طلب نصيحة - ميكانيكي محترم يعمل عمره

[أبو_حمزة]

محتاجين نعمل عمرة محرك لعربيه نيسان صني بتاعت جاري وطلب مني أشوف حد كويس لانه ملهوش في الموضوع خالص
احنا ساكنين آخر الهرم
فلو تكرم اخواني اللي عملو عمره ومن منطقتنا يدلوني على صنيعي شاطر بجد ومتجرب في عمره يبقى جزاكم الله خير
لأن أنا كمان عمري ماعملت عمرة موتور

[aboomar22]

يعنى اخوانا فى قسم نيسان هيساعدوك بس انا بشوف واحد متخصص نيسان عارف شارع احمد كامل اول فيصل الشارع الى اخره محافظة الجيزة اول لما تخش الشارع من ناحيه فيصل بيبقى اول شارع شمال امام فيلا البدراوى وجنبه محل قطع غيار نيسان انا معرفش كويس ولا مش كويس بس هو متخصص

[أبو_حمزة]

جزاك الله خيرا
أنا مش عايز احدد نفسي في متخصصين نيسان
العربيه موديل تسعينات ومفيهاش تكنولوجيا يعني أي حد بتاع ياباني يبقى تمام
بس يكون شاطر وامين

[Ashraf_Ibrahim]

انا اعرف اتنين ميكانيكية شاطرين جدا بس المشكلة ان الاتنين في شبرا
واحد في شبرا الخيمة والتاني في شبرا مصر !
اعتقد بعيد عنكم
للأسف معرفش حد في نطاق الجيزة والهرم !

[LORD.ADeL]

استاذ أبو حمزة فى مهندس مكانيكي فى شارع العشرين فيصل عند ملكه جوة وهو ممتاز صراحه جربت شغله فى ضمير
فى شغله صراحه ويجب من الاخر واي قطعه غيار مش بتاعت عربيه او مش الاصليه مش بيفتحها ويركب يقولك دي مش بتعتها وهاتلي بتعتها حضرتك اذا حابب تروح وتشوف حياة معه ازي ارسلي ع خاص ونحدد معاد واقبال حضرتك واديك له وتحياتى

[أبو_حمزة]

1000 شكر أخي الكريم
يا ريت توصف لي مكانه بالضبط

[Karim_Monir]

بعمل عمرة لزميل هرماوي عندنا في الحرفيين لسيراتو 2006 واول ما اخلص هاقولك النتيجة اللي اعرفة انه فوق الممتاز بس في الحرفيين
وفي محمد عبده اللي بيتعامل معاه محمد ممدوح زميلنا استشارى الدايو وممدوح مش بيرضي بشغل اي حد وده عندكم في منطقتكم على ما اتذكر

[أبو_حمزة]

نورتنى بمشاركتك يا اخى كريم
اى حد من طرفك بيكون ثقة و مستواه محترم و ده عن تجربة مش مجاملة
دلوقتى انا شغلى بقى فى اكتوبر و سكنى اخر الهرم فبقت الحرفيين بالنسبة لى بعته
فلو محمد ممدوح يدلنى على مكان محمد عبده و يأكد لنا انه تمام يبقى اريح ليا
اصل انا شكلى داخل على نفس الحدوتة دى
و نفس الاعراض حاصلة لواحد صاحبى بس هو مش عايز يصلح و عايز يبيع أو يفضل ماشى بيها لحد ما تجيب اخرها
المهم بقالى فترة مش عاجبنى سحب و صوت الموتور بس مفيش اى مشاكل تانية
الزيت بقاله 9 الاف و ما نقصش و البوجيهات مفيش عليها هسة اثر زيت و المياه تمام
عملت كبس امبارح و النتيجة ان السلندرات ال4 كبسهم ضعيف
شكلها كده صبابات ومعاها طقم شنبر بالمرة عشان الموتر يرجع جديد ان شاء الله

[أبو_حمزة]

و مستنى منك تحكى لما تفاصيل العمره و التقييمات كلها
و الدروس المستفاده
و جزاك الله خير

[Karim_Monir]

الله يكرمك يا ابو حمزة ولا نزكي على الله احد
العمرة هاحكيها خاصة ان الموتور راح في داهية بسبب حاجة تافهة جدا وربنا يسامحة اللي تهاون
وش التكيهات اتكسر ولحمة لحام تافه ودخل الموتور في جوان من ابو 25 جنية المصري مش جوان اصلي
وده سبب بخرة زيت واحتراق
لدرجة انك تشوف كميات زيت محروق داخل الموتور عاملة زي ما يكون فتافيت فحم عليها زيت محروق
بس تم اعادة خرط الموتور وشمايز جديدة وتنضيف الموتور بالكامل وشراء كل قطعة اصلية


ابعت لممدوح مباشرة هاتلاقية قاعد في الورشة او دايو على طول

[Khaled Online]

انا اعرف اتنين ميكانيكية شاطرين جدا بس المشكلة ان الاتنين في شبرا
واحد في شبرا الخيمة والتاني في شبرا مصر !
اعتقد بعيد عنكم
للأسف معرفش حد في نطاق الجيزة والهرم !

السلام عليكم
بعد إذن صاحب الموضوع، ممكن تقولنا اسم الميكانيكي الكويس اللي في شبرا مصر؟ وهل بيشتغل في ال VW Golf ولا لأ؟ وشكرا مقدما يا أستاذ أشرف

[Ashraf_Ibrahim]

السلام عليكم
بعد إذن صاحب الموضوع، ممكن تقولنا اسم الميكانيكي الكويس اللي في شبرا مصر؟ وهل بيشتغل في ال VW Golf ولا لأ؟ وشكرا مقدما يا أستاذ أشرف

هوندا باشا
هو شغال في كل العربيات الانجكشن -في الاساس هو شغال في توكيل غبور -
محترم جدا وأمين جدا ومصنعياته في الحنين جدااااااااااااااا
اسمه أشرف
شارع شبرا - شارع مسرة- امام مستشفى جراحات اليوم الواحد
مش ورشة هو بيشتغل لما بيخلص شغله في التوكيل قدام البيت عنده بس عنده كل حاجة لا تقلق يعني
بس قبل ما تروحله تكلمه وتقله العربية فيها ايه او انت عايز تعمل ايه عشان يقدر الوقت اللي هيشتغل فيها فيه ويقلك تروحله امتى بالظبط
وبالتوفيق ان شاء الله

[hamahomo]

انا عملت عمرة عند ميكانيكي في اول فيصل في تقسيم عمرو بن العاص والعمرة تمام وبقالي سنة وماشاء الله الماتور تمام وهو راجل امين ومحترم

[alnggar]

استاز اشرف ممكن اسم وعنوان ميكانيكي اللي ف شبرا الخيمه وف شبرا مصر ضروري عشان عربيتي تويوتا كريسيدا لسه شاريها من يومين ومحتاجه طقم شنبر وانا لسه جديد في المواضيع دي واسف ع الاطاله

[Kikototi]

ياترى اخبار العمرة ايه ، انا عايز اعمل عمرة لنيسان صنى 95 لسه عاملها نص عمره وش سلندر وجوان من اسبوعين بس شكلها فشلت وعايز ميكانيكي شاطر ومتجرب