ارجو مساعدتكم - حساس الشكمااااااان

[sameh_loza]

السلام عليكم ورحمة الله
مشكلتي هي ان عربيتي بروتون ويرا موديل 2004 وبتأكل بنزين كتير يعني بتعمل 150 كم في الصفيحة وبعد كده كشفت عليها بالكمبيوتر وطلعلي ان حساس الشكمان او الاكسجين فيه عطل وطلب مني الميكانيكي انه يتغيير وبالفعل سألت عليه في التوكيل لاقيته ب 820 جم ومستعمل في الحرفيين ب 250جم وبعدين الميكانيكي قال يفضل انه يكون جديد المهمه بقي انه اقترح عليا تركيب حساس بتاع عربية هيونداي فيرنا وجربنا تركيب حساس مستعمل طلع فعلا يركب بالمقاس وممكن نغير الفيش بتاعتهم .
اية رائيكم في الفكرة دي وهل هايحصل اي لغبطه لو ركبت بتاع الفيرنا وممكن يطير وحدة الكنترول ؟؟.
وبالفعل ركبت عدد اثنين مستعملين بتوع البرتون لقيتهم مش شغالين خالص طبعا بعد وضعهم علي الكمبيوتر.
علي فكرة انا متردد في تركيب حساس الفيرنا اركب ولا مركبش.
ارجو افاتي بسرعة من احلي منتدي.

[samirayad]

يفضل عدم أستخدام بدائل
لأى عنصر فى عملية التحكم
وبالتالى الألتزام بنوع القطعه الأساسيه
عنصر مهم جدا

[sameh127]

لو ينفع يركب مكان الأول يبقي فاضل حاجة واحدة انك تقيس مقاومة الحساس بواسطة افوميتر رقمي و تقيس مقاومة الحساس بتاعك المقاومتين لازم يبقوا زي بعض او متقاربين علشان ينفع يبعت نفس الإشارة او ما يتفق معها لكارتة التحكم. لأن توصيليته للكهرباء بتتغير مع تغير قياس الأوكسجين في العادم

[SAMEH_FOUAD]

اول حاجة انصحك بعدم تركيب بدائل ودة عشان كل عربية وليها نظامها دة غير انك هتضطر تقطع فى فيش العربية ودة كدة تخريب لضفيرة السيارة وبيعيب العربية اصلا فانصحك تجيب واحد مضمون ومش مشكلة السعر بس لما تدفع 200 او 250 جنية احسن من انك تبوظ ضفيرة يتكلف تمنها بالتركيب فوق ال2000 جنية وهاتة استيراد احسن من عربية ونظفة قبل ماتركبة وان شاء الله هيبقى تمام

[M.Mostafa80]

لو ينفع يركب مكان الأول يبقي فاضل حاجة واحدة انك تقيس مقاومة الحساس بواسطة افوميتر رقمي و تقيس مقاومة الحساس بتاعك المقاومتين لازم يبقوا زي بعض او متقاربين علشان ينفع يبعت نفس الإشارة او ما يتفق معها لكارتة التحكم. لأن توصيليته للكهرباء بتتغير مع تغير قياس الأوكسجين في العادم

الكلام دا مهم جدا لأن كل حساس بيبقى ليه نسب مختلفه عن التانيه
أنا كان عندى المشكله دى فى عربيتى بولو 98 عايز اقولك أن العربيه نفسها من نفس النوع والموديل بيبقى ليها أكثر من حساس ودا لأنهم دايما بيبقى فى تطوير للوصول لأفضل نسب الحرق ووظيفه الحساس دا انو بيدى اشاره للكنترول بنسبه البنزين المطلوبه للحرق فا لو ركب حساس تانى مختلف هتلاقيه بردو مأثر معاك فى السحب وفى استهلاك البنزين وهتعتقد أن الحساس اللى انت جبته بايظ
يبقى تعمل أيه تحط العربيه على الجهاز وتشوف الفولتات بتاعت الحساس ده بعينك ولما تجيب الحساس الجديد تحط العربيه بردو على الجهاز وتشوف النتيجه وتبتدى تلاحظ الأستهلاك والسحب وربنا يوفقك

[M.Mostafa80]

يفضل عدم أستخدام بدائل
لأى عنصر فى عملية التحكم
وبالتالى الألتزام بنوع القطعه الأساسيه
عنصر مهم جدا

طبعا كلام لا ينفع يبقى فى خلاف ولا جدال
ولا نقاش حتى

[sameh_loza]

انا بشكركم كلكم علي ردودكم الغالية بس انا فعلا غيرت الحساس بحساس الفيرنا وطلعت فيشة الحساس زي الاصلي بالضبط وبالمقاس وركبتها بالفعل لكن دون تغيير في الاتي :
1. استهلاك البنزين عالي بيعمل 8 كيلو في اللتر.
2. ريحة البنزين الني الغير محترق موجود علي طول سواء العربية باردة او سخن.
3. سحب العربية ضعيف لم التنك البنزين يبقي ناقص شوية و في حالة يكون التنك مليان بيبقي السحب يعني.
4. حساس السرعة برضوا ضبطها عند واحد الله يسمحه اسمه وحيد الكهربائي بتاع توكيل بروتون
5. لمبة الاتشك بتنور عند مؤشر العداد كيلو 130 ولما بسمع صفارة السرعة تعدت 130كم
ملحوظة تم تغيير الاتي : طلمة البنزين اصلية . فلتر النزين الاصلي وفلتر الهواء وطقم السيور كلها واسلاك البوجيهات و البويجهات نفسها وتنظيف الرشاشات اكتر من مرة وعلبة الشكمان للعربية برضوا غيرتوا ب 300 جم

