زيت الأكل ينفع ولا انا عكيت الدنيا

[mah_almasry]

معلش اخواني الافاضل انا لسه جديد وبتعلم . رحت عند العربية لقيت فردة كاوتش نايمة . اتشمللت وقلت هغير الاستبن بنفسي علشان اتعلم . فتحت الشنطة لقيت كوريك مصدي وطالع عين اهله . طقت في دماغي اخده البيت وأزيته . وحطيت عليه زيت اكل عادي وحسيت انه فك شوية . بس بعد كده قلت ايه ده . اوعي يكون زيت الاكل غلط والكوريك ينعم وياخد العربية وينزل فجأة وهي مرفوعة . ولا عادي ولا ايه . وبعد كده مسحته بفوطة العربية علشان تبئي زفره وتنضف التراب كويس . هو انا كده عكيت او الكوريك غلط استعمله . افيدوني زادكم الله علما

[khaled_sabry]

عادي ماتخفشي حتي لو زيت الكوريك مافيهوش حاجه
بس تزيته بزيت الاكل .... دي الغلط بقي
لآن يتهيآلي زيت الاكل بيلبك و بيبقي لازق في بعضه و بيلم تراب و قرف تاني و بعد فتره حيبقي الكوريك اسواء من الاول
الافضل انك تشتري اسبراي wd 40 بعشرين جنيه
ده اسبراي بينظف و بيشيل الصدا و بيزيت اي حاجه معدن و هو ممتاز عن تجربه شخصيه
بس ماتستخدمهوش علي اي حاجه كاوتش

[mah_almasry]

شكرا لردك السريع

شكرا يا غالي وهشتري ان شاء الله . بس المشكلة انا زيته خلاص . ربنا يستر ومش يكون باظ مني

[3ateef]

اهم حاجة متحطش زيت الاكل فى الموتور.....

[hesham22822]

اعصر لمونة وما يهمكش هههههه.

[romeo_6887]

اهم حاجة متحطش زيت الاكل فى الموتور.....

لسه كنت هقول كده برضه

[mah_almasry]

اعصر لمونة وما يهمكش .

ههههههههههههههههه

لا اعتقد اللمون ده مع الفول بالزيت . مش الكوريك بالزيت

[Eng_Mostafa_89]

هو زيت الاكل عيبة انة هيلزق وهيلم تراب وكمان هيعمل ريحة وحشة
ابقى زيتة بزيت موتور وخلاص هيؤدى الغرض

[Ahmed Galal]

لو من النوع اللى فيه قلاووظ و بيلف شحم القلاووظ ده بشحم اسمه الأهلية حتة صغيرة و تدنك تلف لغاية ما يمشى على القلاووظ كله و طبعا زيت الاكل ده مش تمام

[Karim_Mohy]

اعصر لمونة وما يهمكش هههههه.

ههههههههههههههههههههههههههههههه

[Karim_Mohy]

الي صاحب الموضوع .........الرجاء عدم استخدام هذا الزيت مرة تانية ...........ويفضل استخدام السمن البلدي ههههههههههههههههههههههه



بهرج معاااك..........علي فكرة من عنوان الموضوع فكرتك هاتسال ينفع زيت اكل في الموتور.........ههههههه

ع العموم حصل خير وماتقلقش

[SAMEH_FOUAD]

فكرتنى بفيلم بلية لما جابولة زيت طعام بدل زيت ماتور ولما اكتشف دة
قالهم هو انا بصلح طبق فول ياولاد التيت
ياباشا كل حاجة وليها استخداماتها ياعنى اينفعش تفك حبة صدأ بزيت كريستال مثلا لأ لية مزيل الصدأ wd-40 ولو مالقيتش شوية زيت باكم الخاص بالفرامل
المهم عشان تشيل اللى انت عملتة دة هات wd-40 ورشة على كل الاجزاء الميكانيكة فى الكوريك وسيبهم براحتهم خالص وبعد كدة حركة بايدك عشان يمشى فى الاماكن الصعب الوصول اليها

[thegoodhacker]

. وحطيت عليه زيت اكل عادي وحسيت انه فك شوية . بس بعد كده قلت ايه ده . اوعي يكون زيت الاكل غلط والكوريك ينعم وياخد العربية وينزل فجأة وهي مرفوعة . ولا عادي ولا ايه .

لا ما تقلقش خالص من ناحية ان الكوريك ينعم بالعكس اعتقد ان زيت الاكل تاثيره ضعيف خالص نتيجة لانخفاض لزوجته بالنسبة لزيت الماكينات....
وزي ما الزملاء نصحوك افضل شيء لتزييت المفصلات والتروس الصغيرة اللي ممكن تكون قافشة او بتزيق انك ترش عليها اسبراي wd40 ....

[khaled_sabry]

شكرا يا غالي وهشتري ان شاء الله . بس المشكلة انا زيته خلاص . ربنا يستر ومش يكون باظ مني

كده كده لو رشيت عليه wd 40 ده بينظفه كويس من الصداء و من الزيت بتاعك و هو بيزيته كويس بس زيت بجد مش زيت اونيل

[hemalotfy]

او حل اسرع

حط عليه شوية بنزين ونظفة من الزيت ده خالص وبعد كده حتة شحم صغيرين هيزبطوه بس لو رشيت الاسبري هيبقى افضل