مشكلة في تكيف رينو كليو

[abdelmonem89]

السلام عليكم

حصل مشكلة في كومبرسيور التكيف و كان بيطلع دخان و زي ريحة شياط كده، المهم رحت للميكانيكي و خليته يشيل السير الموجود في الكومبريسور علشان يفصلة خالص بس طبعا ده مأثر علي الباور بتاع العربية كله و الكاتينه زي ما الميكانيكي قال

و بيقولي انه كده باظ خالص ولازم يتغير
هل فعلا الكلام ده صحيح؟ و هل يمكن تصليحة؟
و يتغير بكام؟

اسف عالاطاله

شكرا

[a7medsh3rawi]

انت ممكن تفصل الكمبروسور من الفيشه اللى راكبه عليه وتخلى السير زى ما هو ما تشيلهوش وتروح لواحد كويس يكشف على التكييف ويشوف دى مشكله كهربا ولا فريون ممكن يكون حصل قفله

[mbx4e]

السلام عليكم

وعليكم السلام ورحمة الله وبركاته

حصل مشكلة في كومبرسيور التكيف و كان بيطلع دخان و زي ريحة شياط كده، المهم رحت للميكانيكي و خليته يشيل السير الموجود في الكومبريسور علشان يفصلة خالص بس طبعا ده مأثر علي الباور بتاع العربية كله و الكاتينه زي ما الميكانيكي قال
و بيقولي انه كده باظ خالص ولازم يتغير
هل فعلا الكلام ده صحيح؟ و هل يمكن تصليحة؟

باظ خالص ... الله اعلم. لو ليه تصليح مش هايبقى واضح بالكلام لازم يتفك الكلاتش ويتحل الكباس عشان يتعرف القصة دي لازم عملي
الوصف بالكلام غير دقيق وماينقلش حالة العطل
هل الشياط دا بسبب عطل كهربا يعني كويل او موبينة الكلاتش حصلها شورت وحصل شياط و هل عملت تأثير تاني على بلية الكلاتش وخلتها تقفش؟؟؟
ولا بسبب احتكاك ميكانيكي يعني بلية الكلاتش حجرت وقفشت مع الطنبوره وخلت السير يزحلق وعملت شياط او تكون فوتت و دمرت الكباس مع الكبس وعدم تشغيل التكييف؟؟؟
وهل اثر الكلاتش على الطنبوره؟؟؟؟ وعلى الكباس ؟؟؟
اثر على الكاتينه ؟؟ ليه سير التكييف مالوش علاقه بسير الكاتينه الا لو الكباس قفش وطنبورته كذلك قفشت معاه
هايبطل العربية او تعمل شياط من السير
تاثيره على سير الباور
اعتقد عندك سير واحد للكباس وطلمبة الباور
فتأثيره انك شيلته فلغيت الباور معاه

و يتغير بكام؟

ثمنه استيراد بس حوالي ٦٠٠:٨٠٠ حسب الحالة والتاجر وتكلفة المشاوير والسير الجديد
غير المصنعيات ١٠٠ وتكلفة الشحن ١٥٠:٢٠٠
لو فيها كباس هاتصرف في حدود متوسط ١٠٠٠
لو فيها كلاتش وطنبوره تقريبا متوسط ٦٠٠
انا رأي كباس استيراد على التجربة افضل

اسف عالاطاله
شكرا

ولا يهمك كلنا اخوات ..عزيزي