فكرة لعمل عربية من أول الصاج لحد الأوكرة بتاعة الباب

[AMA]

بسم الله الرحمن الرحيم


كتير كنت بفكر كدة لو واحد عمل عربية على أيدة من الأول و جديد بأقل أمكانيات مش شرط تبقى بى ام دبليو يعنى و بكدة هنعمل عربيه مثلا زى فيات 128 بقوة 100% و فى نفس الوقت بسعر أقل :10d5c8~1107:




بس بما أن خبرتى قليلة جدا جدا جدا فى الموضوع دة حبيت أطرحة بينكم فقولت يعنى العربيه أية غير حاجات بسيطة كدة
1- هيكل العربية
2- ماتور العربية
3- العفشة
4- وصلات الكهربا
5- البطارية
6- المكونات الداخليه (كراسى - تابلو و هكذا)




فياريت كدة يا جماعة نفكر فى الموضوع دة شوية بس لو حد لقانى بخرف ولا حاجة مياخدش فى باله أحنا أيام أمتحانات

[adel1212]

انا جااااااااااهز با ريس

[aYaBooY]

و بالنسبة للحكومة العربية رقم شاسيه و رقم موتور و ده طبعا لازم يخرج من شركة معتمدة
و لو مكنوش عملوا كدة مكناش هانغلب احنا مصريين مش هزار
كنت هاتلاقي كل ورشة بتقفل العربيات بالطلب
و ده ممكن يكون موجود كتير في صناعة اللواري بس عربيات الركوب انسي

[ahmedbasto]

ممكن بس نتصرف فى رقم شاسيه والذى منه

[AMA]

يعنى تنفيذ الفكرة ممكنه ؟ دا السؤال الى عايز افهمه بس
بالنسبه للحكومة ممكن الموضوع يتسأل فيه فى المرور بس أكيد هيمشى بالرشاوى و كدة

[د.محمود صلاح]

المزارعين عملوها بمواتير الشفاطات على شاسيه العربيات الكارو الحديد ( للأسف ماعنديش صورة )

[SAMEH_FOUAD]

ماينفعش تغير فى رقم الشاسية او تعمل شاسية وهمى ,لازم يكون الشاسية خارج من الشركة المصنعة واللى عن طريقة بتروح للتوكيل
كل اللى اقدر اسهلك بية العملية انك تشترى سيارة اى كان نوعها عبارة عن هيكل بس يعنى فاضى خالص مافيهوش حتى مسمار واحد ودة ش هيكلفك كتير لو مثلا على 128 اللى انت عايزها ماعتقدش انة هايعدى الالف جنية
وابدأ انت حط الاساسيات وبعد كدة عايز بقى تقوى الهيكل تحطلة دعامات تغير ماتور تغير من شكل السيارة اى حاجة بقى انت عايزها

[Haitham10]

انا بقول تشوف عربيه حوادث ولا خرده ميلزمكش فيها موتور ولا اي حاجه غير شاسيه مظبوط او صاج
وتبدأ تكمل
متحاولش تعمل من الصفر هتعقد نفسك بنفسك
فأبدأ بكام خطوة جاهزة وبعد كدة لما تتعلم هتبدأ تجرب تاني بخطوات اصعب

[AMA]

د محمود صلاح بصراحه كلامك عجبنى جدا و الفكرة أكيد العالم كله نفذها لكن الى مستغربة ان ليه فى مصر محدش عملها و يتهئ لى أنا كدة فهمت الحقيقة الجميله بتاعة بلدنا

والله يا سمسم تسلم أيدك على الرد العزيز دة و فكرة جميله جدا برضة و أقتراح جميل منك والله

و بصراحه يا أستاذ هيثم دماغك عجبتنى فى الفكرة دى برضة و دى بصراحة تعتبر أكتر فكرة كويسة بس لو عربية حوادث أكيد هيبقى الصاج بتاعها مهما ترده هيبقى ضعيف جدا



على العموم منتظرين الردود و الأقتراحات و لو جه فى دماغى حاجة هقولكم

[medo_love_470]

السلام عليكم
يا جماعة عندى مشكلة كبيرة جدا واحترت فيها انا معايا عربية نوبيرا 2005 والموتور بتاعها خفيف يعنى لما بمشى بيها مثلا 140 او 160 الموتور بيجيب زيت على الكابلات ولازم اغير جوان موتور الموضوع دا اتعمل معايا مرتين او 3 والميكانيكى قالى المكنة خفيفة فا حطتطلها زيت شمبر فية ناس بتقول كويس فية ناس بتقول لا غلط ياريت حد يقولى على الحل واكون شاااااااااااااااكر جدا ليكم
medo_love_470@hotmail.com

[misoalex]

