ارجوكم ساعدوني

[mah_almasry]

من شوية كان معايا واحد في العربية ووصلته ولما نزل قالي ايه الدخان اللي خارج من الكبوت ده . نزلت اشوف وفتحت سمعت صوت ميه بتغلي ودخان خارج من القربة اللي متوصلة بخرطوم علي الردياتير والقربة مفيهاش ولا نقطة وشوية وفتحت الردياتير ملقتش ولا نقطة ميه . قلت علي حدود معلوماتي اكيد عداد الحرارة جايب اخره . رحت اشوفه لقيته صفر ومفيش اي قراءة . المهم وقفت واحد ابن حلال قالي المروحة مش شغالة . وحطيت ميه للردياتير والقربة ورجعت البيت . وانا ماشي لقيت عداد الحرارة قاري قيمة . بمجرد ما بطلت العربية مفيش دقيقة لقيته نزل للصفر . ارجوكم افيدوني ممكن يكون حصل ايه . لان في امس الحاجة للعربية خاصة اليومين دول لظروف خاصة . وجزاكم الله خيرا

[abo_kanze]

السلام عليكم ورحمة الله...

يعني حضرتك المروحه مكانتش شغاله واشتغلت طبيعي دلوقتي(عشان ما تعملهاش معاك تاني)

بالنسبه للعداد يمكن هو في وضع اغلاق الكونتاك بيرجع للصفر ..جرب افتح الكونتاك وشوفه بيتحرك لما تفتح الكوناك ولا لا..

[mrastra]

اخى الكريم طبيعى جدا ان عداد الحرارة ما يقراش خالص لو ان الردياتير مافهوش مية وطبيعى جدا ان المروحة ما تشتغلش لو ان الردياتير مفهوش مية
مشكلتك تتلخص فى تسريب من مكان معين فى دورة التبريد ولو التسريب دة اتعالج هتلاقى كل حاجة بتشتغل بيطبيعتها

[mah_almasry]

اشكر تعاونكم

والله النهاردة قضيت يوم صعب في القصة دي ولسه مش وصلنا لحاجة . النهاردة غيرت ثرموستات المروحة علي كلام الكهربائي وحطينا ميه في الردياتير والقربة . وبعديها بمشوار واحد مش لقيت ميه ولا هنا ولا هنا . رحت للكهربائي حولني علي بتاع الردياتير . قعد يسلك ويغسل وقالي جرب العربية . فربنا يسهل بكرة تشتغل كويس . وكان في اقتراح من اقتراحات البشاوات اللي بينصبوا علينا اللي هما الصنايعية اني اغير غطا الردياتير بس لسه بكرة هشوف . الله المستعان

[ahmedhawas]

بالنسبة لموضوع إختفاء الميه من الردياتير ، فحاول تتفحص مسار دورة التبريد حاجة حاجة، جزء جزء ،زنقة زنقة:
وممكن تعرف العيب بنفسك (لو مكان تسريب الميه واضح هتلاقي تغير في اللون أو صدأ)
فياريت تفحص ما يلي وبالترتيب:

1- غطا الردياتير: ممكن يكون بيسرب
2- خراطيم الردياتير : وخصوصا من عند الأفيز
3- الردياتير : ممكن يكون مخروم
4- طلمبة الميه : بيكون فيها فتحة فايص (من تحت) وأحيانا بتسرب ميه لكن متخليش الميه تختفي تماما
5- الهيتر وخراطيمه : ناس كتير بتنسى الحتة دي (ممكن تكون هي السبب)

بعد كده ندخل في التقيل:
6- طبب الميه : موجودة في البلوك ، ولو بايظة هتلاقي صدأ أو إخضرار حوالين الطبب البايظة (بيتم عمل طبب نحاس جديدة عند الخراط)(الأوبل فكترا بي - كان فيها الموضوع ده عيب شائع)
7- جوان وش السلندر : وربنا يستر

والله أعلم

[mrastra]

انا مش فاهم يعنى اية بتاع الردياتيرات بيجرب
مفروض انة بيراجع على دورة التبريد بالكامل ويشوف التسريب منين
وبعدين لية الكهربائى غير الترومستات ......دة ممكن الترموستات الجيد يكون بايظ والقديم هو اللى شغال
لازم لازم تعرف التسريب منين لان دة اللى هايحل المشاكل كلها
وعاوزك تبص على الشكمان كدة بينقط مية ؟

[mah_almasry]

اسال الله ان يزيدكم علما ومعرفة

اولا انا شاكر لكم تعاونكم معي في حل المشكلة . النهاردة تابعت الميه في الردياتير الصبح ولقيتها يادوب قلت حوالي 2 سم من الغطا . فحست انه قد يكون طبيعي . ورحت مشوارين تلاتة وانا عيني علي عداد الحرارة كان تمام ومش وصل لقيمة خلاف المعتاد في المنتصف غالبا . وان شاء الله الصبح قبل ما ادور العربية هفتح الردياتير واشوف اخبار الميه تاني . انا خفت افتحه والعربية سخنة قلت بكرة الصبح . والله المستعان