في حاجه غريبة جدا حصلت معايا

[eldeplomasy]

عربيتي الشاهين -ليس البي ام ال320 لاني لسه مستلمتهاش- 1600 سي سي موديل 2006 عامل بيها حوالي 40000 كيلو ولكن عند ال30000 كيلو كنت بسمع صوت التاكيهات عالي جدا ورحت التوكيل علشان يضبطوهالي وهناك قالولي ده سير الكاتينه نطر او حد ركبه غلط وتنى الصبابات ولكن طبعا محصلش معايا حاجه زي كده المهم رحت لميكانيكي مختص تاكيهات بره ضبطهالي والصوت خف شوية لكن كان برده مسموع ورحتلهم تاني الشركة بعدها بفترة وضبطوهالي عادي محدش قالي انها صبابات وكلام من ده ولكن فضل برده صوت التاكيهات موجود وواضح وظاهر وخصوصا لما اكون في شارع فاضي وبالليل بسمع صوت التاكيهات وواضح اوي وفضلت على كده لحد ال39000 كيلو ومن كام يوم غيرت سير الكاتينه في التوكيل ولكن الحاجه الغريبه جدا اللى حصلت معايا ان بعد تغيير سير الكاتينه سحب العربيه بقى فوق الممتاز لدرجة اني كنت حاسس اني راكب عربيه جديده زيرو وقبلها العربية كانت بتجيب ال160 يادوب لكن بعد التغيير كنت مسافر الكس ومشغل المكيف وراكب معايا 5 أشخاص غيري وغير الشنط وجبت بيها بكل سهولة 170 وصوت الموتور بقى هادي جدا جدا جدا والغريب بقى اني مش سامعلها صوت تاكيهات خااااااااااااااااااااااااااااااااااااااااااااااااا اااااااااااااااااااااااااااااااااااااااااااااااااا لص وانا قاصد اطول في خالص علشان انافعلا مش سامع اي صوت تاكيهات خالص خالص

معلش طولت عليكوا لكن قلقان يكون ركبوا السير غلط او حاجه زي كده فتتوقعوا ايه يكون اللى غير صوت وعزم الموتور بالشكل ده؟؟؟

[WalidAdel]

هوه المفروض ان تغير عزم العربيه و كده سببه ان تكون العربيه كانت مأخره شويه في التقسيمه بمعني اخر ان توقيت كبس الهواء مع رشة البنزين مع الاشعال من البوجيه في تاخير حاجه بتحصل قبل حاجه و لذلك لما حضرتك غيرت الكاتينه قام الميكانيكي بظبط التقسيمه بتاعة العربيه من جديد و علشان كده السحب اختلف

دا احتمال لكن اصبر و شوف بقية الاراء حتقول ايه

[eldeplomasy]

لكن انا غيرت سير الكاتينه في التوكيل ده اولا

ثانيا السير اللى كان قبله كان راكب فيها وكانت العربية جديده زيرو يعنى المفروض كان راكب بالضبط وهي جديده فعلا مكنتش بسمعلها صوت تاكيهات لكن جت بعد كده ظهر الصوت وبدأ يبقى شديد والباقي زي ما حكيت

والله أعلم انا خايف بس يكون راكب غلط ويأثر على الموتور بعد كده خصوصا اني مستمتع بيها وهي بتجري وبشد بيها كتير

[eldeplomasy]

فين المهندسين اللى يريحوني لحسن قلقان شوية

[eslamspirit]

انا مش فاهم انت زعلان علشان العربية بقت كويسة ولا اية؟؟؟

[eldeplomasy]

لا طبعا بس خايف يكون اتركب غلط ويأثر على الموتور بعد كده خصوصا اني بحاول احافظ عليها جدا لاني هبيعها وقت ما استلم ال320

[shoudy2005]

ازاى يعنى اتركب غلط و لو اتركب غلط هتكون العربية لسة عايشة معاك طبيعى ان الصوت اللى كنت بتسمعة مش صوت تاكيهات ده صوت السير لأنه واسع شوية و لما لتغير الصوت راح لانه ماسك كويس متقاقش نفسك فىحاجة بسيطة

[د.محمود صلاح]

ممكن مع المطبات والحر يكون السير رخى والتروس نطت سنة واحدة فعمللك صوت فى التاكيهات ولما أعيد ضبط كل حاجة الصوت راح ! ( احتمال يعنى مش فتوى منى ولا حاجه )