حد غير البلى الخلفى فى الشاهين قبل كده ؟؟؟

[Elawany13]

بسم الله الرحمن الرحيم
السلام عليكم ورحمة الله وبركاته

حد غير البلى الخلفى فى الشاهين قبل كده ؟؟؟
عندى فى العجلة الشمال لما بمشى على طريق مكسر
بسمع صوت نقره من ورا
كنت مفكر ان حاجه فى الشنطة أو الاستبن هوه اللى بيعمل الصوت
مرة فضيت الشنطة تماما ومشيت بيها لاقيت الصوت موجود
سألت الميكانيكى قالى البلى ورا بايظ
بس ممكن تمشى عليه على ما يعمل معاك صوت
ماشى بيها بقالى شهووووووووور
بس لاحظت اليومين دول ان صوت التخبيط زاد عن حده فى المطبات
ولاقيت كذا واحد بيقولى ايه التخبيط ده !!!
قولت مبدهاش بقى لازم اغيرهم

سألت النهاردة على البلى قالى الواحد بـ 20 جنيه صناعته ايطالى
الميكانيكى قالى هات البلى وهنفك العجل وتروح المكبس يركب هناك علشان البلى ميبوظش

والميكانيكى بيقولى غير الاتنين بالمرة
رغم ان البلى اللى فى اليمين حالته كويسه مش زى الشمال

حد ليه تجارب فى الموضوع ده ينصحنى بأى حاجه

[Elawany13]

اشتريت البلى ده
الواحده بـ 20 جنيه ... الإثنين بـ 40 جنيه
مكتوب عليه إيطالى

[saadelden]

انت بتحس بخشونه و انت ماشي ؟
صوت ونه علي بعض السرعات ؟

بلي العجل بيعمل مشاكل كتير و ساعات عيبه بيكون انه ركب غلط
ف طبعا خلي بالك لازم يركب علي مكبس مش دق
و مهم جدا تشحيم البليه كويس جدا

[Elawany13]

انت بتحس بخشونه و انت ماشي ؟
صوت ونه علي بعض السرعات ؟

بلي العجل بيعمل مشاكل كتير و ساعات عيبه بيكون انه ركب غلط
ف طبعا خلي بالك لازم يركب علي مكبس مش دق
و مهم جدا تشحيم البليه كويس جدا

منور يابشمهندس
لا مش حاسس بخشونة ولا حاسس بونة
بس جايز انا اللى مبحسش لإن كذا واحد يركب معايا (مرة كهربائى ومرة سواق تاكسى)وقالى البلى عاوز يتغير
وزى ما قولت كذا واحد واقف بره قالى ايه التخبيط اللى بيحصل ده من ورا
الحاجه اللى بحسها لما بكون ماشى على طريق ترابى مكسر بيحصل صوت نقرات زى ما يكون حد بيخبطلى على الصاج من عند العجلة الشمال
الميكانيكى مسك العجلة وبيهزها بتعمل الصوت ... مبوشة ياعنى .. وواضح انها بايظة
بس اليمين بيقول فيه تبويش بسيط مش زى الشمال
السؤال دلوقتى لازم أغير الاتنين ؟؟؟
مع العلم ان البلى اللى راكب هوه البلى الفاببريكة بتاع العربية
خايف اغير اليمين كمان وراكب واحده جديدة متكونش بنفس جوده الأصلية

[mrghost]

انا غيرت البليه اليمين ورا بس غيرتها برغم انها كانت سليمه (كنت فاكرها بايظه وفى الاخر طلع العيب من فرده الكاوتش ضربت سلك وعملت عالى وواطى وانت عامله رفه ) المه مغيرتها بس كانت تقريبا ب 50 جنيه يابانى على ما اعتقد وفعلا رحت لخراط ركبها على مكبس

[Sehsss]

متابع

[saadelden]

منور يابشمهندس
لا مش حاسس بخشونة ولا حاسس بونة
بس جايز انا اللى مبحسش لإن كذا واحد يركب معايا (مرة كهربائى ومرة سواق تاكسى)وقالى البلى عاوز يتغير
وزى ما قولت كذا واحد واقف بره قالى ايه التخبيط اللى بيحصل ده من ورا
الحاجه اللى بحسها لما بكون ماشى على طريق ترابى مكسر بيحصل صوت نقرات زى ما يكون حد بيخبطلى على الصاج من عند العجلة الشمال
الميكانيكى مسك العجلة وبيهزها بتعمل الصوت ... مبوشة ياعنى .. وواضح انها بايظة
بس اليمين بيقول فيه تبويش بسيط مش زى الشمال
السؤال دلوقتى لازم أغير الاتنين ؟؟؟
مع العلم ان البلى اللى راكب هوه البلى الفاببريكة بتاع العربية
خايف اغير اليمين كمان وراكب واحده جديدة متكونش بنفس جوده الأصلية

