صوت الشكمان مع السرعة

[uhlphp]

لما اكون ماشى بسرعة وارفع رجلى من على دواسة البنزين باسمع صوت عالى وغريب من الشكمان من الخلف الصوت اشبه باندفاع هواء شديد جداً مما يودى لسماع صوت عالى وخشن .

علماً انه لا يوجد اى سخونة او ضعف فى السحب ولا اعتقد بوجود خرم فى الشكمان لانى حاولت اشوف خروج هواء من عند اماكن الحامات ولم اجد .

[sherif_84]

بص ياباشا انا تقريبا عندى نفس مشكلتك لما فعلا باكون ماشى على سرعة و ارفع رجلى من على دواسة البنزين بلاقى صوت زنة عالية من الشكمان و لما كشفت طلع من علبة البيئة الميكانيكى قالى دى بونطة لحام من جوه فكت مش اكتر بس ماتخفش مش هتعمل حاجة غير الصوت ده بس و فعلا سبتها بس الصوت يعنى شوية يظهر وشوية الاقيه مش باين بس حبيت أقولك اللى حصل و انصحك برضو بص عندك على علبة البيئة و العلبة اللى فى النص وان شاء الله مايكونش فى مشكلة عندك , وكل سنة وانت طيب .

[samirayad]

يفضل تعملك مشوارين سفر على طريق سريع لكنس كل زرات الكربون

التى قد تكون متحوشه بالعلبه الخلفيه

وبرضه أطمن على تثبيت العلبه صح فى مكانها المخصص على العليقه الخلفيه

[uhlphp]

شكرا للاستاذ شريف والمهندس سمير على الرد وكل عام وانتم بخير

اولاً انا معنديش علبة البيئة لان العربية قديمة .

ثانياً انا لسه راجع من راس البر صحراوى من فترة قريبة يعنى المفروض لو فيه زرات كربون تكون طلعت والشكمان انا راجعت علية كله متثبت كويس .

ثالثاً هل لو فى علبة بايظة بمعنى انها تكون بتخرج هواء العادم بصورة اسرع يكون السبب فى سماع هذا الصوت يعنى ممكن متكونش مكتومة ولكن تكون بتخرج اسرع من الوضع الطبيعى .

[samirayad]

ثالثاً هل لو فى علبة بايظة بمعنى انها تكون بتخرج هواء العادم بصورة اسرع يكون السبب فى سماع هذا الصوت يعنى ممكن متكونش مكتومة ولكن تكون بتخرج اسرع من الوضع الطبيعى .

فعلا كلامك ده منطقى ومقبول
ومعناه أن الحواجز الداخليه للعلبه فيها مشاكل فنيه

والمفروض تغير العلبه دى بأخرى جديده

[Adham]

لو كنت قارص جامد و رفعت رجلك عن الاكسراتير مرة واحدة و مادوستش دبرياج (العربية معشقة) عادي جدا تسمع احلى صوت شكمان بالذات لو عامل شكمان كبير و سالك مش حانقول متعدل و مركب هيدر و ديفل هههههههه

السيفيك اللي كانت معايا زمان كنت تسمع صوتها زي الرشاش ههههه

[Ahmed Nasser]

عندى نفس المشكلة العربية كانها عربية سباق ملهاش شكمان بس دة اول ما جبت العربية حكت فى مطبات كتير فكنت تسمع دربكة فى الموتور كدة من تحت والدى خد العربية عند واحد بتاع شكمان فقال لة من كتر ما العربية حكت فى المطبات العادم نزل سواد فى علبة الشكمان والسواد دة اتحول لجمر فكان الجمر فده اللى بيكركب فى الموتور فنظف الراجل علبة الشكمان دى ومن ساعتها صوت العربية خشن وزى صوت الربع والنص نقل ويا سلام بقى لو صلت عداد rpm على 4 على الثانى بتبقى فضيحة وانا ماشى فى البلد بس بصراحة صوت العربية تحس انة سلك كان الاول فية كتمة ومن ساعتها كانى ماشى بربع نقل

[Adham]

والدى خد العربية عند واحد بتاع شكمان فقال لة من كتر ما العربية حكت فى المطبات العادم نزل سواد فى علبة الشكمان والسواد دة اتحول لجمر فكان الجمر فده اللى بيكركب فى الموتور فنظف الراجل علبة الشكمان دى ومن ساعتها صوت العربية خشن وزى صوت الربع والنص نقل ويا سلام بقى لو صلت عداد rpm على 4 على الثانى بتبقى فضيحة وانا ماشى فى البلد بس بصراحة صوت العربية تحس انة سلك كان الاول فية كتمة ومن ساعتها كانى ماشى بربع نقل

دة مش بتاع شكمانات دة تقريبا بتاع شيشة في قهوة

سواد اية و جمر اية و علبة شكمان اية اللي تتنضف و ينضفها ازااااي !!!!

اي كربون او رواسب حريق بتطير من الشكمان مع كبس الموتور

شوف بتاع شكمان كويس الشكمان دة فية خرم في علبة النص (الفلتر او علبة البيئة)

[Ahmed Nasser]

هو ده يااستاز ادهم اللى سمعتو من والدى بس فى واحد قالى اللى عملك الشغل دة ممكن يكون الصبى مش الصنايعى