مشكلة فى لانوس 2 (العربية بتنتش)

[waleed_home]

العربية عندى دايو لا نوس2 مو 2002 وعاملة 50 الف كيلو.
بس بتقابلنى مشكلة انى لما بامشى على الأول او التانى والعربية واخدة سرعتها وأجى اشيل رجلى من على البنزين احس ان العربية هتقف مرة واحدة و كأنى دوست فرامل وأحيانا بحس انها بتنتش لما اشيل رجلى من على البنزين وارجع ادوس تانى وبحس انه صعب انى اضبط رجلى على البنزين علشان اتفادى التنتيش ده.
فهل ده حاجة طبيعية ولا فيه خطأما . وشكرا

[ahmedsrs]

راجع على اسلاك البوجيهات والبوجيهات

[knightmido]

اعتقد انه عادى خاصة واضح ان حضرتك لسه مش متمكن فى موضوع السواقة ... بدليل انك بتقلق بسرعة وتحب تقلل السرعة وانت على التانى يعنى ماشى بطىء اصلا ... ولو عايز نصيحتى ف الموضوع ده ... وانت على التانى وعايز تقلل السرعة دوس دبرياج هتفصل تروس السرعة وبالتالى ممكن تدوس فرامل للدرجة اللى انتى عايزها ولو حبات ترجع تتحرك اسرع والعربية من وضع الحركة انقل على التانى ودوس بنزين مع الرفع التدريجى من الدبرياج .... وبالتوفيق

[waleed_home]

شكرا يا جماعة على الرد والإهتمام .
بس المشكلة مش فى طريقة سواقتى لإنى بتكلم على اساس انى ماشى فى وسط البلد حيث الذحام الشديد يعنى ما بلحقش اتحرك واحتاج اهدى تانى .

ثانيا سيارة والدى تويوتا يارس وعمرها ما بتعمل معايا كدة لما بشيل رجلى من على البنزين فجأة

بس احتمال يكون السبب فى البوجيهات لإنى ماغيرتهاش قبل كدة بس انا رحت لميكانيكى من فترة وسألتة عن تغيير البوجيهات قال لى ال موجود فى السوق مضروب متغيرهاش احسن .

وكمان انا ملاحظ ان العربية بتكركر كتير قوى.

[waleed_home]

فين ردودكم يا شباب

[ahmed1981]

راجع على تربيط العفشة وتربيط الأكسات والكبالن وكراسي الموتور
وقد تكون مشكلة كهرباء أو بوجيهات مثلاً أو ضبط حساس أكسجين

[MMamdouh]

العربية عندى دايو لا نوس2 مو 2002 وعاملة 50 الف كيلو

بس احتمال يكون السبب فى البوجيهات لإنى ماغيرتهاش قبل كدة بس انا رحت لميكانيكى من فترة وسألتة عن تغيير البوجيهات قال لى ال موجود فى السوق مضروب متغيرهاش احسن .

يا راجل يا طيب.... 50 الف كيلو بطقم بوجيهات واحد؟؟؟؟ احمد ربنا ان العربية بتدور اساسا

هات طقم بوجيهات NGK من موزع NGK نفسة او من ابو الحسن

MMamdouh

[mo3tazelgamal]

أنا ظهرت معايا شبه مشكله حضرتك وكانت المشكله فى الspeed sensor بس المشكله كانت بتظهر وتختفى وكان بيصاحب المشكله دى أن عداد السرعه يبقى تحت على الزيرو
تم الحل بعد تغيير حساس السرعه

[FLYINGPEUGEOT]

مادام مبتشمش ريحه يبقى نستبعد ان التيل يكون خلصان وقافش على الطنبوره
(بس بردو بص عليه بصه )

انا مش شايف انها مشكلة بوجيهات والله اعلم...وكمان النتشه دى مش نتشة كهربا

اكشف على مساتر الفرامل (ممكن تكون قفشه شويه)..

وبالنسبه للنتشه...... اكشف على سلك الاكسيراتير !!!