ركبت بطاريه اكبر - وده النتيجه

[eng_maged]

القصه ده من وحي الخيال للاستفاده فقط

السلام عليكم
انا بطاريه عربيتي الاصليه كانت 40 امبير وحبيت اغيرها وجبت بطاريه 60 امبير جافه وحسيت بفرق كبير جدا وده النتيجه:

1- تسارع العربيه بقه احسن بكتير ومفيش عربيه بتعدي مني
2- السرعه القصوى عدت ال 200 مرتاحه طبعا ما الكهربا اقوى
3- ثبات العربيه في المنحنيات بقه حاجه تانيه خالص
4- الشنطه كبرت وبقت تشيل شنط اكتر


طبعا ده كان قسم الفتي والتاليف.
مش عارف ليه مؤخرا بقيت اسمع الناس بتقول كلام غريب كله فتي وتأليف وحبيت اوضع معلومه للجميع

اولا: ايه فايده بطاريه العربيه

1-انها تمد العربيه بالكهرباء اللازمه لتشغيل الموتور عند الدوران
2- تمد الكهرباء اللزمه للاجهزه الكهربائيه والسياره مطفيه زي الكاسيت والنور وكد
3- تمد الكهرباء اللازمه للاجهزه الالكترونيه والسياره تعمل اذا زادت الكهرباء المطاوبه عن الكهرباء الخارجه من دينمو الموتور

ده معناه ايه ان العربيه وهيا دايره بتعتمد بنسبه كبيره على الكهرباء اللي خارجه من الدينمو

ثانيا: يعني ايه 40 امبير

يعني اقصى كميه كهرباء ممكن تشيلها البطاريه هي 40 امبير وده ملوش علاقه بالفولت لان كل البطاريات 12 فولت
وتقدر تشبه البطاريه بزجاجه المياه هي كده كده هتشيل ميه بس في ازازه نص لتر وفي واحده لتر

طيب 40 امبير تفرق ايه عن 60
تفرق انك لو طافي العربيه ونسيت النور شغال
ال 40 امبير هتخلص مثلا في 8 ساعات
ال 60 امبير هتخلص في 10 ساعات

هو ده الموضوع كله ويارب اكون قدرت اوصل المعلومه

[JapRuleZ]

موضوع الشنطة ده انا شاكك فيه ............ :)

[ZALABANY]

حلوه جدا تسلم ايدك

[Elawany13]

أنا لما جبت بطارية 70 أمبير
الفرامل عندى بقت قوية جدا
ههههههههههههه

[sanhory]

اموت انا في الناس الفاهمة , تسلم ايدك والله انا تعبت مع ناس كتير عشان اقنعهم بالموضوع دا بس انت شرحتها بكل بساطة
100 100

بس انا عندي بقى لما عملت كدا و زودت الامبير في بطارية العربية تكييف البيت بقى يسقع احسن ههههههه

[homme49]

فى إحدى المرات إشتريت بطارية 70 din بدلا من 55 din بناء على نصبحة من موزع البطاريات بحجة أنها ستخدم الكييف ليصبح أقوى و لاحظت بعد الإستعمال أن عمرها كان أقصر من البطارية 55 DIN
و عندما سألت أحد الكهربائية الآخرين أخبرنى أن الدينامو الخاص بسيارتى مصمم على أن يخدم بطارية 55 DIN و ليس 70 DIN و بالتالى أصبح غير فادر على أداء الشحن بكفاءة

[SonaSteel]

انا لما مغيرتش البطارية صوت الماتور بقي هادي اوووووووووووي بعد 10 rpm

[Ashraf_Ashraf]

انا بقى عكسكم لما ركبت بطاريه اكبر السيفون مابيشتغلش هههههههههههههههههههههههههههههههههههه
عموما هو قوه البطاريه مرتبط بخرج الدينامو كل مازاد امبيره زادت قوه البطاريه المطلوبه

[sniperwolf]

طيب ياجماعة انا خرج الدينامو 120 امبير و البطارية عندى 66 امبير دة عادى ولا فية خطورة ؟

[medododo]

رأيك وحر فيه

[yoko]

طيب ياجماعة انا خرج الدينامو 120 امبير و البطارية عندى 66 امبير دة عادى ولا فية خطورة ؟

عادي ال66 أمبير يعني تقدر تدي 66 أمبير لمده ساعة يعني لو هيا فاضيه وشحنتها ب 120 أمبير هتتشحن في حوالي نص ساعة مش معناها إنك تقدر تديها لحد 66 أمبير بس

[Ahmed Nasser]

شكرا على الموضوع الروعة