ياباشا كفايه عليها اوي كدا
دا انت لو غيرت الاربعه كمان يبقى خير و بركه!
عربيتك موديل 2004 يعني البلي شغال بقاله 8 سنين ما شاء الله ,ف اكيد هايظهر فيه مشاكل

لو راجعت كتالوج الصيانه بتاع عربيتك هتلاقي البلي بيتغير كل 40 الف تقريبا و بليه الكردان بردو ليها مده
يعني يعتبر صيانه دوريه للعربيه

علي فكره شركه النصر شغاله لغايه دلوقتي و عندهم قطع غيار اصليه
انا كنت هاروح اشوفهم يوم الخميس الي فات فرع غمره بس حصل حريق ف غمره و الدنيا كانت مقلوبه ف اجلت الموضوع شويه

[Elawany13]

انا غيرت البليه اليمين ورا بس غيرتها برغم انها كانت سليمه (كنت فاكرها بايظه وفى الاخر طلع العيب من فرده الكاوتش ضربت سلك وعملت عالى وواطى وانت عامله رفه ) المه مغيرتها بس كانت تقريبا ب 50 جنيه يابانى على ما اعتقد وفعلا رحت لخراط ركبها على مكبس

منور يابشمهندس
جبت منين البلية اليابانى اللى بـ 50 جنيه ؟؟؟
أنا دورت فى السوق مفيش غير البلية الإيطالى بـ 20 جنيه
واحد صاحبى عنده 131 بيقولى كان فيه زمان بلى رومانى بـ 70 جنيه الواحده
بس بيقول كان بلى محترم وممتاز ومعمر

[Elawany13]

ياباشا كفايه عليها اوي كدا
دا انت لو غيرت الاربعه كمان يبقى خير و بركه!
عربيتك موديل 2004 يعني البلي شغال بقاله 8 سنين ما شاء الله ,ف اكيد هايظهر فيه مشاكل

لو راجعت كتالوج الصيانه بتاع عربيتك هتلاقي البلي بيتغير كل 40 الف تقريبا و بليه الكردان بردو ليها مده
يعني يعتبر صيانه دوريه للعربيه

علي فكره شركه النصر شغاله لغايه دلوقتي و عندهم قطع غيار اصليه
انا كنت هاروح اشوفهم يوم الخميس الي فات فرع غمره بس حصل حريق ف غمره و الدنيا كانت مقلوبه ف اجلت الموضوع شويه

على بركة الله
نغير الاتنين وربنا ييسر الأمور
شكرا يابشمهندس

[HishamElgazzar]

البلى الأصلى موجود بشارع شامبليون خلف سينما أوديون ، أى بلى تانى مضروب ومش هيعيش زى الفبريكة

[Elawany13]

البلى الأصلى موجود بشارع شامبليون خلف سينما أوديون ، أى بلى تانى مضروب ومش هيعيش زى الفبريكة

مهو ده اللى قالقنى

ياعنى البلى العادى ده اللى فى الصورة هيعيش قد ايه تقريبا ؟

والبلى الأصلى اللى بتقول عليه صناعته ايه ؟ وسعره كام ؟

للأسف انا مش من القاهره علشان اعرف اروح اجيبه

[Elawany13]

تجربتى كاملة مع الميكانيكى والخراطين


روحت للميكانيكى
فك العجلتين الخلفيتين وفك الأكسين فى 5 دقائق
وفعلاً لاقينا فيه بوش بسيط هوه سبب الصوت اللى بيحصل فى المطبات

وبعدين قالى روح المخرطة يفكوا البلى القديم ويركبوا البلى الجديد على المكبس
وأوعى حد يدق عليه وإلا هتلاقى البلى فرط والأكس يخرج من العربية وانت ماشى وتبقى كارثة

............................................

