العربيه بتاكل بنزين جامد

[kantoosh]

السلام عليكم ورحمة الله وبركاته
الموضوع ان العربيه استهلاكها للبنزين جامد جدا وكانت بتنتش ومفيش سحب وفيه دخان اسود روحت لبتاع الكاربراتير وظبطه والحمد لله الدخان انتهى والسحب بقى كويس بس برضه استهلاكها للبنزين كتير يعنى الصفيحه بتعمل 100 كيلو بالعافيه داخل المدينه انا عندى المنطقه مليانه مطبات ومشوارى كله 3 كيلو رايح و3 كيلو جاى هل ده ياثر وحاجه تانيه انى كل لما امون العربيه تقطع شويتين وبعد كده تبقى زى الفل لغاية التموينه اللى جايه ايه ممكن يكون السبب وايه الحل وشكرا
العربيه بولونيز موديل 81 مكتوب فى الرخصه 1500 سى سى لكن الميكانيكى قاللى انه موتور 125 واحد كامه 1300 سى سى

[kantoosh]

يا جماعه حد يرد عليا الموضوع ده مجننى المفروض انى بمشى كل يوم حاولى 6 او 7 كيلو يعنى المفروض ان الصفيحه على الاقل تقعد معايا 20 يوم بمون كل اسبوع تقريبا
افيدونى وانقذوا المحفظه بتاعتى

[windofchange]

وعليكم السلام ورحمه الله.......بنزين نوعه ايه 80 ولا90 ولا92؟ وبعدين حاجة من عندي كده والله اعلم موتور 1300 والأصلي بتاعها 1500 معني كده ان الموتور بيبذل جهد اكبر من ال1500 عشان يحرك وزن العربية اللي ملقي عليه لأن ال125 اعتقد اقل في الوزم من البولونيز وبذل الجهد الزيادة يخليه ياكل بنزين وحاجة تانية الموتور 1300 بتاع ال125 راكب عليه كربيراتير 125 ولا بتاع البولونيز؟ خير ان شاء الله

[kantoosh]

البنزين 80 وبالنسبة للكربراتير مش عارف بتاعها ولا بتاع 125

[aYaBooY]

اولا الـ 125 مفيش منها 1300 كله 1500 و الـ 124 مفيش 1300 كلة 1400
البولونيز مسمعتش عن 1300 فيها خالص
اعتقد الـ 1300 ده بتاع 131 و موضوع تغيرة كان شائع في فترة اوائل التسعينات
و صعب يكون مثبوت في الرخصة 1500 و هو 1300 العكس ممكن
عموما موضوع النتشة ده من كذا حاجة
اولا كاربراتير مش مظبوط و عاوز اكس و باب
ابلاتين و كوندنسر مش مظبوطين او مش بتوع الموتور ده
البوجيهات معرقة او اشعالها مش كويس ( موتور خفيف او موبينة ضعيفة )
طقم الدبرايج منتهي و بيخلي الموتور يبزل جهد مضاعف لتحريك العربية

[kantoosh]

بالنسبة لموضوع الموتور انا عرفته لما جيت اغير عامود الكرنك اشتريت واحد بولونيز طلع مش بتاعها والخراط قال انه موتورى 1300 بتاع 125 كاتينه حديد ولكن اللى فى الرخصه مكتوب 1500 سى سى المهم لما جيبت عامود الكرنك ركب عادى والحمد لله اما بالنسبة للنتشه دى بتحصل لما امون بس مش على طول مجرد ما امون بعدها يحصل النتشه لحد ما العربيه تقف وبعدها بتمشى زى الفل بس انا المشكلة الاساسية بتاعتى ان العربيه استهلاكها جبار فى البنزين وبتاع الكاربراتير قال انه الاكس والباب كويسين ونظف الكربراتير ولكن برضه استهلاكها عالى هل استهلاك الصفيحه فى 90 كيلو بالشكل اللى قولت عليه وهو انى مسافتى قريبه وكل شوية مطب ده استهلاك معقول ولا ايه؟؟ وهل لو فيه مشكلة فى سلك البوجيهات ممكن يخلى الاستهلاك عالى كده ؟؟؟

[kantoosh]

محدش راضى يفيدنى بحاجه ليه