متابعه يوم بيوم ل فك ماتور و عمل طقم شنبر

[michohat]

بسم الله الرحمن الرحيم
الموضوع باختصار اني ان شاء الله تعالي داخل علي فك الماتور وعمل طقم شنبر له وذلك لاول مره
فقولت اعمل موضوع فيه اكتب تساؤلاتي و كل يوم بيحصل ايه

حاله السياره :
فيات 131 الماني موديل 1979 موتور 1600 سي سي اتنين كامه
الزيت بينقص( تقريبا نص لتر او ثلاث ارباع لتر كل 1000 كيلو ) وفيه بخر من الفايظ وبس مفيش دخان من الشكمان


الميكانيكي قال لي ان مصنعيه طقم الشنبر 400 جنيه فهل لو وصلتهم ل 300 معاه او 350 المصنعيه كده كويسة ( الميكانيكي مشهود له )

فيه مهندس شغال فى الشركه ماسك سيارات الشركه معايا قال لى قبل ما تفك الماتور بالكامل راجع على جلد الصبابات الاول لانه ممكن يكون السبب فى حالتك فهل كلامه يؤخذ به؟

عاوز اغير الشكمان فهل اروح اغيرة دلوقت ولا بعد ما الموتور يركب اروح اغيره؟

عاوز اغير الكاوتش فهل يتغير دلوقتي ولا بعد الميكانيكي ؟

هل طقم الشنبر يلزم ان الماتور كله يطلع بره ولا بيتعمل والماتور فى العربية ؟

سمعت كلام ان بعمل طقم الشنبر اننا كده بنحكم الماتور من فوق ولازم بيقي محكوم من تحت برضه فاذاي بيتحكم من تحت وهل يجوز انه يكون اصلا محكوم من تحت ؟


وبالنسبة للاعضاء اللى من الشرقية عاوز اعرف انهي ميكانيكي احسن

عادل الفلاح
سمير رسلان

انا اتعاملت مع ده واتعاملت مع ده بس اكتر واحد متعامل معاه عادل الفلاح لان ابويا كان بيتعامل معاه ومصنعيه عادل الفلاح زي ما قولت 400 جنيه

[saadelden]

الميكانيكي قال لي ان مصنعيه طقم الشنبر 400 جنيه فهل لو وصلتهم ل 300 معاه او 350 المصنعيه كده كويسة ( الميكانيكي مشهود له )
لو دي مصنعيه الشغل كله مع شغل الخراط يبقى 350 معقول
هبقى اسال الميكانيكي و اديك فكره

فيه مهندس شغال فى الشركه ماسك سيارات الشركه معايا قال لى قبل ما تفك الماتور بالكامل راجع على جلد الصبابات الاول لانه ممكن يكون السبب فى حالتك فهل كلامه يؤخذ به؟
انت بتقول فيه بخر من الفايظ يبقى مش جلد صبابات بس
جلد الصبابات بيدخل زيت جوا الماتور و اما بيتحرق بيدي عادم ابيض مزرق

عاوز اغير الشكمان فهل اروح اغيرة دلوقت ولا بعد ما الموتور يركب اروح اغيره؟
مش هتفرق لو مظبوط
لكن لو فيه مشكله يفضل تغيره دلوقتي عشان التليين

عاوز اغير الكاوتش فهل يتغير دلوقتي ولا بعد الميكانيكي ؟
عادي غيره ف اي وقت مش هيفرق

هل طقم الشنبر يلزم ان الماتور كله يطلع بره ولا بيتعمل والماتور فى العربية ؟
معظم الميكانيكيه بتعمله و الماتور راكب

سمعت كلام ان بعمل طقم الشنبر اننا كده بنحكم الماتور من فوق ولازم بيقي محكوم من تحت برضه فاذاي بيتحكم من تحت وهل يجوز انه يكون اصلا محكوم من تحت ؟
الماتور بيتحكم من فوق اما تبقى الصبابات مظبوطه
و من تحت اما يبقى طقم الشمبر سليم
هي الفكره في احكام غرفه الاحتراق عشان تدي اكبر عزم ممكن


