اجراءات نقل الملكية وفحص السيارة ؟

[magedm2007]

صباح الخير
انا عندى سيارة 127 مو 82 2 باب ونويت انقل الملكية وافحص وكنت عايز اعرف الاتى
1- انا مطلع رخصتى الخاصة من مرور العجوزة اللى انا تابع له اما العربية فتبع مرور الدقى اية هى اجراءات نقل الملكية مع العلم ان انا معاية
عقد مسجل فى السجل ومش ماضى مشترى ؟

2- العربية الاكصدام ملوح سنة بسيطة والكابوت فية من عند الهواية عوجة بسيطة من اثر وقوع فرع شجرة منذ اكثر من 6 شهور هل الحاجات
دى تأثر فى الفحص ولا كلة بيمشى بالذى منة ؟

3- انا الطفاية بتاعة العربية اعتقد انها خلصت صلاحيتها هل اروح قبل ما افحص واشترى وحدة ولااستنى لما المهندس يقول لى اشترى واحدة ؟

4- موضوع الفحص والتجديد دة بياخد وقت كتير يعنى يوم كامل ولا بسيط ؟

ارجو الرد من اعضاء المندى الكرام
وشكرا

[عزيز محمد]

السلام عليكم ورحمة لله وبركاته
1- تذهب لمرور الدقى التابع له السيارة وتستخرج شهادة مخالفات بموجب العقد اللى معاك وبطاقتك الشخصية
2- تذهب للمرور اللى انت تابع له وتشترى نموذج فحص سيارة ونقل ملكية بحسب عدد السنوات اللى ناوى ترخصها
3- تفحص السيارة وتشترى طفاية برضه من المرور نفسه
4- تدفع قيمة التأمين الإجبارى عن السنوات اللى ناوى ترخصها فى نفس المرور(وأعتقد بتحتاج لصورة البطاقة وانت بتدفع التأمين)
5- تودى الورق اللى معاك (نتيجة فحص السيارة + العقد + الرخصة + ورقة صلاحية الطفاية + نموذج نقل الملكية + قسيمة التأمين) للموظف المختص هيقوم مقدر لك الرسوم الواجب دفعها
6- تدفع الرسوم وتفك نمر العربية وتسلمها مع إيصال الدفع للموظف اللى قدر لك الرسوم يديك إذن صرف لوحات جديدة
7- تنتظر حتى يتم استخراج رخصة جديدة باسمك وبهذه الرخصة تستلم النمر الجديدة

وألف مبروك


المشوار ده ياخد منك يوم إن شاء الله بس تروح بدرى جدا 9 بالكتير وماتروحش يوم خميس عشان بيشتغلوا بس لغاية 12 والمصاريف دى كلها ماتعملش 300 جنيه
وماتقلقش خالص من الخبطات اللى فى العربية
والسلام عليكم ورحمة الله وبركاته

[moudy2002]

شكرا عزيز باشا انا كنت فعلا محتاج اعرف الموضوع دة ..

[aif]

حبيت اقولك حاجة كمان
لو انت معاك توكيل بس ح تروح تعمل عقد بيع لنفسك في الشهر العقاري
اما لو انت معاك عقد موثق يبقي خلاص كمل الاجراءات زي ما الاستاذ عزيز قاللك
بالنسبة للخبطات اعتقد اها مش مشكلة
انا واحد صاحبي قاللي انه راح مرة فحص سيارة وكانت ناقصة رفرف
طبعا انت عارف ازاي
اهم حاجة تروح بدري الموضوع مش ح ياخد اكتر من ساعتين
ربنا معاك