- انا شاكك في الرشاشات ولونها عمرها ما بتغيب في الدوار خالص ,علبة البيئة ممكن تكون مكتومة ومعرفش ممكن تتصلح وعند مين , ممكن كمان يكون بلي العجل الامامي عندي بيصفر وعاوز يتغيير هو السبب , او ممكن الكنترول يونت بتاع العربيه بيخرف .
انا فعلا محتار وهجنن خلاص مش عارف اعمل اية واخر حاجة رحت ضبط العداد وبرضوا نفس المشكلة
اغيثوني يا اصدقائي

[ahmed_h_g]

أنا معايا نفس العربيه وحصلت معايا معظم المشاكل وحلتها الحمد لله
كلمنى وان شاء الله هفيدك
أحمد حلمى
0165229926

[sameh_loza]

احمد باشا اشكرك جدا وجاري الاتصال بحضرتك ولي عظيم الشرف

[ahmed_h_g]

احمد باشا اشكرك جدا وجاري الاتصال بحضرتك ولي عظيم الشرف

شكرا" أستاذ سامح ومستنى مكالمتك .

[reamoz]

طب ياجماعة ليه مايكونش عرض الحلول هنا علشان الناس بردة تستفيد؟

[ahmed_h_g]

حساس البنزين للويرا بيتباع ب 250 جنيه استيراد ومالوش بديل
فايدته ان لما تتم عملية الأحتراق بيخرج غاز ثانى أكيد الكربون فبيمر على الحساس فبيحس بوجود غاز الأكسجين بالعادم
لو لقى غاز الأكسجين يبقى الأحتراق مش مظبوط فبيدى اشاره للكنترول فبينظم أو بيعدل عملية الأحتراق
هوه ده اللى فهمته من موقع أجنبى
لو الحساس ده باظ فطبعا" مفيش اشاره رايحه للكنترول بنسبة الأوكسجين فبينور لمبة الأعطال وبيدى نسبه تقديريه لنفسه علشان ميحصلش خلل فى النظام
وطبعا" مالوش دعوه باستهلاك البنزين أو بيأثر بنسبه بسيطه جدا"
فى بعض السيارات بيأثر على السحب وبيبرجل الموتور فى السلانسيه .
لو فيه أى غلط فى كلامى ياريت التعديل علشان كلنا نستفيد .

[د.محمود صلاح]

اذهب للتوكيل ممكن تكون المشكلة مش عويصة

[sameh_loza]

المشكلة اتحلت معايا خلاص
وهو ان حساس الفيرنا الجديد اللي انا ركبته طلع مش شغال فركبت حساس الجن تو مستعمل من عند ناس محترمة جدا هما محل الراعي بالحرفيين وبالاخص الاستاذ مايكل فعلا راجل محترم جدا وكان متعاون جدا وركبت الحساس عندهم والعربية من اول تدويرة ومن اول لمسه لدواسة البنزين حاجة تانية خالص و جربت بيها وعديت 150 كم ولمبة التشك منورتش خالص وبعدين حطيتها علي الجهاز طلع الحساس شغال زي الفل .
علي فكرة انا جبت عنوان وتليفونات محل الراعي من الاستاذ احمد حلمي وهو عامل موضوع بتجميع كل محلات قطع غيار البروتون بالموقع قسم البروتون.
كل الشكر لموقع نايل موتوز وللمهندس سمير عياد وابو قلب كبير والاستاذ سامح 123 واخيرا الاستاذ احمد حلمي

[ahmed_h_g]

المشكلة اتحلت معايا خلاص
وهو ان حساس الفيرنا الجديد اللي انا ركبته طلع مش شغال فركبت حساس الجن تو مستعمل من عند ناس محترمة جدا هما محل الراعي بالحرفيين وبالاخص الاستاذ مايكل فعلا راجل محترم جدا وكان متعاون جدا وركبت الحساس عندهم والعربية من اول تدويرة ومن اول لمسه لدواسة البنزين حاجة تانية خالص و جربت بيها وعديت 150 كم ولمبة التشك منورتش خالص وبعدين حطيتها علي الجهاز طلع الحساس شغال زي الفل .
علي فكرة انا جبت عنوان وتليفونات محل الراعي من الاستاذ احمد حلمي وهو عامل موضوع بتجميع كل محلات قطع غيار البروتون بالموقع قسم البروتون.
كل الشكر لموقع نايل موتوز وللمهندس سمير عياد وابو قلب كبير والاستاذ سامح 123 واخيرا الاستاذ احمد حلمي

تمام الله ينور عليك والف مبروك عليك الويرا
على فكره العربيه ديه عاشقها .
وبرضه لو عايز أى أستفسار أو أى خدمه كلمنى وأنا تحت أمرك
جبت الحساس بكام ؟