غيرت عمود الكرنك والحمد لله بس عاوز نصيحة

[kantoosh]

انا غيرت عامود الكرنك والحمد لله
ومكنتى 1300 كاتينة حديد والموضوع ده اتكلف بالظبط 550 ج عامود كرنك من عزبة شلبى ( طبعا انا عارف انى انضحك عليا فى 200 جنيه ) و115 ج سبايك وهلايل و 100 مصنعيى الخراط اللى ريح العامود بس (العامود استاندر ما اتخرطش) و150 مصنعية الميكانيكى و 80 ج شوية شنابر وفلتر زيت الكلام ده خلص يوم الجمعه اللى فاتت الساعه 11 بالليل بالظبط وبعدين قطرت العربيه وانا مدورها لغاية مدينة نصر وبعدين بطلتها ونزلت دورتها تانى من الساعه 4.5 الفجر لغاية الساعه 7 صباح يوم السبت وبعدين على العصر كده دورتها ساعه وطلعت بيها مشوار حوالى 60 كيلو بس كنت ماشى على 50 او 60 اقصى حاجه وروحت النهارده الشغل اصحابى قالولى كده قليل على التليين ولازم الينها تانى وهى واقفه ليله بحالها وانا ناوى اعمل كده النهاردة ان شاء الله بس قولت اخد رايكوا الكلام ده ايه مدى صحتة وانا مغير عامود كرنك وسبايك بس وكمان عاوز اعرف لو الواحد مشى وهى كده ايه الاضرار وشكرا ليكوا جميعا وفعلا انتوا موقع غاية فى الاحترام والتقدير

[hobakora]

الأستاذ سمير فيييين ؟

[samirayad]

ومكنتى 1300 كاتينة حديد والموضوع ده اتكلف بالظبط 550 ج عامود كرنك من عزبة شلبى ( طبعا انا عارف انى انضحك عليا فى 200 جنيه ) و115 ج سبايك وهلايل و 100 مصنعيى الخراط اللى ريح العامود بس (العامود استاندر ما اتخرطش) و150 مصنعية الميكانيكى و 80 ج شوية شنابر وفلتر زيت

لو البيعه دى كلها على بعضها على 550 ج

فماشى الحال

بس حتة الخراط ....اللى جايز جدا تكون لعبه بين الميكانيكى والخراط

لتحليل أجمالى البيعه على بعضها

بمناسبة شهر 7 وأرتفاع الأسعار

ليه أنا بأقول الكلام ده

لأن الكرنك أستاندرد وأكيد ركبت سبايك وهلايل أستاندر

فين دور الخراط بأه

ملوش دور فى القصه دى الصراحه

المهم

وبعدين قطرت العربيه وانا مدورها لغاية مدينة نصر وبعدين بطلتها ونزلت دورتها تانى من الساعه 4.5 الفجر لغاية الساعه 7 صباح يوم السبت وبعدين على العصر كده دورتها ساعه وطلعت بيها مشوار حوالى 60 كيلو بس كنت ماشى على 50 او 60 اقصى حاجه وروحت النهارده الشغل اصحابى قالولى كده قليل على التليين ولازم الينها تانى وهى واقفه ليله بحالها وانا ناوى اعمل كده النهاردة ان شاء الله بس قولت اخد رايكوا الكلام ده ايه مدى صحتة وانا مغير عامود كرنك وسبايك بس وكمان عاوز اعرف لو الواحد مشى وهى كده ايه الاضرار وشكرا ليكوا جميعا وفعلا انتوا موقع غاية فى الاحترام والتقدير

هو فيه تسرع منك بعض الشىء

المفروض كنت غيرت زيت وفلتر بعد التليين كمان شويه على الواقف

قبل التحرك بالسياره

وبعد كده أخدت التليين مع وجود حمل ( أى السياره متحركه )

بصوره تدريجيه برضه فى التعامل مع سرعة التليين مع وجود أحمال

عموما

نظرا لكون اللى فات مات

غير الزيت على طول والفلتر بسرعه

وخش على التليين مع سرعات عاليه وبالعقل برضه

[kantoosh]