مش لازم عربيه حوادث دور على عربيه قديمه شاسيه يكون شديد ويستحمل وانت تبنى عليه كل الى انت عاوزه
بس الموضوع مكلف مش رخيص زى منت فاكر
لان شراء كل وحده لوحدها مكلف
يعنى مثلا ابسط حاجه العربيه السيات تمنها دلوقتى تفريبا 3000 جنيه لو حبيت تجمعها الموتور والفتيس بس حيعملو ال 3000 جنيه استعمال شوف انت بقى باقى الاجزاء العقشه بس حتعمل 1000 جنيه بطاريه وحبه حاجات فى الكهرباء حتعمل 1000 جنيه صالون 500 جنيه تابلوه 200 جنيه كاوتش وجنوط 500 جنيه
اصبح المجموغ 6200 وده لسه حاجات تانيه كبالن وحاجات كتير
مع الاخذ فى الاعتبار ان الجاجات الى تم ذكرها منها استعمال بحاله جيده ومنها جديد
يبقى ايه رأيك فى التجميع ولا تشترى واحده جاهزه حالتها نضييييييفه ب 4000 او حتى 5000 وفكها وجمعها على مزااااجك وعدل كل حاجه مش عاجباك فيها وخليها بى ام كمان

[misoalex]

السلام عليكم
يا جماعة عندى مشكلة كبيرة جدا واحترت فيها انا معايا عربية نوبيرا 2005 والموتور بتاعها خفيف يعنى لما بمشى بيها مثلا 140 او 160 الموتور بيجيب زيت على الكابلات ولازم اغير جوان موتور الموضوع دا اتعمل معايا مرتين او 3 والميكانيكى قالى المكنة خفيفة فا حطتطلها زيت شمبر فية ناس بتقول كويس فية ناس بتقول لا غلط ياريت حد يقولى على الحل واكون شاااااااااااااااكر جدا ليكم
medo_love_470@hotmail.com

واضح ان حضرتك جديد معانا
بس ياريت تعمل موضوع لوحدك فى قسم الورشه والناس الى حتشوفه حترد عليك لكن ياريت متحطش موضوع داخل موضوع تانى خاص بأى حد

[Haitham10]

ياجماعه القصد من الموضوع مش بس التكاليف انت كلامك صح يا ميسو

انا فمرة شفت عند سمكري عربيه معرفتهاش بجد حاطط ربع امامي اكسنت علي مااعتقد باقي من ورا فليشيا الهاتش باك دي وكانت مظبوطة جدا فبقوله ايه دي قالي دي التسليه بتاعتي لما بكون فاضى عشان مستحيل هشتري عربيه جديدة . وبس متكلمتش معاه تاني فضلت اتفرج عليها استعجبت كانت مظبوطة اوي بجد ناقصها موتور وصالون وشكرا.

عموما المقصود ان يكون في تعليم ازاي الحاجة دي تتعمل مش ازاي تتركب او تتعدل لانه سهل جدا زي ما بنشوف حتي في برامج التعديلات علي التلفزيون بيجيبو اي عربيه حتي لو زيرو ويبدأو يلعبوا فيها بالكامل صاج وموتور وكاوتش وعفشه وصالون حتي لو كل دة هيتشال
الكلام دة بالنسبالهم سهل وحتي لو بتلاحظوا هتلاقوا الفاتورة في الاخر بتطلع بارقام فلكيه اوي دة غير تمن العربيه الاصليه .. فبلاش نعقد نفسينا للمرحله دي
انا عاجبني ان في واحد بيفكر وعنده النيه بجد من جواه فنقطة معينة فعشان كدة نصحته باللي انا ممكن افكر فيه بصراحة وهو انه يشوف عربيه مش مهم هيه ايه ولا حالتها ايه المهم تكون شاسيه مظبوط وصاج مظبوط مش مهم الرفارف والاكصدامات حتي لانه هيعملها بمزاجها بعدين
ممكن يجيب هوندا سيفيك ويسقط فيها موتور ويغير صالون وعفشه واكصدامات وهتبقي عربيه تانية ! معتقدش هو عايز النتيجة دى

كمل يا ميسو معانا متفهمنيش غلط يلا انا متابع معاكو انا بحب التفكير اكتر من التنفيذ عشان لما الواحد يفكر كتير ويخطط بيلاقي التنفيذ سهل حسب النية والارادة
وانا كنت اتمني ان يكون عندي جراج او حاجة زي كدة اقدر اخترع فيها براحتي ولا حتي اعمل اي حاجه فعربيه جواه لاني بحب اشتغل بايدي في اي حاجه وخصوصا ان في حاجات كتير ممكن الواحد يتعلمها لنفسه احسن واضمن بكتير من ناس تانية واخداها بالشبه كدة بركاوي وبياخدو فلوس وبينصبوا كمان فيها ..