الحقوني العربية غرقت من جوه

[doctormae2002]

لسلام عليكم ورحمة الله
كل عام وانتم بخير
برجاء المساعدة وابداء الرأي
ظهرت عندي مشكلة غريبة جدا في العربية انا معايا عربية رينو لوجان 2012 عاملة حوالي 1500 كيلو بس
امبارح بلليل اكتشفت حاجة غريبة جدا لقيت دواسة العربية ورا من اليمين قدام الكنبة غرقان ميه و واصل عند تحت الكرسي اللي جنب السواق ومفيش ميه خالص الناحية الشمال عند السواق ووراه
قعدت ادور في العربية علشان الاقي زجاجة مية واقعه مفيش خالص المهم قعدت انشف بفوطه واعصرها جابت حوالي ليتر مية غير البلل في قماش الدواسة
جيت اركب العربية الصبح لقيتها مبلولة نص نص من امبارح قلت معقول وركبتها رحت مشوار صغير حوالي 2 كيلو ومشغلتش التكيف فيه لقيت المية رجعت زادت تاني من الاول وفضيلت اعصر
اعدت ادور في النور الصبح لقيت المية واخده الناحية اليمين كلها من قدام لورا بس المية بتتجمع جامد ورا يمكن علشان منحني العربية نازل شوية لتحت ورا
مع العلم المية اللي بحاول انشفها ملهاش لون ولا ريحه خالص ودرجت حرارتها هي هي حرارة الجو
والعربية مافيهاش مشاكل خالص في التكيف ولا بتسخن زيادة والشنطة من جوه ناشفه مفيهاش مية ولا بلل
ياريت حد يطمني لاني مفروض اني كنت بقضي اجازة العيد في البلد وكنت مسافر بالعربية ومفروض ارجع بيها اسكندرية تاني يعني مشوار 60 كيلو وطبعا انا قلقان من الموضوع ده يعمل مشكلة في العربية وانا علي السريع وطبعا التوكيل بعيد جدا عني دلوقتي غير انه اكيد هيكون مقفول في اجازة العيد
ونفس حد يقوللي اية ممكن يكون السبب (هل ممكن يكون من التكييف مثلا )

[dado_256]

على ما اعتقد ممكن خرطوم الفايز بتاع التكيف مخلوع حاول بص عليه كده من قدام الكرسى اللى جنبك وركبه وان شاء الله المشكله تتحل

[doctormae2002]

طب ممكن اعرف اعمل الكلام ده ازاي يعني قولي ادور فين بالظبط واعمل ايه خطوه خطوه

[AHMED1718]

اعتقد ان فيه سدة فى خرطوم الميا بتاع التكييف فبيرد على العربية من جوا حاول تشغل التكييف وتشوف اذا كان فيه مياا بتنزل من تحت العربية ولا لأ لو مفيش يبقا كلامى صح وحاول تروح لحد يسلكه

[mrghost]

بص روح لحد بتاع تكييف وخليه يبصلك ع الخرطوم لانه ممكن يكون مخلوع وبالتالى الميه تنزل من الكويل ع الدواسات علطول

[asemx1]

لبسها بامبرز ههههههههههههههه

معلش لو ضايقتك بهزارى بس انا حاسس ان فايظ المساحات مسرب على جوا او الازاز الادمانى او الورانى مش مقفول 100% فالبواب وهوا بيمسح او بيغسل الصبح بيجيب ميه جوا

لو مافيش كدا يبقى ممكن خرطوم الميه السخنه بتاع التاكيف مسرب على جوا

حصلتلى فى فيات 124 بولاندى زيرو هههههههههه سنه 1980 هيا عربيه والدى بصراحه

[doctormae2002]

الحمد لله الموضوع اتحل والف شكر لكل اللي شاركوا بارائهم
الموضوع فعلا طلع من التكييف ورحت بيها التوكيل فرع سموحة والمهندس قال لي ان خرطوم فايز المية كان مخلوع من مكانه والموضوع اتحل
مره تانية شكرا

[hamada_elzayat]

الموضوع ده حصل معايا من يومين فى البولو موديل 96
نفس الوصف بتاع الاستاذ صاحب الموضوع بالظبط بنفس الوصف بس انا معنديش تكييف فى العربيه ممكن يكون مكانه موجود او الخراطيم موجوده وتعمل برضه نفس الحركه ؟؟؟؟؟؟؟؟؟؟؟؟