصيحة لو هي قارفاك قوي اعملها مش فارقة طز يا عم فعلا اللي بيتفك عمرة ما بيرجع زي ما كان و تحديدا الحاجات الحساسة زي الدركسيون و الكاربيراتير و الحاجات اللي بتتظبط بالشعرة دية

[medo_love9551]

والله يا اخى العزيز انا عن نفسى مش بحب اسيب حاجة زى دى ما اعملهاش المهم انك تشوف صنيعي كويس

[Bob2009]

كل ده انت عملته ليه اصلا

الموضوع كله مش محتاج كل الكلام ده كل الفكره فى الطاره نفسها عاوزه تتفك وتتظبط والموضوع سهل جدا وهى كلها 5 دقائق وخلاص.

انا كان عندى نفس الموضوع والحمد لله خد 5 دقائق بالظبط

الخطوات
1- جيب مفك قلاب الى هو مشرشر والناحيه التانيه عامل زى المسطره مع بعض وده بيكون فى العده بتاعت العربيه .
2- مفتاح العجل بس يكون 4 مقاسات على شان تلاقى المقاس بتاع الدركسيون .
3- فك الدركسيون واعدله زى ما انت عاوز .

وبس على كده بس الحقيقه مش انا الى عملت كده بنفسى الى عمل كده المكانيكى بعد ما ظبط الزوايا الدركسيون بقى بالمشقلب.

[medo_love9551]

يا باشا ان عملت موضوع الطارة ومنفعش لاكن لما غيرت الكاوتش اتظبط الطارة

[maged_tours]

يا جماعة الموضوع بسيط وعاوز يتعمل في شارع فاضي انك تفك طارة الدركسيون وتطلعها من مكانها وتحطها من غير متربط الصمولة وتمشي في خط مستقيم وترفع الطارة وتحطها علي الوضع الصح ولما تتاكد انها بقت مظبوطة تربط الصمولة وغالبا بتتربط بمفتاح العجل الصليبة

[ahmed_h_g]

يا جماعة الموضوع بسيط وعاوز يتعمل في شارع فاضي انك تفك طارة الدركسيون وتطلعها من مكانها وتحطها من غير متربط الصمولة وتمشي في خط مستقيم وترفع الطارة وتحطها علي الوضع الصح ولما تتاكد انها بقت مظبوطة تربط الصمولة وغالبا بتتربط بمفتاح العجل الصليبة

حلو الموضوع ده ... هجربه
الف شكر .

[محمد فريد]

ربنا معاك وتحل المشكلة لانها حاجة تقلق الصراحة
أنا لو اعرف اقول والله بس مليش خبرة
وابقى طمنا عليك