شكرا على اهتمامك يا باشمهندس سمير بس انا دلوقتى عاوز اعرف انزل على العربيه اكمل تسخينها وتليينها تانى على الواقف ولا خلاص اكمل مشى بيها وتليينها وانا ماشى وبعدين انا غيرت الزيت والفلتر اول امبارح اغيرهم تانى بكره ولا امشى عليهم الاول

[samirayad]

اكمل تسخينها وتليينها تانى على الواقف ولا خلاص

لا خلاص معدتش تفرق بأه

خد الأمور بالراحه فى التليين مع السرعه شويه

ومفيش مشاكل إن شاء الله

[kantoosh]

طيب يا هندسة بالنسبة للزيت ما قلتليش اعمل معاه ايه انا مغيره اول امبارح زى ما قولت قبل كده اغيره هو والفلتر امته مع العلم انه مكانش فيه خرط للكرنك والميكانيكى غسل الماتور بالبنزين كله قبل ما يركبة وشوفت الزيت لقيته بلونه لسه ما اتغيرش وفيه حاجه تانيه حد كان قاللى ممكن احط شوية زيت فالفالينا علشان يتقل الزيت شوية ويحافظ على الكرنك ايه رايك؟؟؟؟؟

[samirayad]

لا متحطش لا فالفالين ولا غيره

خليك على وضعك

وكمان ألف كم تليين مع الحمل

أبقى غير الزيت والفلتر

وكده رضا أوى

[kantoosh]

الف شكر ليك يا هندسة على اهتمامك وربنا يخليك لينا يا غالى

[adhamhossam]

بص يا باشا
أولا ألف مبروك علي العمرة
عايز أقولك علي شوية حاجات مهمة
أي مبالغ سواء دفعتها او إنضحك عليك فيها مش مشكلة ( في داهية الفلوس ) ليه ؟؟؟؟؟؟
موضوع العمرة دي شوف انت تعبت و دوخت أد ايه عقبال ما خدت قرار العمرة بعد اللف عند الميكانيكية و الصنايعية
أهم شيء ان الخراط شغله يكون تمام لأن لو في خطأ في الخراطة الدنيا هتخرب
بالنسبة للميكانيكي مش مشكلة أوي لأن دوره التقفيل و التركيب مش اكتر
الخراط أهم لأن العمرة خراطة


حاجة تانية التليين يادوب زي ما ألخوة قالو غير زيت و فلتر و هات نوع زيت محترم مش محترم اوي يعني ( نص محترم ) زي الكالتيكس ابو 37 جنيه و غير الفلتر كمان و دور العربية و خليها تحرق صفيحتين بنزين و هي واقفة و كل فترة بطلها و بص علي المياه في الردياتير و بعد كدة ابدأ امشي بيها واحدة واحدة و يفضل لو تطلع بيها مشوار أو تمشي علي طريق سريع مثلا 50 كيلو بعيد عن زحام المحروسة و يكون معاك جركن مياه و تتابع الحرارة و انت ماشي
تمشي واحدة واحدة تاتا تاتا بمعني أنك تشممها الغيارات يعني متحرقش الغيار للأخر أو ما تقرص علي العربية و يكون اقصي سرعة ليك تتراوح من 40 أو 50 كم\ساعة
و بعد يوم تبدأ تزود سرعتك شوية و هكذا كل دة واحدة واحدة
بعد ما تعمل 1000 كيلو تقريبا تنزل الزيت خالص لأنه هيبقي فيه رايش الحديد الناتج من الخراطة أو احتكاك البساتم أو الناتج من التليين
و بكدة تقدر تمشي براحتك و تبدأ تحمل علي العربية و تركب حمولة معاك و عيش حياتك مع كوكاكولا

معلش انا رغاااااااااي أوي
بس الكلام دة عن تجربتي أنا بقاللي سنتين معمر عربيتي 127 سوبر فيورا و عملت نفس إللي انت عملته بالضبط
سلام