حد عنده تفسير ؟؟ التكييف مع السير بالسيارة

[د.محمود صلاح]

السلام عليكم ورحمة الله ..

حد عنده تفسير ؟

التكييف بيشتغل زي الفل والعربية مشية ومتحركة بسرعة فوق ال 50 مثلاً . ولو وقفت والعربية على السلانسية أو ماشي على سرعات بطيئة الاول والثاني الكمبريسور شغال ولكن ما بيطلعش هوا بارد ( حتو لو دوست على البنزين وانا واقف عشان أعلي الأر بي إم ) .

إيه تفسيرك للحكاية دي ؟ إيه العلاقه ؟

[caysersosaih]

سربنتينة التكييف الي قدام الرادياتير مسدودة عشان كده محتاجة هوا يخش عليها
حضرتك فك شبكة العربية في بنزينة وخلي عامل البنزينة يحط خرطوم الهوا بضغط منخفض فيها ويغسلها من برة هي والرادياتير

[jojooo]

سربنتينة التكييف الي قدام الرادياتير مسدودة عشان كده محتاجة هوا يخش عليها
حضرتك فك شبكة العربية في بنزينة وخلي عامل البنزينة يحط خرطوم الهوا بضغط منخفض فيها ويغسلها من برة هي والرادياتير

+111111111111111111
دة احتمال والاحتمال التانى ان الفريون ناقص شوية ومحتاج يتزود ويتكشف اذا كان فية تسريب ولا حاجة

[د.محمود صلاح]

ممكن ... وهشوف موضوع الهواء ده .

[د.محمود صلاح]

سألت الفني اليوم رد علي بأن ضغط الكمبريسور ضعيف بس أنا مش مقتنع لأني لما أزود الأر بي إم والعربية واقفة المكيف يكون تعبان برغم إن الكمبريسور شغال .

واول ما أتحرك بسرعة فوق ال 50 يبدأ يبرد بكفاءة

[exact]

ده عيب واضح
زي ما الزملاء قالوا ان ده السربنتينة متوسخة فالفريون مش بيبرد
وضيف عليهم احتمال تاني وهو ضعف سرعة المروحة اللي على السربنتينة او انها مش متثبتة كويس او بعيدة شوية
ممكن يكون اتجاه الهوا بالعكس من ناحية صدر العربية لبرة ولو ان الطبيعي العكس
وغالبا السبب من المروحة

[د.محمود صلاح]

بالملاحظة والتدقيق .. السربنتية سالكة والمروحة شغالة كويس

المكيف لا يعمل ( في وضع السكون ويكون الجو شديد الحرارة ) أما لو تحركت المكيف يبدا يبرد بكفائة

الموضوع مرتبط بحاجة بتسخن لما اقف على السلانسية

وجار التدقيق والملاحظة لحد ما اعرف المشكلة فين

[samirayad]

من الجائز لو كان هناك فلتر تكييف على سحب المروحه

أن يكون هو السبب

[د.محمود صلاح]

لا اعلم باشمهندس سمير ..

الفلتر طبعا طلع واتنظف قبل كده من تحت التابلوه .. انا شاكك في الدراير ( المجفف ) لما بيسخن مع التوقف والسلانسيه ما بيشتغلش ..
لاحظت انه طول ما العربية سخنه وفي الشمس بيحصل الموضوع ده واول ما تتحرك وتتهوى يشتغل

والله اعلم

[Abokartona]

نفس الكلام دا حصل معايا و لما غسلت سربنتينة التكييف اللى ورا الشبكة نزلت تراب و طينة كثير و الوضع اتحسن كثير.و الفريون كان زى الفل و كل حاجة تمام.و دلوقتى التكييف كويس

[tananybasha]

متابع باهتمام
عشان العيب غريب قوى
حتى لو ضغط الكباس قليل المفروض مع البنزين يعلى عادى مش لازم المشى

[د.محمود صلاح]

نفس العيب ده ظهر الآن في سيارتي الجديدة الهيونداي سنتافي ومدوخني .. غالبا زي ما تفضل الاخوة بإنه محتاج مروحة اضافية للسربنتينه بتاعة المكيف ... او حاجة اسمها بلف الكمبريسور الالكتروني

[mbx4e]

هل المشكله دي اتحلت ولا لسه ؟؟

[د.محمود صلاح]

حليت المشكلة في سيارتي الجديدة السنتافي بتغيير الكمبريسور بواحد جديد على الضمان وتغيير الزيت والفريون والمكثف وتنظيف السربنتينة

[mbx4e]

يعني المشكله كانت سدد في الدوره وغالبا في الجزء الخاص بالضغط العالي
كويل خارجي ( او سربنتينه) او المكثف + والمجفف الرسيفر دراير ( اسمه في السوق فلتر بس دا اسم خظأ)+ اوالكومبروسر عشان لو في اي خلل فيه او في بلف الكونترول