العربية بعد مشوار طويل بتقعد تقطع

[thedeveloper87]

السلام عليكم ورحمة الله وبركاته

عندي مشكلة في العربية من فترة طويلة ..... في الدوارة الصبح بتقعد تقطع وتغلبني وهي بارده لحد ما تسخن كويس.... المشكلة التانية ، لما اروح مشوار وامشي على 100-120 لمدة طويلة شوية ، ربع ساعة أو نص ساعة ، لما اجي اهدي وازود بنزين العربية تقعد تنتش معايا

المشكلة التالتة... حصل معايا كذا مرة قبل كده ، بكون ماشي عادي خالص وفجأة ألاقي كل لما ازود بنزين العربية تبطئ ، وكل لما ازود بنزين أكتر العربية تبطئ أكتر

أنا غيرت الآتي:
1. بوجيهات وأبلاتين وكوندنسر
2. الكاربيراتير وديته لمتخصص كاربيراتير وقال لي زي الفل ووديته لميكانيكي تاني خالص قال لي زي الفل
3. الاسبراتير تمام وما فيهوش مشكلة (حسب كلام الميكانيكي)

المشكلة من ايه؟

[mazenarays]

صديقى العزيز

بعد التحية بالنسبة للمشكلة دى كانت عندى فى سياراتى القديمة كيا ريو ودوختنى وأكتشفت فى الأخر أن العيب كان فى فلتر بيركب على طرمبة البنزين الداخلية وهو عبارة عن قطعه تشبة القماش وبتكون نشفت والمسام بتعتها انسدت.
أنا فكيت الطرمبة وطلعت الفلتر وغسلتة بماء وصابون سائل وفرشاه أسنان ثم شطفتة بماء عادى ثم غسلتة جيدا بالبنزين .
والحمد لله بعد ذلك اختفى هذا العيب تماما.
ولكن هذه الخطوات لانى لم اجد نفس المقاس جديد.
جرب وان شاء الله حتجيب نتيجة كويسة

[thedeveloper87]

ألف شكر ليك يا باشا

طب تنصحني أشتري واحدة جديدة أحسن ولا اوديها للميكانيكي وهو يفك ويعمل الحاجات دي؟

[ahmedhawas]

- شيّك عالكربراتير تاني عند مركز متخصص للكربتيرات .. (خليه يشوف الشفاط + أكس وباب .. مبوّش ولا لأ)
- نفس الأعراض اللي عندك بتحصل برضو لو خرطوم الراجع مسدود ، خصوصا ولو كنت فكيت تنك البنزين وركبته تاني
وتقدر تعرفها بنفسك لما تيجي تفتح تنك البنزين تلاقيه كان مضغوط جدا

[mazenarays]

الفلتر ده بيجى مع طرمبة البنزبن الجديدة ولكن اذا كانت الطرمبة سليمة عندك. فك الطرمبة ونظف الفلتر وجرب ولو تمام يبقى ليك الخيار لو تغيرها او لا

[ahmedeihab]

غير البوجيهات يا معلم علشان فيها رطوبه
و هتلاقى القصه دى اختفت تماما ^_^

[ahmedeihab]

البوجيهات اللى انت جايبها اكيد فيها رطوبه
لان البوجيهات اللى فى السوق كلها مضروبه

[HishamElgazzar]

إظبط الكربراتير هواء وإظبط الإسبراتير توقيت الشرارة ممكن تكون مقدمة أو مأخرة فبتطول معاك ممكن تعملها بنفسك سهلة جدا

[saadelden]

لو ترموستات الكوعه ملغيه عندك هاتعمل معاك كدا
بالذات اما تمشي علي سرعات عاليه و العربيه تبرد لازم تنتش لغايه ماتسخن تاني

غير كدا نضف الكربراتير و اكشف ع البوجيهات اكيد ع الاقل هتلاقيها مهببه
و ان شاء الله الوضع هايتحسن

[thedeveloper87]

شكرا على الردود يا جماعة

بالنسبة لثرموستات الكوعة فعلا ملغية وبتعملي مشاكل خصوصا في الشتا لما يكون الجو البرد الموتور بيبرد خالص وتقعد تنتش لحد ما تسخن تاني ، بس ما كانتش بتعمل كده زمان

بالنسبة للبوجيهات لسه مغيرها ومغير معاها طقم الكهربا وبتعمل كده برضه
بالنسبة للكاربيراتير رحت عند أكتر من واحد وبيقولولي كويس

اللي هيجنني إنها ممكن تيجي مرة واحدة كده ، لو بمشي على 100 أو 120 أجي ادوس بنزين بدل ما تسرع تبطئ ، وكل لما ادوس أكتر تبطئ أكتر.

واللي بيحصل كتير أوي معايا ، ممكن تبقى ماشية عادي (ممكن يبقى فيه نتش بسيط) بس لما اروح مشوار طويل شوية وانا ماشي على 100 أو 120 واجي أهدي ، واسرع بعدها الاقيها بتنتش ومخنوقة جدا

[Sehsss]

زي ما الرجالة قالوا، شوف الكاربراتير وغير فلتر البنزين

[sobhybakry]

كان عندى نفس المشكلة وكانت العربية بتبطل رحت لميكانيكى قالى مشط الاسبراتير بيقطع ولو قطع خالص العربية مش هتدور انا معايا شاهين اشتريت المشط 125 جنية وبعد مركبتة ماشاء اللة العربية اتظبطت تماما وقل استهلاك البنزن كمان