اهم حاجه فتره التليين عشان تضمن اكبر فتره ممكنه للماتور و يديك الاداء الي انت عايزه

[Eng_Mostafa_89]

بسم الله الرحمن الرحيم
الموضوع باختصار اني ان شاء الله تعالي داخل علي فك الماتور وعمل طقم شنبر له وذلك لاول مره
فقولت اعمل موضوع فيه اكتب تساؤلاتي و كل يوم بيحصل ايه
من رأى طالما ان الموتور اتفك يبقى يتعمل فية كل اللى مطلوب اذا كان عمرة كاملة او نصف عمرة
حاله السياره :
فيات 131 الماني موديل 1979 موتور 1600 سي سي اتنين كامه
الزيت بينقص( تقريبا نص لتر او ثلاث ارباع لتر كل 1000 كيلو ) وفيه بخر من الفايظ وبس مفيش دخان من الشكمان
غالبا كدة دة طقم شنبر فعلا
الميكانيكي قال لي ان مصنعيه طقم الشنبر 400 جنيه فهل لو وصلتهم ل 300 معاه او 350 المصنعيه كده كويسة ( الميكانيكي مشهود له )
الله اعلم
فيه مهندس شغال فى الشركه ماسك سيارات الشركه معايا قال لى قبل ما تفك الماتور بالكامل راجع على جلد الصبابات الاول لانه ممكن يكون السبب فى حالتك فهل كلامه يؤخذ به؟
غالبا لو جلد صبابات بيبقى فى دخنة خارجة من الشكمان
عاوز اغير الشكمان فهل اروح اغيرة دلوقت ولا بعد ما الموتور يركب اروح اغيره؟
يفضل ان الموتور يركب على نضافة بعد الشغل فية يعنى ممكن مثلا وانت رايح تعمل العمرة تعدى الاول تغير الشكمان بحيث ان الموتور لما يركب يركب على نضافة وكمان الموتور قبل العمرة يبقى اشتغل فترة صغيرة مع الشكمان الجديد فميعبيش فية اى رواسب او عوادم
عاوز اغير الكاوتش فهل يتغير دلوقتي ولا بعد الميكانيكي ؟
بعد الميكانيكة افضل علشان الركنة والزيوت والكلام دة
هل طقم الشنبر يلزم ان الماتور كله يطلع بره ولا بيتعمل والماتور فى العربية ؟
حسب حالة الموتور والخلوص
ممكن يكون الشنبر كويس ومتاكلش بس الاسطوانة هى اللى اتكلت يبقى كدة لازم البلوك يطلع يروح للخراط علشان يتخرط على المقاسات الجديدة المناسبة وهنا ممكن يتغير طقم الشنابر والبساتم
ممكن يكون البستم كويس والاسطوانة كويسة بس الشنبر هو الى بايظ هنا هتغير الشنابر فقط ودة من غير ما البلوك يطلع برة العربية
سمعت كلام ان بعمل طقم الشنبر اننا كده بنحكم الماتور من فوق ولازم بيقي محكوم من تحت برضه فاذاي بيتحكم من تحت وهل يجوز انه يكون اصلا محكوم من تحت ؟
الكبس بيهرب من داخل غرفة الحريق من مكانين يا اما من الصبابات فوق او من الاسفل من حولين البستم ودة بيبقى عيب الشنبر
وبالنسبة للاعضاء اللى من الشرقية عاوز اعرف انهي ميكانيكي احسن

عادل الفلاح
سمير رسلان

انا اتعاملت مع ده واتعاملت مع ده بس اكتر واحد متعامل معاه عادل الفلاح لان ابويا كان بيتعامل معاه ومصنعيه عادل الفلاح زي ما قولت 400 جنيه

[ahmed_h_g]

متابع معاك ...........

