صوت طقه من الفرامل على السرعات القليله

[shakshak2011]

السلام عليكم و رحمة الله و بركاته
إخوانى الكرام .. منذ فتره و أنا بسمع صوت طقه من الفرامل الخلفيه (عند الجنط الشمال) و أنا على السرعات القليله (من 10 الى 20) .. غيرت طنابير خلفيه .. و تيل خلفى .. و شحمت مسامير الكاليبر أكثر من مره .. و مع كل تشحيمه .. الصوت يروح لمدة يوم بالكثير ثم يعود مره أخرى .. مفيش أى تأثير على الفرامل .. الفرامل جيده جداً .. لكن هذا الصوت أزعجنى جداً و مش قادر أعرف سببه ..
روحت التوكيل أكثر من مره .. و مركز صيانه أكثر من مره .. و مفيش فايده .. أفيدونى أفادكم الله

[eng.m7md.ali]

طيب هقولك حاجة وتجربها
ياترى الصوت ده وانت بترجع مثلا وبعد كدة بيختفي ولا مستمر لو ماشي لقدام مع كل فرملة؟

[shakshak2011]

و أنا ماشى قدام و أنا راجع للخلف برضه .. بس شرط أكون على سرعه بسيطه .. أنا إتجننتتتتتتتتتتتتتتتتتت .. مش عارف إيه السبب

[foxawy]

السلام عليكم و رحمة الله و بركاته
إخوانى الكرام .. منذ فتره و أنا بسمع صوت طقه من الفرامل الخلفه (عند الجنط الشمال) و أنا على السرعات القليله (من 10 الى 20) .. غيرت طنابير خلفيه .. و تيل خلفى .. و شحمت مسامير الكاليبر أكثر من مره .. و مع كل تشحيمه .. الصوت يروح لمدة يوم بالكثير ثم يعود مره أخرى .. مفيش أى تأثير على الفرامل .. الفرامل جيده جداً .. لكن هذا الصوت أزعجنى جداً و مش قادر أعرف سببه ..
روحت التوكيل أكثر من مره .. و مركز صيانه أكثر من مره .. و مفيش فايده .. أفيدونى أفادكم الله

بص الحوار ده حصل معايا لمده شهر اتجنينت بصراحه من النادر ان حد يعرف بص يا معلم ده بيحصل معاك اما العربيه تمشى مشوار وعلى السرعات القليله اقل من 40 المشكله كلها من المسمار بتاع الكليبر بتاع الفرامل الطويل اللى حضرتك بتشحمه المسمار زى متقول كده خس شويه عشان كده بيلوق وبيخبط فى الحديد بتاع الفرامل نفسه تحله ازى بائه تجيب واحد جديد او لو مكسل تدور عليه او مش لقيه تلف على المسمار كله بال العزل الابيض اللى عند السبكين اللى هو بدل الشاش يعنى من الاخر زى التخشينه وتلف المسمار من اوله لاخره بس متلفش كتير عشان المسمار يعرف يدخل ومتختش شحم كتير عليه عشان ميزحلقش التخشينه واعمله فى المسمارين وانشا الله مش هتلقى صوت وتكرر العمليه ده كل اما يتفك تعملها من جديد مستنى ردك بالتوفيق

[shakshak2011]

أخى العزيز foxawy .. بجد مش عارف أشكرك إزاى .. ربنا يكرمك و يباركلك و يريح بالك زى ما ريحت بالى .. أنا كده فعلاً الحمد لله قدرت أحدد المشكله منين بالضبط .. دلوقتى يا غالى أنا عايز أخد رأيك فى حاجه .. تفتكر أروح التوكيل و أطلب إن الكاليبر يتغير كله .. تبع الضمان ؟؟ تفتكر الموضوع مستاهل إن الكاليبر يتغير ؟؟؟ .. ولا أشوف الحل الى إنت قلته و أريح دماغى .. و ألف ألف شكر على إهتمامك و ردك

[eng.m7md.ali]

طيب هقولك ياباشا على حاجة تانية جايز تكون هيا بعد ماتشوف مسمار الكاليبر
غالبا التيل زات نفسه بيلقلق في الكاليبر مع كل فرملة
انا عندي نفس الحوار وحلها حتة صاج كدة هيتزنق بيها التيل في الكاليبر او تخشينة زي تخشينة الشيشة كدة :))

