سؤال عاجل بخصوص فرامل اليد

[original]

أعتقد إن مشاكلك هي :
1- تيل الفرامل وده من غير ماتفكر التوكيل بيكشفلك على فرامل اليد وقوتها وبيشدهالك لو محتاجه تتشد وبترجع زى الأول ولو محتاجه تتغير هوا بيعرف من المسمار اللى بيشدها بيه عشان بيبأا مقياس لتآكل الفرامل ولما بيوصل لحد معين بيبأا معروف إنها لازم تتغير
وبعدين لما بيشدلك فرامل اليد يعنى بيشدلك الفرامل الخلفيه بيرجعلك ضغط الفرامل قوى زى ما إشترتها جديده حتى لو متآكله شويه
2- البلى بتاع الطنابير الخلفيه بيبأا عليه شحم ومكبوس بغطاء حديد ولما تيل الفرامل بيسخن الطنابير جامد بحراره عاليه بيحصل إن الشحم بيسيح وبيفقد جزء من خصائصه وده هوا اللى ممكن يكون مشكله عشان هيقلل عمر رولمان البلى الخلفى وهتسمع صوت خشونه من العجل
بس ماتقلقش لأنه مش بسهوله بيحصل بس إتأكد إن مفيش شحم سايح نزل من العجل الخلفى
3- الموتور مش هيتأثر بس ممكن إسطوانة الدبرياج عشان هيا دى اللى بيبأا عليها الحمل لما بتشد حاجه

[original]

ممكن بستم الفرامل الخلفى فى كل عجله يكون سخن وبالتالى زيت الفرامل بداخله لذلك يفضل إنك تغير زيت الفرامل لأنه بيكون له لزوجه بتحافظ على الأجزاء الهيدروليكيه للفرامل بس يكون زيت أصلى أو ألمانى

[hazim2008]

على فكرة احب اقول لسيادتك اولا متزعلش المدام ثانيا والاهم اول ماتعلمت القياده نسيت فرامل اليد ومشيت بيها 3 كيلو بحلهم وكانوا الناس يحذروننى من الشياط المنبعث من الطنابير الخلفيه دون الالتفات اليهم المهم انى لقيت فعلا لما نزلت ريحة شياط وكأن فرش السيارة يحترق وفرامل اليد والقدم غير فعالين مع زئير بسيط فى فرامل القدم وبالكشف تبين ان فرامل اليد تحتاج الى رجلاش اى تنظيف فرامل وتظبيط وده تمنه مش كتير حوالى 35 جنيه مصرى فى التوكيل وبره حوالى 15 او 20 وخليه يبصلك برده على التيل

[Karim_Monir]

عفوا لتاخري في الرد
الافضل تبلغ المهندس وتوكيل هوندا ناس محترمة فوق الوصف
التيل ده يقعد كتير قوي بس بلغهم الافضل سواء تظبيط او تغيير وان شاء الرحمن بسيطة قوي بس زيادة اطمئنان يعني

[ahmedezzat78]

يا جماعة انا مش عارف انتم عاملين وهم للراجل ليه؟

يا استاذ بودى 1.5 كم دول ولا حاجه بالنسبه للفرامل او الموتور او اسطوانى الدبرياج او البلى و الموضوع بسيط جدا و يتلخص فى:

• بعض التوكيلات بتغير زيت عند 1000الأولى و البعض الاخر عند 5000 شوف حضرتك توكيل هوندا بيعمل ايه و اعمل عادى جدا جدا ما فيش اى مشكله لان العربيات الجديده دلوقتى مش محتاجه تلين قوى بالمعنى بتاع زمان لان الموتور بيبقى شبه متلين جاهز و الا كان المفروض ان السرعة لاتتعدى 60خلال اول 5000 كم لكن المهم ان rpm مايعديش 3000 او 3500 بالكتير
• حضرتك تشوف فرامل اليد لو اصبحت بتمسك فوق المستوى اللى كانت عليه سنه او سنتين ابقى خليهم يرجلشو فرامل اليد فى صيانه الالف و قولهم فرامل اليد عاليه شويه و عايز اوطيها و بالتالى هتحس ان فرامل الرجل اصبحت اعلى او اقوى شوية
• خد بالك من جميع لمبات التحذير فى المستقبل
• انا عارف ان دايما بيبقى فيه نوع من انواع الوسوسه و الحمبله لما الواحد بيكون جايب عربيه جديده عشان بيبقى خايف عليها قوى ......... بس بلاش تدى الموضوع اكبر من حجمه .... دى حاجه عاديه جدا بتحصل كتير ما فيش مشاكل وعشان تطمئن اكتر اسال اى ميكانيكى بره لكن لو قولتلهم فى التوكيل اكيد هيغيروولك التيل الخلفى عشان يشتغلو لان التيل من الاجزاء المستهلكه و بيكون خارج الضمان فى اى توكيل

شوفت بقى .......... نسيت اقولك الف مبروك على العربيه ..... الهوندا عربيه اكثر من ممتازه و ربنا يحميها و يديك خيرها و يكفيك شرها

[حاتم سليم]

عزيزى bodi

المهندس كريم منير
و المهندس احمد عزت

قالوا الكلام المظبوط

روح للتوكيل و اخبرهم بما حدث
و اللى يقولوا عليه اعمله
و اسألهم كل الاسئلة اللى انت عايزها

انت كده حترتاح و تتأكد
ان عربيتك بأذن الله زى الفل

و مبروك الف مبروك

بس ابقى شوف الرجاله ...