مشكلة كبيرة في الفيرنا بس محدش يضحك

[Mina francis]

أول حاجة بمسي على كل أعضاء أحلى منتدى في مصر.
وبعدين نبدأ القصة أنا معايا فيرنا 1500 وكنت مسافر من أسبوعين وقبل مسافر روحت مزود زيت باكم في قربة زيت الباور وأمبارح لاحظت صوت غريب عند لف الدريكسيون فواحد صحبي قالي زود زيت الباور فقولتلة فين القربة بتاعتة فقالي أنها ألي فوق قربة المية وساعتها عرفت أن أنا زودت زيت باكم مكان الباور و أنا راكن العربية تحت البيت ومش عارف أعمل أية .

[samirayad]

و أنا راكن العربية تحت البيت ومش عارف أعمل أية

لو تعرف تتصرف مع تفريغ دايرة الباور

حتنزل زيت دايرة الباور المختلط على زيت فرامل كله
وتبدأ تحط زيت باور جديد وخيرا أن شاء الله

لو مش حتعرف

أستعين بميكانيكى جنبك وأديله اللى فيه النصيب

[Mina francis]

شكرا على الرد السريع.
بس هو التفريغ أني أفضي قربة الباور ولا الموضوع أكبر من كدة.
ومعلش هو الموضوع دة ممكن يكون أثر على حاجة في العربية ولا الموضوع دة عادي .
أصلها بصراحة عربية الوالد ولو عرف أو حس بحاجة في العربية

[samirayad]

بس هو التفريغ أني أفضي قربة الباور ولا الموضوع أكبر من كدة

لا حتفضى كل الزيت اللى فى الخطوط برضه

علشان تضمن التخلص من أى خلط بين زيت باور وزيت فرامل

ومعلش هو الموضوع دة ممكن يكون أثر على حاجة في العربية ولا الموضوع دة عادي

لا هو مش عادى

ومش حيكون أثر على شىء أن شاء الله

حتلاقى بس مفيش أنسجام بين زيت الباور وزيت الفرامل
وده اللى عاملك شوية قلق

أصلها بصراحة عربية الوالد ولو عرف أو حس بحاجة في العربية

زى ما لعبكتها من وراه

حلها من وراه
ويادار مدخلك شر

[Mina francis]

شكرا ليك ولطرقتك السهلة في التوضيح أنا هعمل ألي أنت قولت علية
وربنا يستر .

[aymansaad]

الله على ردودك يا بشمهندس/ سمير

[samirayad]

الله يخليك
يا أستاذ / أيمن

[Ahmed Galal]

شكرا على الرد السريع.
بس هو التفريغ أني أفضي قربة الباور ولا الموضوع أكبر من كدة.
ومعلش هو الموضوع دة ممكن يكون أثر على حاجة في العربية ولا الموضوع دة عادي .
أصلها بصراحة عربية الوالد ولو عرف أو حس بحاجة في العربية

طبعا كل زيت منهم مختلف خالص عن التانى المشكلة ان زيت البكم ده ممكن ياثر على الكوتشات بتاعت البور ستيرنج و ياكلها و يخلى العلبة تسرب و لو عايز تختبر ازيته هات حاجة مدهونة مش العربية طبعا و امسح بيه عليها بحتة هاتلاقيه بياكل الدهان فانت نزله فورا و قدامك حلين لتنزيل زيت الباور

1-حل مش محتاج ميكانيكا هاتفتح علبة زيت الباور و هاتجيب حقنة كبيرة زى اللى بيدوها للى ما بيشربوش اللبن الصبح هاتشيل منها الابرة و تدنك تشد الزيت و ترمى لغاية ما تفضيها لقرب الاخر كده و تدور العربية و حد يلف لك الدركسيون يمين و شمال لغاية ما الزيت يطلع كله و ما تقعدش كتير شوية و تطفى و تملى زيت و ترجع تدور و تلف العجل شوية عشان الزيت اللى انت حطيته يلف فى العلبة بتاعت الدركسيون و بعدين افتح تانى الخزان و كرر موضوع الحقنة و فضى كانك بتعمل غسيل للدورة مرتين تلاتة كده لغاية ما يظهرلك زيت الباور نضيف انت اشتريلك علبتين تلاتة زيت باور تنضف و تملى بيهم

2-الحل التانى محتاج تشغل الميكانيكا شوية و نتيجته احسن من الاول هاتشوف طرمبة الباور فين هاتلاقى فيها خرطومين واحد بتسحب منه من الخزان وواحد رايح على العلبة هاتفك اللى رايح على العلبة من ناحية الطرمبة و تدور العربية الطرمبة هاتدنها تضخ زيت الباور كله لغاية ما تبدتى تنقط اقفل الموتور عشان ما تحرقهاش و اربط الخرطوم املى زيت تانى و عيد لغاية ما تنضف الخط

و ديه فيديوه للحل التانى
YouTube - Draining power steering fluid. (Nissan sentra)

و ان شاء الله خير

[A7MED_PHARMA]

اختلاف كثافة الزيوت عن بعض ..هيمنع إختلاطهم بشكل فاعل
وتسمع كلام الشباب
وتفرغ الزيت إلي إنت حطيته...وتملاه تاني
وقول يارب مايكون حصل حاجة..

فكرتني بأول مرة ركبت عربية
مكنتش عارف تنك البنزين منين؟؟؟

[Mina francis]

شكرا لكل ألي ساعدني برأية وبجد مع أني زعلان من ألي حصل في العربية بس فرحان عشان عرفت ناس بتساعد بعض بجد زي الناس ألي في نايل موتورز.

[tarekmomo]

عك خرطوم القربة ونزل الزيت منة ونضف القربة وحط زيت باور تانى

[tarekmomo]

فك خرطوم القربة وفضى الزيت منة ونضف القربة وبعدين حط زيت الباور

[Mina francis]

الحمد لله عملت ألي أنتوا قلتولي علية النهاردة
روحت للميكانيكي وفضى القربة وملاها تاني والدنيا بقت كويسة
وشكرا على مساعدتكم ليا.

[د.محمود صلاح]

الحمد لله انها جت على كده والباور ما خربش