خبطة فى العفشة .. !!

[Ahmed Hamdy]

سلام عليكم ..
عربيتى ماروتى 94 ..
من كام يوم بدأت أحس بخبطة كده فى العفشة .. بحسها تحت دواسة البنزين تقريبا ..
بتحصل تقريبا لما أغير غيار وأرجع أدوس بنزين تانى و ساعات بتحصل وأنا طالع مطب ..

ممكن يكون سببها ايه ؟؟ هل ده حاجة فى علبة الدريكسيون ... ؟؟

[Ghamrawy]

ممكن يكون سببها ايه ؟؟ هل ده حاجة فى علبة الدريكسيون ... ؟؟

بالظبط كده و ياريت تراجع عليها كلها من بيضات الطرف للعلبة نفسها

[ahmedsrs]

سبب الموضوع ان شداد من شدادات الشكمان اتقطع او اتفك والشكمان بيخبط فى جسم العربية كل ماالعربية تاخد دفعة الغيار

[sab3aawy]

لو الصوت صوت نقرة بتسمع دائما مع وضع القدم البنزين فهى ممكن تكون حاجة فى العفشة لكن ليست علبة ديريكسيون، ممكن تكون قواعد موتور او مقصات او صليبة كوبلن او كاوتش ميزان

لو بستمعها مع المطبات الصناعية بنفس النقرة فدى اعراض مقصات او علبه ديريكسيون او كاوتش ميزان

بأخذ العامل المشترك نجد ان لدينا اتهام موجه للمقصات ولكاوتش الميزان ، اقترح عليك تبدأ بيهم

لو العيب مش فيهم وهذا مستبعد، بص على علبة الديريكسيون والأتياش الخاصة بها(البيض)، وقواعد الموتور وصلايب الكوبلن

[Ahmed Hamdy]

شكرا يا جماعة على الردود والاهتمام ..
باشمهندس سبعاوى ..
أنا بحس بصوت النقرة مع دوسة البنزين (فى اللحظة اللى العربية بتفصل فيها دبرياج وتبدأ تتحرك) بس مش دايما .. وبحسها برضه ساعات فى المطبات ..
هى العربية كمان كانت بتزيأ جامد أوى .. كشفت عليها لقينا المقصات بايظة وكاوتش شداد الميزان بايظ فغيرتهم ..
بعدها صوت التزييئ خف كتير .. بس لسه موجود لو ماشى فى حتة مكسرة .. وصوت النقرة دى لسه موجود برضه ..

الميكانيكى ساعتها قلتله بصلى على علبة الدريكسيون قالى كويسة .. بس كنت حاسس انى بيقولى كده عشان مكانش فاضى وكان عنده عربيات تانية عايز يشتغل فيها .. بس قبليه كنت رحت لعفشجى وقالى علبة الدريكسيون وحشة ..

معلش فى مشكلة كمان ... الكبالن كانت بتطقطق فى الملفات .. غيرت الكبالن الخارجى .. بقت كويسة ..
بعد ما غيرت المقصات وكاوتش شداد الميزان رجعت تطقطق فى الطوالى وساعات بسيطة فى الملفات .. ؟؟؟!!!!

ممكن تفسير .. ؟؟؟!!!