محتاجة كهربائى شاطر باسكندريه قريب من سيدى بشر

[lovely nonosa]

سلام عليكم

زى العنوان بالظبط ارجو المساعدة من الخبراء عربيتى شيفروليه سبارك 2008 وانا ماشية بيها لمبة البطاريه نورت مع العلم انى لسه جايبة لها بطاريه جافه فى مايو اللى فات , كنت جنب بنزينه فيها كير قاسو شحن الدينامو قالولى مش بيشحن كويس وبعد كده البطاريه ريحت والعربيه وقفت منى وصلتها البيت باعجوبه و جبتلها كهربائى قالى الدينامو لازم يتغير من غير مايحله ولا يكشف عليه كلام مايريحش فارجوكو اللى يعرف كهربائى شاطر عنده ضمير مابيخلش عليا بالمعلومه ويدينى اسمه و عنوانه ربنا يجازيكو كل خير وتقوليلى ايه الاحتمالات اللى سببت المشكلة دى عشان بحب ابقى فاهمه مش عشان بنت يتقالى اى كلام من اى صنايعى

[Weesky]

علي فكرة الدينامو حتي لو مش شغال ممكن يتصلح وفيه صنايعية متخصصة في تصليحة هوه والمارش بس وحيوفرلك جامد جدا بالمقارنة بشراء واحد جديد او حتي استعمال وانا اتعاملت مع واحد شاطر في الموضوع ده وهوه في سيدي بشر جنبك مش بعيد يعني بس المهم انك تتأكدي ان السبب في الدينامو والصنايعي يفكهولك
بالنسبة لموضوع الكهربائي الشاطر بيتهيألي انتي مش محتاجة واحد شاطر قد ما محتاجة واحد عنده ضمير لأني شايف الموضوع لو دينامو مش مستاهل ممكن حتي ميكانيكي فاهم يحلهولك زي ما حصل معايا (فك الدينامو وقالي انه خشن وروحت للراجل اللي بيصلحهم ظبطهولي ورجعتله بيه وركبه وكله تمام ) وعلي العموم الميكانيكي اللي بتعامل معاه قريب منك في سيدي بشر لو محتاجه عنوانه ممكن اقولك عليه وفيه كهربائي شاطر ومشهور ناحية السيوف بس دايما زحمة ولو محتاجة عنوانه بردو اقولهولك شوفي ايه اللي يريحك

[lovely nonosa]

جزاك الله كل خير ايوة اكيد قولى عالميكانيكى و الكهربائى عنوانهم واسمايهم الله يبارك لك انا شفت واحد كهربائى النهارده الصبح حل الدينامو وقالى القطعه اللى فيها الكتاوت مع الشربون عايزه تتغير سالت على قطع غيار ليها اصلى جديد ملقتش فقالى هنشترى واحد مستعمل و ناخد منه القطعه دى ايه راى حضرتك فى الكلام ده ايه

[Weesky]

طيب تمام طالما حل الدينامو يبقة العملية بقت اسهل عشان ممكن تروحي للصنايعي اللي بيصلح الدينامو علي طول وهوه في ايدك
حوصفلك واحد اسمه مصطفي المحل بتاعه صغير كده بس هوه اشطر واحد اتعاملت معاه في الموضوع ده عنوانه في شارع القاهرة بعد التقاطع بتاع شارع ٣٠ بشارعين تدخلي يمين وتسألي علي الاسطي مصطفي اللي بيصلح الدينامو والمارش اي حد حيقولك علي المحل علي طول بس الوصفة دي وانتي ظهرك للسكة الحديد تمام ده بالنسبة للدينامو
بالنسبة للمكانيكي بقا عنوانه وانتي ماشية جنب شريط السكة الحديد بحري والسكة الحديد علي يمينك تعدي شارع خليل حمادة اللي حيبقة علي شمالك بعد منه بشارعين فيه زقاق سد علي اوله محل اسمه المتحده بتاع قطع غيار استيراد هوه جوه الزقاق ده اسمه الاسطي حودة وهوه شغال في توكيل هيونداي الصبح وبيبقة موجود في الغالب بعد المغرب بس فاهم كويس في الهيونداي والشيفرولية والدايو والطقم اللي معاه في الورشة كلهم صحاب في التوكيل بس انا بتعامل مع حودة
الكهربائي بقا ده اصعب وصفة فيهم هوه في السيوف تدخلي الشارع بتاع دادي بتاع الفطير وتمشي فيه لحد قبل ما يخلص بشوية وتدخلي يمين حتلاقيه هناك ودايما زحمة وحاجة زهق وكل الصنايعية اللي عنده دكاتره ان شاء الله متحتاجيش تروحيله
وعلي العموم انا حاولت اوصفلك بالتفصيل بس لو اتكعبلتي في الوصفة او احتجتي حاجة او لو عايزاني اكلملك حودة الميكانيكي او مصطفي بتاع الدينامو ( محتاجة واسطة يعني )
كلميني ده رقمي 01222611691
بالتوفيق وابقي قوليلي عملتي ايه

[lovely nonosa]

الله يبارك لك انت وصفت بالتفصيل و الكلام واضح جداااا الف شكر ربنا يجعله فى ميزان حسناتك

[Weesky]

المشكلة اتحلت ولا لسة (في انتظار التفاصيل)

[lovely nonosa]

اه اتحلت الحمد لله الكهربائى اللى كان كشف عليها قبل ما اشوف رد حضرتك جابلى دينامو استيراد واخد القلب بتاعه ركبه فى الدينامو بتاعى و اشتغلت الحمد لله بس يا رب ماتبوظش تانى انا متشكره لاهتمام حضرتك جداااا