الكارينز ما بتسحبش....افيدونى ارجوكم

[mizo6]

ارجوكم يا خبراء واصحاب الكارينز افيدونى لان انا بصراحة قربت اقفل من العربية دى والسبب ان النهاردة وانا راجع على طريق اسكندرية الصحراوى ومشغل التكييف والعربية على وضع الاوتوماتيك وبضغط بنزين وحاسس ان العربية متكتفة وبعد سرعة 90 او 100 كل ما اضغط بنزين عدد لفات الموتور يزيد ويوصل الى5000 وصوت العربية يعلى فاضغط بنزين زيادة ببطء عشان تدى الغيار الاعلى الاقى الصوت يهدى شوية وعدد لفات الموتور ينزل الى 3000 ومع الضغط على البنزين الاقى الصوت يعلى تانى وعدد اللفات يعلى تانى .

نفس الموضوع اتكرر كتير و العربية متكتفة ومش راضية تزيد عن 120 روحت محول على وضع المانيوال فبداءت تسرع شوية بس ببطء ولما طفيت التكييف الوضع بدأ يتحسن اكتر.

الخلاصة ان عند تشغيل التكييف الوضع بتبرجل تماما مع العلم ان العربية عاملة 1100 كم فقط وكان معايا قبلها نيسان صنى وكان سحبها احسن مع العلم ان الناس قالولى العكس.

مرة تانية جربت اشد على طريق مفتوح مع تشغيل التكييف وحصل نفس الكلام وزادت لفات الموتور و الصوت عالى روحت محول العربية على وضع المانيوال لقيتها على التالت روحت مديها الرابع ورجعت تانى على الاوتوماتيك وضغطت بنزين راح الصوت بدا يعلى تانى وكذلك عدد اللفات رو حت راجع على المانيوال لقيتها واخدة التالت ...

بصراحة انا مبقيتش فاهم حاجة ارجوووووووووكم حد يفهمنى او يطمنى اعمل ايه والل انا باسوق غلط؟؟؟؟؟؟؟؟؟؟؟؟

مع العلم ان العربية خليجى سعودى وانا لسه عامل صيانة ال1000 كم

[mizo6]

معقول يا جماهو 12 مشاهدة ومفيش رد واحد

[S.S.E]

ياسيدى الفاضل لا تضغط على العربيه كده لأنها فى فترة تليين لحد ما هتوصل ل 10,000 كيلو وتعمل صيانة ال10,000 هتحس بفرق بعد كده

وده شيئ طبيعى فى أى عربيه ولا تقلق من شيئ.

[elewey]

ياسيدى الفاضل لا تضغط على العربيه كده لأنها فى فترة تليين لحد ما هتوصل ل 10,000 كيلو وتعمل صيانة ال10,000 هتحس بفرق بعد كده

وده شيئ طبيعى فى أى عربيه ولا تقلق من شيئ.

الكلام دة مضبوط جدآ

[SAMEH_FOUAD]

10,000 كيلو اية بس ياجماعة العربية اخرها فى التليين اول 5000 كيلو وبعد كدة اعمل اللى انت عايزة

وعموما الحركة اللى بتعملها العربية دية بيبقى عيب فى ال expansion valve او صمام التمدد

[ahmedhawas]

10,000 كيلو اية بس ياجماعة العربية اخرها فى التليين اول 5000 كيلو وبعد كدة اعمل اللى انت عايزة

وعموما الحركة اللى بتعملها العربية دية بيبقى عيب فى ال expansion valve او صمام التمدد

ياريت لو تقولنا ال expansion valve هيأثر إزاي على سحب العربية
وشكرا ليك يا فندم

[party_0000]

انا اللي اعرفه ان التليين اول الف كيلو مش 5 ولا 10 ؟!!
اكيد في حاجه غلط فعلا

[SAMEH_FOUAD]

ياريت لو تقولنا ال expansion valve هيأثر إزاي على سحب العربية
وشكرا ليك يا فندم

ال expansion valve دة معناة صمام التمدد ودة لية وظيفتين

1- تخفيف ضغط الفريون القادم من الكباس وودة بيتم عن طريق ابرة رفيعة بيمر منها سائل الفريون على صورة رشاش وطبعا بكدة بيقل الضغط بتاع السائل

2- التحكم فى كمية السائل الداخل للكويل

وطبعا لو اى اخفاق حدث فى عمل صمام التمدد بيؤدى الى ارتفاع فى ضغط الفريون وبيؤدى الى تباطىء فى السحب نتيجة لارتفاع الضغط داخل دورة التكييف

لاننا طبعا عارفين ان التكييف لما بيشتغل بيحمل على المحرك واللى بيقدر يشيل الحمل دة نسبة الهواء اللى بيزودها المحرك عشان مايبطلش او يبرجل , فلما يزيد الضغط علية اكتر من اللازم ويرتفع الضغط زيادة عن المعدل الطبيعى اكيد هيبقى فى تقصير فى عمل المحرك ومش هيكفى نسبة الهواء والبنزين دفع المحرك + حمل التكييف فبيحصل تقصير فى السحب

يارب اكون قدرت اشرح الطريقة باسلوب سهل ومفهوم