الحقوني بسرعه مش لاقي بنزين 95 اعمل ايه

[naser_56]

السلام عليكم

زي العنوان بالظبط اشتريت موتوسيكل سوزوكي 2008 ومعدل الانضغاط عالي 12.8.1 وفهمت انه اي بنزين اقل من 95 الماكينه هتسقف وممكن يحصلها مشاكل مستقبلا وفي ناس قالت انه البوسيتيف بور هيحل المشكله وبعد تصفح المنتدي عرفت ان ال postivie power ده بس لتنضيف الرشاشات ايه الحل علما انه مفيش حتي بنزين 92 قريب مني واغلب المتوفر بنزين 90 وبنزين 80 ايه رأيكم اعمل ايه اعبي 90 واحط بوستيف بور ولا الحل ايه ارجو الرد للاهميه

[thedeveloper87]

المشكلة ياباشا إن بنزين ال 95 خراب بيوت واللتر ب 2.75 جنيه...
أنا لي واحد صاحبي معاه سيفيك المفروض يحطلها بنزين 95 بيحط بنزين 92 وماشية عادي خالص...

على العموم الماكنة بتسقف في والأوكتين القليل لما بتقرص عليها.. امشي عادي خالص...

انتظر برضه رد الخبراء....

[aymansaad]

انت ساكن فين ومتخفش اعضاء المنتدى حيدلك الى اقرب بنزينة تمون منها

[tutankhamoun]

هاتحط بنزين 90 عادي ........... و تزود رافع الأوكتان ......... مش منظف رشاشات .
ده غالبا بيكون متوفر في البنزينات النظيفة ............
و لازم يكون مكتوب عليه
octane booster

و للآسف أغلب المنتجات دي صناعة أمريكية صهيونية ملعونة ........... و لكن أنت مُضطر .

علبة رافع الأوكتان دي ثمنها بيكون من 25 إلى 40 جنيه حسب الشركة المنتجة و حسب درجة المفعول .

[naser_56]

الف شكر لكل من كلف نفسه بالرد والف شكر اخي توت عنخ وفعلا كلامك هو المضبوط ( عملنا بتوقيعك وكتبناها مضبوط هههههه )
وكويس انه فيه محسنات او رافع للاوكتين بس ان شاء الله الاقيه متوفر هنا او احاول اجيب معاي كرتونه من الكويت لما اسافر وارجع ان شاء الله

[zoro007]

ربنا معاك فعلا البنزين ال 95 دا مشكله كبيره فى كل حاجه

بس سؤال انته مبتجمدش وانتا سايق الموتوسكل :]

[naser_56]

ربنا معاك فعلا البنزين ال 95 دا مشكله كبيره فى كل حاجه

بس سؤال انته مبتجمدش وانتا سايق الموتوسكل :]

بصراحه بتجمد وخصوصا اني مولود في الصيف وبكره البرد لدرجه اني بكون تحن البطانيه وبكون بردان ههههههههههههههه لكن تقول ايه في حب الموتسيكلات ؟ عموما انا بحب سواقته في الصيف اما الشتاء بيكون طلوعي بيه قليل خالص وبكون لابس كويس منه سيفتي ومنه علشان البرد

[Ahmed Hassan]

خلي بالك ان ال octane booster مش حل نهائي و على فكره هوه بيحسن خواص البنزين... بس مش بيرفع رقم الاوكتان فعلا، يعني خليه حل مؤقت و متشدش بالموتسيكل و انت حاطط منه. انت ساكن فين؟ انا شايف ان بنزين ٩٥ منتشر في القاهره في اماكن كتير جدا (محطتين توتال قبل و بعد العبور، محطة سيل في الجهة الاخرى من الطريق، محطة كالتكس بعد التجديد على اول الاوتوستراد من ناحية المطار، مصر للبترول اول عباس العقاد و محطات موبيل في النزهة الجديده و صلاح سالم) دول اللي انا فاكرهم بس و اكيد فيه اماكن تانيه كتير.

عموما لو انت بعيد عن البنزين ال ٩٥ اشتري جركن (مخصص للبنزين بيكون حديد) ٢٠ لتر موجود في on the run و املاه و انت معاك عربيه و خليه عندك في الجراج او البلكونه و غطيه و استعمله لما ميكونش في ٩٥ جنبك.

مش انت بتحب الموتوسيكلات! استحمل بقى :)

[ahmedxyx]

علبة رافع الأوكتان دي ثمنها بيكون من 25 إلى 40 جنيه حسب الشركة المنتجة و حسب درجة المفعول .

!!!!!!!!

[naser_56]

المشكله ساكن بالصعيد <<<<< صعيدي واتهور بقه واقرب بنزينه علي بعد كيلو والمتوفر فيها فقط بنزين 90 اما بنزين 92 وهوالي ماشي بيه حاليا علي بعد حوالي 30 كيلو يلا بقه استحمل وامري لله اما 95 انسي ولكن عموما ال 92 ممشي الحال معاي ومفيش تسقيف بالمكنه والحمد لله شكلي بمشيها 92 والي يحصل يحصل

[HeMa_LanCeR]

المشكله ساكن بالصعيد <<<<< صعيدي واتهور بقه واقرب بنزينه علي بعد كيلو والمتوفر فيها فقط بنزين 90 اما بنزين 92 وهوالي ماشي بيه حاليا علي بعد حوالي 30 كيلو يلا بقه استحمل وامري لله اما 95 انسي ولكن عموما ال 92 ممشي الحال معاي ومفيش تسقيف بالمكنه والحمد لله شكلي بمشيها 92 والي يحصل يحصل

نفس حوار اخويا بس هو بيروح مصر الجديده يمون ويرجع
بس انت الحمد لله انها شغاله معاك بال 92
علشان هو المكنه بتتعفرت لو حط 92
هي مكنتك نوعها ايه والمحرك قد ايه؟

[BODAAA]

مشيها 80 دة موتوسيكككككككككككككلللللللللللللل

[Ahmed Hassan]

المشكله ساكن بالصعيد <<<<< صعيدي واتهور بقه واقرب بنزينه علي بعد كيلو والمتوفر فيها فقط بنزين 90 اما بنزين 92 وهوالي ماشي بيه حاليا علي بعد حوالي 30 كيلو يلا بقه استحمل وامري لله اما 95 انسي ولكن عموما ال 92 ممشي الحال معاي ومفيش تسقيف بالمكنه والحمد لله شكلي بمشيها 92 والي يحصل يحصل

لا!! انت كده مش هينفع معاك جركن ٢٠ لتر... ده انت محتاج عربيه تانك

ربنا يعينك و يعين الموتوسيكل على اللي هيتعمل فيه

[naser_56]

نفس حوار اخويا بس هو بيروح مصر الجديده يمون ويرجع
بس انت الحمد لله انها شغاله معاك بال 92
علشان هو المكنه بتتعفرت لو حط 92
هي مكنتك نوعها ايه والمحرك قد ايه؟

suzuki gsxr 600 cc 2008

[naser_56]

لا!! انت كده مش هينفع معاك جركن ٢٠ لتر... ده انت محتاج عربيه تانك :o_stupid[1]:

ربنا يعينك و يعين الموتوسيكل على اللي هيتعمل فيه :b4_611:

هههههههههههههه تصدق جه في بالي موضوع التانك ده

مش قلتلك صعيدي واتهور

خليه كده موتسيكل بدون بنزين