[Eng_Mostafa_89]

دة موضوع كويس عن السبائك الخاصة بعمود الكنك وتحدد ازاى انها تالفة واسباب التلف
القــــسم التعلــــيمى - :: نــايــل مــوتــورز:: - :: NileMotors.net ::
وان شاء الله هقول برضة لحضرتك ازاى تحدد اذا كان الصبابات كويسة ولا لاء والشنابر بعد لما تفك الموتور وتشوفهم برة

[michohat]

امبارح روحت للميكانيكي اللى استقريت عليه ( سمير رسلان ) علشان اربط معاه علشان صابحين الشغل بكره
فطلع يجرب العربية معايا علشان يشوف هنعمل ايه وهنكون محتاجين ايه
فقال لي ان اول حاجه لازم تتعمل هيا تغيير الكرونه لان العربية خطر انها تمشي والكارونه بايظه وخصوصا وان اللى عندي جايبة اخرها وان الماتور لو حتي مفوت تقدر تمشي بيه ولكن الكارونه لو عطلت منك وان ماشي لا قدر الله هتكون اضرارها وحشه وخصوصا لو انت ماشي على سرعه

فحسيت من كلامه بالمنطقية وخصوصا واني كنت نويت اعمل الكارونه قبل ما يحصل موضوع الثورة وكنت نزلت للحاج حمدي علشان اصلح الكارونه

فلما سئلت على الكارونه لقيت ان سعرها نزل شوية بقى فى رينج 1800 وده لسه من غير فصال فقولت اشوف احوال السوق
وكانت النتيجه كالاتي:

1 - تغيير الكارونه بكارونه استيراد مماثله لها العقبة الوحيده امامي كيفيه معرفه مدي جوده الكارونه الاستيراد و هل توجد معايير للحكم عليها ولا انها ممكن تمشي اسبوع و بعدها تعمل صوت تاني وكمان متشكك من ان السوق بقي فيه كاورنات التاكسيات اللى دخلت مشروع احلال التاكسي وكانت الاسعار كالتالي الكارونه فقط ( البطيخه ) 700 جنيه الكارونه الكامله 1200 جنيه والاسعار دي من مصر و بضمان شهر علي حسب كلام التاجر اما الاسعار فى الشرقية كانت 1800 للكارونه الكامله

2- اصلاح الكارونه القديمه ودي عن طريق انى هنزل مصر للحاج حمدي اللى عرفت انه متخصص فى الاصلاح وكان عمل اصلاح كارونه احد الزملاء وذلك بتكلفة 1420 في شهر اغسطس 2010 وذلك بتغيير التروس والبنيون بطقم روسي خاص بلادا

3- تعديل الكارونه بكارونه تويوتا (فقط البطيخه ) و هتكون تكلفتها حوالي 1000 جنيه

انا مشوش شوية مش عارف اسلك انهي اتجاه

[saadelden]

بلاش تعديل في الكرونه لان معظم التجارب بتفشل
و طالما الاستيراد عليه ضمان شهر يبقى حلو اوي و هتقدر تكتشف لو فيها عيب خلال يومين ولا حاجه

[albasha]

خد الإستيراد وغير الزيت بتاعها علطول وشوف لو في ونه ولا حاجه

[mido_soliman]

عن تجربة فى 132 عربيتى الاولى
الكرونة حتشوف البطيخة لو عليها من ورا شحم او حسيت انها مفتوحة او نضيفة اوى ابعد عنها
عموما توكلت على الله واخدت الاستيراد قبل ما تتحرك بيها وبعد ما تركب لازم تنزل الزيت اللى فيها وتشوف مقدارة قد اية بيتهيالى المفروض ميقلش عن 3 كيلو لو نزلت اقل من كدة تبقى مكبوسة الباقى شحم
تحياتى ليك

[Eng_Mostafa_89]

معلش يا باشا بص كدة بصة على الموضوع دة؟

http://www.nilemotors.net/Nile/184134-a.html

[michohat]

قرأت موضوع الكارونه فى السابق و كذلك لفت نظري رد سبعاوى ( مش شايف نشاط له مؤخرا حد يعرف اخبار عنه )
كنت مسافر النهارده القاهره علشان الكارونه لكن الميكانيكي اعتذر و أجلت السفر ان شاء الله الى الجمعه القادمه