مشكلة فى صوت العربية !!

[ggaamm]

السلام عليكم جميعاً

لو سمحتوا أنا معايا مشكلة وهى أنى لما أدور العربية الصبح بسمع صوت زى (فكفكفكفكفكفكفك) كده
قلقت بصراحة روحت فاتح الكبوت وبصيت أستهيألى أنه من الفتيس

روحت ركب العربية ودوست دبرياج لقيت الصوت راح

قلت عادى يمكن عشان الزيت لسه ماتحركش فى الفتيس ..

شوية بشوية الصوت بقى دائم لغاية العربية ماتسخن أو أدوس دبرياج ,, قلت مابدهاش روحت للميكانيكى عشان اكشف عالزيت .. لقيته فعلاً ناقص قلت الحمد لله أن المشكلة بسيطة وفرحت لأن فعلاً الصوت هدى

تمر الأيام ويحصل نفس الحوار وأروح للميكانيكى بارضو لكن المرة دى يطلع الزيت ماظبوط !!!
فقالى غالباً الفتيس فيه حاجة أو من الآخر بيودع !!

فدلوقتى انا عاوز آخد رأيكم هل الكلام ده صحيح ؟؟؟؟ ولا ممكن تكون المشكلة أبسط ؟؟

طيب لما العربية بتسخن وامشى بيها الصوت بيروح خالص وكمان لو مشيت بيها من غير ما أسخنها بلاقى الفتيس بيعض فى التانى كده وبيبقى كأنه تارس لازم أحمل على العصاية أو كارك دبرياج عشان تاخد التانى ؟؟

وحاجة كمان الفترة دى بقت العربية تترج جامد فى بداية التشغيل الصبح ولما أدوس دبرياج الرجة بتروح أو بتقل :))

وللعلم العربية مازدا 323 مو85 ..

وحاجة كمان كنت عاوز آخد رأيكم فى الموبينة والأسبراتير الإلكترونى
وياترى أيع ممكن يتنظم على العربية بتاعتى ويبقى كويس وكده

ومنتظر ردودكم ياحلويييييين

[mrastra]

للاسف اخى الكريم فعلا المشكلة بداخل الفتيس ونصيحة ما تحاولش تصلحة لانة هايصرف اد فتيس استيراد
اتكل على الله وهاتلك فتيس استيراد خمسة غيار .....فى واحد مشهور اوى فى مصر القديمة ( الحطابة) بتاع 323 ورخيص

[aboomar22]

اظن مشكلة دبرياج الصوت اللى بيظر ولما بتدو بيختفى دى بلية دبرياج ومشكلة النقل دى مشكلة ديسك والرجرجة اسطوانة اظن لو غيرت الطقم تتحل المشكلة بس اللى هيقول كده الميكانيكى بتاعك

[keko]

انا كان عندى الموضوع ده بالظبط وبتنرفز قوى لما صنايعى يقولى انت اللى مش واخد بالك مفيش صوت او يقولك ده صوت الزيت بيتقلب هوا انا عبيط مش عارف سامع ايه
عموما وان كنت بعت العربية من غير ما اعمل الصوت بس هو غالبا من بلية الدبرياج طالما لما بتدوس دبرياج بيروح اما موضوع العضة ده حاجة تانية اعتقد غويشة والله اعلم

[HOSSAM99]

و عليكم السلام و رحمة الله
حاول تكشف علي طقم الديبرياج
إن شاء الله العيب لن يتخطاه
ولو العيب مش من طقم الديبرياج يبقي حاول تكشف علي الفتيس عند ميكانيكي محترف ولو هوه هاتو إستيراد

[ggaamm]

للاسف اخى الكريم فعلا المشكلة بداخل الفتيس ونصيحة ما تحاولش تصلحة لانة هايصرف اد فتيس استيراد
اتكل على الله وهاتلك فتيس استيراد خمسة غيار .....فى واحد مشهور اوى فى مصر القديمة ( الحطابة) بتاع 323 ورخيص

منا اللى معايا 5 بارضو .. بس لو وصلت لفتيس هغير المكنة كلها بقى بالمرة لأن الموتور بدأ يدخن بصراحة وانا مش بحب التلصيم ... أنا كنت ناوى على موتور تويوتا كرولا تسعينات بس لقيته غالى :((

على العموم لو طلبت يا أما هعمر كله مرة واحدة يا أما هغير كله مرة واحدة وخلص
هههههههههه

بس لما المية تجرى شوية عشان العملية صاعبة دلوقتى
هههههههههههههه

وشكراً ليك ياباشا عالمساعدة

[ggaamm]

و عليكم السلام و رحمة الله
حاول تكشف علي طقم الديبرياج
إن شاء الله العيب لن يتخطاه
ولو العيب مش من طقم الديبرياج يبقي حاول تكشف علي الفتيس عند ميكانيكي محترف ولو هوه هاتو إستيراد

يارب ياباشا يطلع دبرياج ... ده أنا هدعيلك :d

[ggaamm]

اظن مشكلة دبرياج الصوت اللى بيظر ولما بتدو بيختفى دى بلية دبرياج ومشكلة النقل دى مشكلة ديسك والرجرجة اسطوانة اظن لو غيرت الطقم تتحل المشكلة بس اللى هيقول كده الميكانيكى بتاعك

ما المشكلة أنه مصر أنه فتيس
وشغال يقولى الدليل أن لما العربية بتسخ والزيت يلف بيهدى :))

وأنا كمان مش فى القاهرة وهنا الصنايعية بتفتكس لأن العربية نادرة شوية ومش معروفة :((

بس واضح أن فيه أجماع أنه طقم دبرياج لأنى سألت غيره قريب قالى تعالى ونبص على الطقم ولو فيه حاجة نغيره
أعتقد كده الرؤية وضحت أكتر

شكراً ليك ..

[ggaamm]

انا كان عندى الموضوع ده بالظبط وبتنرفز قوى لما صنايعى يقولى انت اللى مش واخد بالك مفيش صوت او يقولك ده صوت الزيت بيتقلب هوا انا عبيط مش عارف سامع ايه
عموما وان كنت بعت العربية من غير ما اعمل الصوت بس هو غالبا من بلية الدبرياج طالما لما بتدوس دبرياج بيروح اما موضوع العضة ده حاجة تانية اعتقد غويشة والله اعلم

ياريت تطلع حجات بسيطة ده يبقى يوم المنا والله
ههههههههه

الله يطمنك ياباشا وهشوف حد تانى لأن شغل الصنايعية ده بيجبلى الضغط :)