ريحة شياط

[MOK3336]

السلام عليكم و رحمة الله و بركاتة
يا رجالة و الله أنا نفسيتى زى الزفت
أنهرده و أنا بتمشي بالعربية مشيت حوالي ساعه ونص و في الفترة دي كنت مشغل الكاسيت و معلي الصوت شوية و فجأة و أنا بركن شميت ريحة كأن بلاستيك بيسيح
فهل ده طبيعي ولا إية
للمعلومات ( العربية نيسان صني 2010 لسة مكملتش 200ك )
و الله و الله قرفت ( مش عارف أتهني بيها )
أول يوم أتخبطت مني
ثاني يوم شكيت في عداد الرحله
ثالث يوم شميت ريحة شياط بلاستيك
و الله أعلم بقي إية هيحصل تاني
ربنا يستر
و محدش بيسيب حد في حالة

[samirayad]

شوف الشكمان
أحتمال تلاقى عليه كيس بلاستيك لازق وبيسيح

وبرضه ألقى نظره فاحصه جوه الغرفه من أجل الأطمئنان فقط

وخيرا إن شاء الله

[ahmedbasto]

شوف الشكمان
أحتمال تلاقى عليه كيس بلاستيك لازق وبيسيح

وبرضه ألقى نظره فاحصه جوه الغرفه من أجل الأطمئنان فقط

وخيرا إن شاء الله

+111111111111

[MOK3336]

و الله يا رجالة أنا مش عارف أقولكم إية أنتم بجد جدعان و رجولة و ثباتة قوى و مبتسبوش حد ولازم تقفوا معاه ( أنا بحبكم في الله بجد )
بس الريحة دي كانت من جوه العربية
لأن الريحة كانت جاية من ناحية الطابلون كده و الله انا شاكك تكون الريحة دي جاية من السماعات عشان أنا كنت معلي الصوت
و الريحة دي مظهرتش من يومين لأنى اليومين الي فاتو مكنتش معلي الكاسيت

أنا مش عارف ؟؟؟
طيب هل الريحة طبيعية ولا يكون في حاجة غلط ولا إية
انا خلاص مش بنام و لو نمت بحلم بالعربية آه و الله

[mrwho1982]

طيب اقوللك علي حاجة حلوة روق واهدي كده وهات العربية في حتة ظلة

المهم دور العربية 2 دقائق وخاليك فاتح الكبوت وعينيك وانفك علي الضفائر

خلاص بصيت مافيش حاجة طيب هاتخش جوه العربية
وتشغل الكاسيت وتسيبو شوية وبعد كدع عالي الصوت ولو تعرف سللك السماعات ماش ازاي خاللي عينك عليه

وان شاء الله المشكلة بسيطة جدا وماتقلقش

[Ahmed Galal]

معلش هيا العربية الجديدة كده دايما ما بتسلمش من العيون الحارة انت بس اعمل زى ما الاعضاء تفضلوا و نصحوك و ان شاء الله خير و كويس انك مركز فى كل حاجة عشان لا سمح الله لو فيه مشكلة تلحقها بدرى فى الضمان و ربنا يهنيك بيها و يستر طريقك

[elewey]

يا استاذى دى حتلاقيها حاجة بسيطة زى ما زميلنا قالك كيس بلاستيك على الجكمان او ممكن تحت الماتور مش اكتر بص انتا بس كويس و حتلاقيه اصل تعليه صوت الكاسيت ملهاش علاقه يعنى خالص بريحة الشياط انتا عارف لولا ان العربية لسه زيرو مكانش حيبقى ليها تفسير غير اسطوانه و ديسك و دول ممكن يعملوا ريحة شياط جوة العربية

[MOK3336]

و الله يا رجالة أنا هجرب تاني إنهرده و ربنا يستر
بس يارب تكون الريحة دي تهيئات
انا هحاول أنهرده امشي عادي خالص و أقفل الشبابيك عشان أتأكد أنها مش من جوه العربية
و ربنا يستر
و الله الواحد خاف يا elewey من كلامك
أنا خايف أكون لبست في عربية معيوبة ولا حاجة ؟؟؟
طيب الأسطوانة و الديسك دول أعراض بواظنهم إية الله يكرمك
انا قلقان جدا
لدرجة و الله سعات بقول ياريتني ما جبت عربية من الأساس
طيب
لو أنا رجلي كاتن تقيلة علي الدبرياج زي ما أخونا في المنتدى قالي بس في قسم الورشة هل ده ممكن يبوظها من المرة دي ؟
يعني هتتأثر من المرة دي ولا مع التكرار المستمر

[elewey]

اعراض بوظان الاسطوانه ان السحب بيقل و لو طالع مطلع على الاول تلاقى العربيه تكركر و متقددرش تطلع وكمان ريحة الشياط جوة الصالون بس على فكرة مستحيل الاسطوانه تبوظ بعد 200 كيلو دة مينفعش طبعآ وبعدين اكتر حاجة تبوظ الاسطوانه و الديسك انك تريح رجللك و انتا ماشى على الدبرياج و على فكرة فى ناس كتير بتعمل كدة خصوصآ لما تكون لسه زيرو مقلق يعنى

[khaled_sabry]

ماتقلشى كده
انتا عربيتك لسه زيرو ( كل المشتركين بيقلوهالك - الظاهر حتاخد عين من هنا كماااااان و انا اول واحد حديلك العين دىىىىى )
الهم عربيتك لسه زيرو و طبيعي تبقى غرقانه اكياس بلاستيك حولين كل حاجه ( انا لما بشوف عربيه زيرو بحس انه فيه كيس بلاستيك حولين كل مسمار )
فممكن يكون كيس من الاكياس دى ابتدى يسيح او شبك فى سلك كهربا مثلا و ابتدى يسيح ... ماتخدشى فى بالك انتا

بس رجاء خاص ... ابقى ارفعلنا صوره العربيه علشان تبقى تاخد العين تمام

[mmffor]

حتى لو حرقت على الاسطوانه ده مش حيبوظها خالص الا لو بتحرق عليها و بتخليها تطلع شياط كل مره تسوقها و لمدة 5 الاف كيلو مثلا!!! ممكن تروح التوكيل تخليهم يكشفوا على الضفيره ممكن تكون في قفله بسيطه و فيوز ساح و ممكن تكون تهيؤات ان شاء الله

[MOK3336]

شكرا يا mmffor علي الإهتمام و تقريبا كده الريحة بدأت تخف شوية

[sherbeni]

بص يا باشا ان شاء الله خير بس انا كان معايا رينو كليو 2002 و حصل معايا كدة تقريبا اولا انت ركبت السمعات و الكاسيت فين دا مهم جدا علشان دا السبب الرئيسى والله اعلى واعلم فى اللى بيحصالك دا و نصيحة فك دا كولو واعملو فى التوكيل و انشاء الله الموضوع دا هينتهى خالص و علشان متلفش حولان نفسك كتير ابئى ادعيلى

[MOK3336]

اولا انت ركبت السمعات و الكاسيت فين دا مهم جدا علشان دا السبب الرئيسى والله اعلى واعلم فى اللى بيحصالك

حبيب قلبي انا مركبتش حاجة الكاسيت الاصلي بتاع العربية و كذلك السماعات

بس واحد صحبي قالي الريحة دى عشان لسة جديدة ( شبهالي بشاشة الكمبيوتر ايلي بتشتغل لأول مرة ) مش عارف هو جاب التشبيه ده منين اساسا