[foxawy]

الاخ eng f3lix بيتكلم صح انا كنت فاكر كده بس طلع المسمار نفسه بس متغيرش الكليبر كامل عشان مسمار حله فى ايدك تغير الكليبر كامل شغل توكيلات عشان يريح باله وعلى فكره التوكيل لو اعد 1000 سنه مش هيعرف العيب ده جاى منين ابسط حاجه هيقول لا تغير الكليبر لا يشحم المسمار على اساس ان فى حاجه مفوته مش المسمار بيلوق يعنى مش هيعرف برضو العيب فين لو عارف العيب فين مش هيفكر يقولك اعمل تخشينه وكلام اللى انت فكره وعلى فكره انت لو رحت تغير الكليبر هيقولك مبلغ تخليك تمشى من غير فرامل احسن اسال مجرب

[Amr Axel]

حاجة من الاتنين
ياما المسمار فعلا و لو اني أشك في ديه
ياما التيل عندك خفيف يا تغيره يا تروح لميكانيكي يزنقه بعقب سيجارة كتخشيبة يعني كحل مؤقت لحد ما تغيرو ينضفلك مكان الكليبر و التيل بمية و رابسو لو التيل بينزل بودرة
و عشان تتأكد كده كده هتغير تيل ان شاء الله جيب واحد و ركبه و شوف و في الحالتين هيفضل عندك عشان لما تغير المرة الجاية

[shakshak2011]

الكاليبر قالى ب 4000 جنيه .. رقم خزعبلى .. بس هو تبع الضمان و ده الى خلانى أقولكم أروح و أطالب بكده .. عموماً أنا بإذن الله رايح بكره التوكيل .. و هخليهم يغيروا المسمار بواحد تانى أو أشوف موضوع إن التيل بيلق .. بس هو الى مخلينى مستبع إن التيل يكون فيه حاجه .. إنى مغير التيل بقالى شهر بس .. يعنى التيل جديد .. هوافيكم بالأخبار .. و ألف ألف ألف شكر بجد على إهتمامكم و مساعدتك .. بارك الله فيكم

[foxawy]

لا بس انشا الله اكيد المسمار متلقيش حوار تانى يخليك تلف حولين نفسك

[shakshak2011]

هو فعلاً طلع المسمار يا رجاله .. و أنا طلعت إنى بره الضمات بقالى فتره كويسه و التوكيل مش واخد باله .. المهم .. لقيت المسمار فى التوكيل بكاممممممممممممم ؟؟ تخيلوا .. لقيته ب 1000 جم .. المسمار ب 1000 جم .. مش عارف إيه التهريج ده .. أنا هعمل الى قلتلى عليه يا foxawy .. و بلا تهريج التوكيل .. بجد مش ممكن .. كنت إمبارح هناك .. و شحموه تشحيمه محترمه .. و بقالى يوم أهه مش سامع الصوت ... أول ما يبدأ يصوصو تانى .. هعمل التعديل الى قلتلى عليه ده

[foxawy]

هههههههههه 1000 مسمار ليه يعنى فولازى ولا ايه انت لو شوفت اساسا المسمار متدفعش فيه 20 ج اصلا وموضوع الشحم ده ملوش لزمه عشان تكون عارف لازم التخشينه اللى قلتلك عليه

[shakshak2011]

بدأ يصوصو تانى يا foxawy .. بقولك صحيح يا كبير .. هو ماينفعش إنى أعمله عند المخرطه ؟؟؟ .. ولا مش هينفع علشان هو مسمار فولازى ب 1000 جنيه هههههههههههههه .. ولا من رأيك الحل الى قلتلى عليه كفايه ؟؟

[foxawy]

بص انا عايز اجيب انا كمان مسمار بس مكسل ادور ..بس الاماكن اللى مفروض نرحها هما زى ما انت قلت ممكن تلقى عند خراط ممكن يخلص الحوار ده اوى تنزل على حاجات استراد وده اللى انا شيفه صح اما تلقى مكان او حل ابقى قولى