حد يرحمنى من الميكانيكية الله يخليكم

[julieta]

الميكانيكى بيقول عمرة كاملة مبدئيا 2000
لكن نص عمرة حوالى 750
بس انا كده عاوزة اعرف هتيقى غرامة كبيرة وممكن تفتح معايا فى اكتر من 2000 وهل هتبقى كويسة بعد كده ولو عملت العمرة تقعد اد ايه تانى كويسة خصوصا وانا استعمالى ليها يوميا حوالى 20ك فقط

[MMamdouh]

مهو اللى مستغربلة ان بعد 69 الف فقط و 20 كيلو فى اليوم حصل كدة... عموما انا مقدرش اعرف ولا حتى الميكانيكى الا لما يفتح الموتور و يعرف مدى الضرر قد ايه

MMamdouh

[julieta]

على فكرة انا شاريها من شهرين بس وطبعا معرفش اللى قبلى استعمالوا ايه فيها بس عاوزة اعرف الافضل اصلحها مهما كانت التكلفة والا ابيعها خصوصا وان لو فكرت ابيعها فيما بعد مش هتجيب زى مابيقولولى
ملحوظة انا واخداها ب 19000

[MMamdouh]

قولتيلى بقى...

يبقى ممكن صاحب العربية الاولانى فرتكها... انتى عندك ميكانيكى ثقة؟ اصل اما العربية تتصلح او تتباع و لما تتباع كدة ممكن تخس فى السعر

المهم تلاقى ميكانيكى ثقة يفتح الموتور و يحل المشكلة و مش المفروض اصلا العربية تعمل كدة بعد 69 الف فقط

MMamdouh

[harphosh]

عربيتى يا جماعة وانا ع الاولانى وبزود بنزين بتطلع دخان كتير ابيض لكن لما ارجع لورا مش بتطلع دخان خالص مع انى بكون مزودة بنرين برضه ليه؟؟؟ارجو الرد عشان الميكانيكية دوخونى وبيقولولى عاوزة عمرة

الأخت الزميلة/
لو الدخان عبارة عن دفعة واحدة بعد الدوارة مباشرة ولمده بيسطة ويختفى يبقى الموضوع مقتصر على تغيير جلد صباب وده موضوع بسيط
أما لو كان الدخان مستمر حتى بعد ما العربية تسخن يبقى فى الغالب محتاجة لطقم شمبر ( نصف عمره ) ومن الصعب جداً إنها تكون عايزة عمرة كاملة بعد 69 ألف فقط وبإذن الله تكون حاجة خفيفة بس دى كلها توقعات لازم العربية يتكشف عليها الأول علشان تحديد العيب بدقة

[julieta]

انا مش عاوزة اقولكم ان الميكانيكى قالى فيه ترزيع فى الموتور وده معناه انها محتاجة عمرة ضرورى بس انا مش مصدقاه خصوصا وان صوت الموتور وانا ماشية ناعم الا لما ازود قوى اسمع فعلا صوت زى ماتكون مديها غيار اكبر من سرعتها
عموما يا جماعة انا متشكرة اوى اوى اوى على رودودكم عليا واهتمامكم ويمكن اروح سوق الجمعة وابيعها واخلص عشان اريح نفسى والناس معايا

[julieta]

سؤال تانى من فضلكم
حد يعرف ميكانيكى كويس وفاهم فى الماروتى عشان يحددلى بسرعة قبل يوم الجمعة
عشان لو التكلفة بسيطة اصلحها

[aif]

69000 ده قراءة العداد ... ممكن اللي باعلك العربية كان لاعب في العداد .... ده بقى شيء شبه متكرر دلوقت ... وممكن تكون عاملة 169000 يعني 69000 بعد العداد ما قلب
لا تأخذي قراءة العداد في اعتبارك

[MMamdouh]

69000 ده قراءة العداد ... ممكن اللي باعلك العربية كان لاعب في العداد .... ده بقى شيء شبه متكرر دلوقت ... وممكن تكون عاملة 169000 يعني 69000 بعد العداد ما قلب
لا تأخذي قراءة العداد في اعتبارك

هى العربية موديل كام؟؟ ممكن دة برضة يدينا مؤشر اذا كان فيه لعب فى العداد ولا لا

MMamdouh

[julieta]

العربية موديل 94

[MMamdouh]

she is 14 years old

اعتقد ان احتمالية ان العداد يبقى ملعوب فيه كبيرة... انا عربية والدى موديل 99 و عاملة 125 الف

لازم ميكانيكى يفتح الموتور و يعاين ايه الاضرار

MMamdouh

[AhmedTareq]

بعيها وارتاحي منها

[MOHAMED ABD EL SHAFY]

لا .... لا تبيعيها دى مشكلة بسيطة ومش مستاهلة البيع ... لو كل واحد باع عربيتة عشان شوية دخان يبقى محدش هيركب عربيه...الحل فى الاتى:
1- يجب سؤال ميكانيكى اخر وثانى وثالث عشان انا شاكك ان الميكانيكى الاول بيضحك عليكى (بخصوص موضوع الترزيع) عشان ياخد منك فلوس عمرة كاملة. بدل ما يعملك طقم شنبر
وغالبا الميكانيكى لو معندوش ضميير بيستغلوا اى واحدة (ست) عشان مش هتسلك معاهم واخرها هتدفع وتمشى.
2- المشكلة عندك بنسبة 90% هيا طقم شنبر بكتييرة (750) بالمصنعية وبكل حاجة
3- او تكون جوان وش سلندر بكتييرة (من 100 الى 150) بالمصنعية بالجوانات وتكونى كرماه كمان
لاكنى لا اعتقد انها عمرة كامل
اعراض العمرة الكاملة:
1- نقصان المياه والزيت
2- لون الزيت طحينى
3- دخان ازرق مستمر مع اى دوسة بنزين
4- صوت ترزيع وعالى من الموتور
5- السيارة تسيير على سرعة منخفضة ومش بتسحب خالص

[sab3aawy]

فيه اختبار بسيط ممكن تخلى ميكانيكى يعملهولك او تعمليه بنفسك لو انك عندك خلفية بسيطة فى الميكانيكا

فى خرطوم اسمه خرطوم الفايض او الفايظ، ده بيكون خارج من جسم الموتور او من وش السلندر ورايح الى عمة الكاربراتير، ده شغلته انه يطرد الهواء الزائد من عملية الكبس الى الكاربراتير

ندور العربية ونمشى بيها لحد ما تسخن لحد وضعها الطربيعى ، وبعدين بنفك الخرطوم ده من ناحية الكاربراتير ، وندور العربية نلاحظ اللى خارج من الخرطوم

لو خارج بخار ابيض من الخرطوم بدون تزويد بنزين فده معناه ان الشنابر استهلكت ومحتاجة شمبر او عمرة

لو مش خارج بخار بدون تزويد لكن خرج بخار ابيض كثيف(زي دخان الشيشة كدة) مع تزويد البنزين، بيقى برضه العربية عايزة شمبر او عمرة،

لو مش خارج بنزين بدون تزويد لكن خرج بخار خفيف(زى ما يكونو شوية تراب ونفختهم) او مافيش بخار خالص يبقى لسة الشنبر كويس خروج دخان من الشكمان يشير الى كاوتش صباب فقط

العمرة لو اتعلمت كويس بترجع الموتور كويس لكن ده يتوقف على الصنايعى