روحت للمخرطة حط الأكس على المكبس وحركة لفوق وفك البلى القديم
وديه صورة البلى القديم

(بلى الفابريكة بتاع العربية صناعته تركى ومحفور عليه)
الغريب ان شكلهم حلو جدا واللى يشوفهم يقول عليهم جداد
أنا كنت متخيل إنى هلاقيهم متبهدلين !!!
[img3]http://img205.imageshack.us/img205/3361/img00199201203111144.jpg[/img3]

وبعدين ركب البلى الجديد ودخل بالمكبس
وديه صورة البلى الجديد
[img3]http://img546.imageshack.us/img546/7523/img00191201203081324.jpg[/img3]
مكتوب عليه إيطالى وسعر الواحده 20 جنيه
الاثنين بـ 40 جنيه

وفيه حاجه زى ورده كبيرة كده كانت ركبه فوق البلى واتخلعت لما فكه
سخنها على البورى علشان تتمدد
وبعدين حطها فوق البلى علشان تمسكه
والخراط خد مصنعية 20 جنيه

............................................
رجعت للميكانيكى وقولتله بالمرة شوف تيل الفرامل علشان انا حاسس ان الفرامل ضعفت شوية
قالى خد الطنبورتين دول على الخراط بتاع تيل الفرامل وامسح الشفه الصغيره ديه
روحت عملتها بـ 10 جنيه للطمبورتين
وقالى كمان خزنتين الفرامل الخلفيتين بيهربوا زيت وعاوزين يتغيروا
نزلت اشتريت خزنتين فرامل جداد ايطالى الواحده بـ 25جنيه
جبت الاتنين بـ 50 جنيه
وديه صورة خزنتى الفرامل الخلفيتين
واللى تحت صورة خزنة فرامل من القدام اللى اتخلعوا
[img3]http://img205.imageshack.us/img205/9444/img00192201203092045.jpg[/img3]
قولتله بالمرة نغير زيت الفرامل بص على الزيت كان لونة عامل زى السمنة السايحه أو العسل المصفر قالى الزيت ممتاز ولما جه يركب الخزنتين بتوع الفرامل فيه زيت نزل على الأرض لاقيته حد صابعه فيهم وتذوقهم(ههههههههه) وقالى زيت الباكم ده مغشوش طعمه حلو ولاد اللذين بيشغشوه بجلوكوز نغيره أحسن ... قولتله على البركة
روحت اشتريت علية زيت باكم تقريبا 400 ملل لونها أحمر على أسود إسمها بندكس
مكتوب عليها dot3 سعرها 13 جنيه
فك قربة زيت الباكم وغلسها بالبنزين
وحط الزيت الجديد طبعا أبيض شفاف تماما
وفتح عند خزن الفرامل الأمامية والخلفية وفضل يكرك ويزغزغ فى الفرامل لحد ما نزل الزيت القديم من المواسير
وقفل الشغل وخد مصنعية 30 جنيه
............................................
أخدت العربية جربتها على الطرق المكسرة
طبعا مزيكة حسب الله اللى كنت بسمعها من العجلة الخلفية شمال بالذات اختفت
والفرامل بقت ممتازة ولله الحمد
ربنا ييسر الحال وتكون كل حاجه اتعملت صح
وربنا يسهل والبلى يعمر فى العربية
على العموم انا محتفظ بالبلى القديم ولو جت فرصة ولقيت نوعيه بلى أفضل
لما انزل القاهره أو اسكندرية هشتريهم
فى انتظار الإفادة من الأخوة
ياريت يقولوا نوع البلى الأصلى وسعره وموجود فين
وياريت يكون فى اسكندرية علشان انا تقريبا مبنزلش القاهرة ومعرفش فيها حاجه

............................................

[HishamElgazzar]

البلى الnsk اليابانى الأصلى وسعره مش غالى
الأورام وبى ار سى والكلام التانى ده مضروب

[Elawany13]

البلى الnsk اليابانى الأصلى وسعره مش غالى
الأورام وبى ار سى والكلام التانى ده مضروب

أنت قلقتنى والله .... ربنا يستر
أشكرك يا أخى على النصيحة
فيه من البلى اليابانى ده لشداد الكاتينه ؟؟؟
علشان هغيره قريب ان شاء الله

ياريت لو حد يعرف مكان البلى اليابانى فى اسكندرية يقولى هو فين بالظبط وأنا هشتريه وأحتفظ بيه
وياريت لو حد اشتراه قريب يقول سعره كام ؟

[HishamElgazzar]

ألف مبروك يا صديقى على الصيانة ونتا كده عملت الصح ربنا يباركلك فيها يارب
ياريت مترميش الخزن بتاعت العجل اللى ورا وراجع زيت الكرونة بعد الشغل ده