الزجاج الأمامي أتكسر أغيروا ولا أحول أصلحوا

[Mohamed.Kader]

السلام عليكم
أنبارح وأنا خارج من شارع الهرم ونازل نفق نصر الدين كان في حادثة صغيرة على الشمال خالص المهم طلعت منهم يمين ومكامل مفيش مترين و تقريبا تحت كوبري القطر والمترو بالظبط سمعت أنفجار جامد ناحية اليمين أبص لقيت الأزاز شرخ الجانب اليمين كلوا (نص البرابريز) بس مركز الصدمة غائر من برة وبارز جوا العربية ووقع شوية أزاز ناعم من الجوة كنت عاوز أخد رأيكم أغيروا ولا ممكن حد يصلح الكلام دا(كمية الشروخ الكتيرة) لو أخذت فالأعتبار أن البرابريز الأمامي عندي 400 جنية من د/جريش
وشكرا

[mahmoud_magdy]

قدر الله وما شاء فعل
المهم انك بخير
( دكتور خالد ) دا المفروض انه بيصلح الشروخ اللي في الزجاج والتكلفه بتكون عاليه (سمعت عنه كتير هنا في المنتدى) طبعا لو حسيت ان تكلفة الاصلاح غاليه مقارنه بالزجاج الجديد يبقى هات جديد احسن
انا هبعتلك تليفونه على الخاص

[iBiZa]

الشرخ الواحد بيكلف من 50 الى 80 جنية.

يبقى تغير الزجاج احسن و ارخص.

[Kazzaz]

يا جماعه الناس دي بتصلح اي شرخ ؟؟ حتي لو قعد فتره كبيره ؟

[Michael_Lanos]

الجديد جديد برده مهما يتصلح

[N.a.j.d]

مدام بتصلح بلاش تغيره عشان دا اصلي ولما تغيره استحاله يكون ماسك اوي زي تقفله الشركه
دا رايي

[shankosi]

التصليح للنقر والشروخ السطحية فقط

من الوصف اللي حضرتك بقوله ده لا اعتقد ان التصليح ينفع

غير البربريز وده كمان حيكون امان ليك اكتر لأن كده البربريز وضعه خطير على اللي راكب وممكن مع اي مطب الزجاج المهشم يؤذي العينين

وعوضك على الله

[semsem_uno]

بص هو اللي انا عرفتو ان الأصلاح بيبقي للشروخ الخفيفة و كمان الجديد هيبقي اوفرلك بس نصيحة حاول تجيب ازاز عربيتك استيراد او مخلوع من عربية زي بتاعتك يكون سليم لو لقيت لأن ازاز الفبريكة مش زي الأزاز اللي بيتباع عند بتوع الأزاز و كمان بيبقي اامن و حمد الله علي سلامتك و الأهم ان مفيش حاجة حصلتلك :)

[sherif_habeb]

غير ياعم وهات جديد احسن

[SAMEH_FOUAD]

جديد استيراد لائما التوكيل ولو مش لاقى هات الازاز السعودى كويس

[Mohamed.Kader]

السلام عليكم
ألف شكر يا جماعة على أرائكم بس فعلا أنا بصيت للبرابريز وقلت مستحيل يتلحم أو يتصلح يأما هدفع أد ثمن الجديد 60 مرة ودي تجربتي فالتغيير عند د/جريش على فكرة ندهم كل الزجاج لمختلف العربيات
التجربة دي عن عربيتي البروتون GEN2 مصنع د/جريش في العاشر من رمضان
نظام جميل فالإستقبال العربيات وترتيبها تحت مظلات
تأخد رقم المظلة وتتدخل الإدارة تبلغهم رقمها ونوع عربيتك وأية الإزاز اللي عايزوا وأسمك وهوا يقولك تتدفع كام (جين 2 دفعت 370 جنية-والأوبل كورسا دفع 290 جنية) وبعد كدا قاللي أستنى جنب عربيتك
فعلا بعدها بعشر دقايق جت عربية سوزوكي صغيرة عليا كذا برابريز منهم بتاعي وبتاع صاحبي كل برابريز علية أستكر مكتوب علية أسم العميل ووقت الدفع ورقم المظلة ونوع الإزاز والعربية
حطوا الأزاز على أستاند موجود أمام كل باكية للتجهيز
وفعلا بدأ فني لكل باكية يفك الأزاز المكسور(عملية سهلة مش محتاجة فك أي حاجة من جوا بكاتر بيقطع الزق اللي ماسك الأزاز اللي كان راكب عندي كان راكب بسيليكون أبيض زبالة) المهم فكوا الأزاز المكسور ونضف الفريم بتاع تركيب الأزاز من الزق القديم وقام جايب اللزق بتاعهم(سيكا فليكس مادة سودا كدا ذي السيليكون بس أنضف بكتير وفعالة أكتر مش موجودة عند ناس كتير برة هي دي فايدة المشوار) المهم فضا الأنبوبة كلها حوالين المكان اللي هينام علية الأزاز وقام 2 فنين لفوا الجوان حولين الأزاز برة وجابواه سقطوا مكانوا وقاموا ملزقين بلزق عادي علشان يمسك مع العربية ونضفوا الأماكن اللي فاضت فيها السيكا من تحت الأزاز وبقا كلوا تمام ووصوني ممسحش الإزاز ولا أجيب عندوا ماية
الأستفادة من الموضوع
*الناس عند جريش كمصنع إزاز معندهمش عدة تعتبر لتركيب الأزاز كلوا مانيوال
*مفيش حاجة بتتفك وبترجع ذي ماكانت الفيبرة اللي تحت الأزاز وعند المساحات عليت حوالي 1:2 مم
*السيكا فليكس بعد التركيب فاضت من جوا وجت على حتت كدا مت الفرش اللي حولين البرابريز من جوا إن كانت فيبرة القايم أو فرش السقف
*البرابريز اللي عندهم من غير شماسة(الجزء الغامق اللي فوق المراية) على عكس اللي كان راكب كان فية
*طبعا هدية من أيد العامل على الكرسي لحسة سيكابس راجل غلبان هالوم علية أقلوا أية يعني.
*مشوار محترم من الهرم للعاشر 85 كم رايح و زيهم راجع
*الراجل قاللي أمشي بية عادي بعد التركيب مباشرة بس أنا مرضيتش وقفت فالشمس حواللي 3/4 ساعة وأخدت الطريق على مهلي شوية
*البرتون قطع غيارها أليمة حتى الأزاز
*العربية عامة كويسة جدا لو مفيهاش مشاكل لكن أي حاجة بتظهر فيها بتكون وجع قلب
*محدش ياخد قرار فتصليح حاجة فالعربية وقتي وهوا قلقان أو متعصب خد وقتك فالتفكير علشان منتروقش خاصة أن اللي في أديهم العربية معدودين(الصنايعية ومحلات قطع الغيار)
كان في واحد في ش شهاب المهندسين مشهور لقيتوا عندوا بـ 400 جنية بس كنت نويت أروح العاشر
أسف للإطالة بس حبيت أنقلكم التجربة تماما كما هي