عالم دخان دخان

[memoo305]

صراحة كل مادور العربية الصبح وأشوف كمية الدوخان الي طالعه من الشكمان يجيلي إكتئاب. لآني غيرت الإنجكشن يواحد جديد بقالة 3 شهور ( بتاع هيونداي تمنه750جنينة) ومعاه غيرت البوجيهات مشيت عدل شوية وبعدين رجع الموضوع تاني (دخان كثيف جداً يستمر لمدة 30ثانية : دقيقة في أول الدوراة الصباحية)
روحت للميكانيكي صاحب مشورة رشاشات الهيونداي الجديدة حط العربية على الجهاز قالي الرشاشات زي الفل والمشكلة في حساس الشكمان
قمت مغير حساس الشكمان .برده محلش الموضوع.
تناقشت مع أ/ محمد ممدوح في الموضوع ده هو شايف أن الإنجكشن الجديد مضروب.
ماذا أفعل أنا بقيت صارف على حوار الدخان ده أكثرمن1400جنية والدخان منظره وحش قوي في العربية الصبح
(العربية دايو لانوس 2002 عاملة 70000كم)

[Abdallah]

انا شاكك برضة فى الرشاشات , هل بتحس بحاجة فى عزم العربية يعنى فى المطالع او كدة ولا العربية عادية معاك؟؟؟
هل كان فى لمبة شيك انجن نورت عندك وطفت بعد كدة ولا محصلش ؟؟؟
معنى ان العربية بتهبب يعنى فى حاجة فى عملية الحرق مش مظبوطة يا اما بنزين زيادة يا اما هوا زيادة...

[hazem_khidr]

بص الصراحه انت صرفت علي الارض الاول كان لازم تجيب الرشاشات بتاعها و خصوصا انها مش موجوده مش محتاج انك توفق رشاشات من عربيه تانيه استعوض ربنا في اللي صرفته و هات رشاشاتها الاصلي و بعدين ضبط موتورك و انصحك تغير الميكانيكي اللي قالك كده علشان شكله كده مش بيفهم حاجه خالص .

[Abdallah]

مع احترامى لرأى الاستاذ حازم بس انا اختلف معاه تماما لان رشاشات الدايو GM سيئة جدا وعمرها الافتراضى قصير جددا وايضا غالية جدا فأعتقد ان الافضل تعمل زى ما محمد ممدوح تفضل وقال انه حط رشاشات بى ام دبلوي 316 موديل 90 واشتغلت كويس ...

[hazem_khidr]

مع احترامى لرأى الاستاذ حازم بس انا اختلف معاه تماما لان رشاشات الدايو GM سيئة جدا وعمرها الافتراضى قصير جددا وايضا غالية جدا فأعتقد ان الافضل تعمل زى ما محمد ممدوح تفضل وقال انه حط رشاشات بى ام دبلوي 316 موديل 90 واشتغلت كويس

معاك يا باشمهندس ما قولناش حاجه بس الرشاشات اللي ركبها برضه ما ضبطتش العربيه يبقي ايه الحل؟؟؟ نسيبها كده ولا نجيب رشاشات العربيه الاصليه ولا نشوف حاجه تانيه متوافقه معاها بس اللي حصل في عربيته دا مش صح اطلاقا

[Abdallah]

مش شرط انه يكون عيب رشاشات يا باشا ممكن يكون فى حساس هواء بايظ او فعلا الرشاشات الى جابها مضروبة وبتنقط او ان كومبيوتر العربية نفسه مش مظبوط وبيدخل بنزين زيادة , للاسف فى احتمالات كتير ولكن الحقيقة انا مبحبش حاجة الهيونداى لانها اسوء من الدايو.

[hazem_khidr]

حساس هواء بايظ

مش ممكن يكون حساس الهوا علشان حساس الهوا لو عطلان العربيه حتستهلك بنزين زياده و حتقطع منه علي الطريق.
و علي فكره ممكن بقي تكون حاجه تانيه ما اخدناش بالنا منها خالص انها يكون الموتور بدا يفوت علشان بيقولك دخنه بتيجي الصبح و بتروح و ممكن تكون بتيجي و هو ماشي و مش واخد باله منها (مش حيبص في المرايه كل شويه و يلاحظها او ممكن تكون دخنه خفيفه) تاكد من لون العادم لو لونه ازرق يبقي دا حرق زيت و يبقي الموتور مش مضبوط و في نهايه عمره و لو لونه جايب علي رمادي يبقي دا بنزين مش محروق كويس

[memoo305]

شكراً ياجماعة على إهتمامكم بالموضوع .أنا روحت إمبارح للميكانيكي تاني.حطها على الجهاز السكانر وقالي لايوجد بها مشكلة بمجموعة الوقود. ولكن قالي على حاجة خوفتني قالي ممكن يكون كاوتش صباب . والحرق إلى في أول الدوارة ده زيت مش بنزين .(بس الزيت مابنقصش) على العموم أنا هاركنها يومين وهابص على لون العادم إلى بيطلع لو أبيض يبقى أمر الله نفذ (ممكن أبيعها في الحالة دية) . لو أسود يبقي الميكانيكي ده .... وهاروح لحد بيفهم.

[Abdallah]

طالما الزيت مبينقصش يبقا معتقدش انه حرق زيت, ويا حازم انت لو عربيتك موتورها مفوت هتحس بيه طبعا , بيبقا فى فرق فى الاداء وخاصة فى السحب وبالذات مع التكييف .

[sokasoon]

حساس هواء بايظ

يكون الموتور بدا يفوت علشان بيقولك دخنه بتيجي الصبح و بتروح و ممكن تكون بتيجي و هو ماشي و مش واخد باله منها (مش حيبص في المرايه كل شويه و يلاحظها او ممكن تكون دخنه خفيفه) تاكد من لون العادم لو لونه ازرق يبقي دا حرق زيت و يبقي الموتور مش مضبوط و في نهايه عمره و لو لونه جايب علي رمادي يبقي دا بنزين مش محروق كويس

يا راجل يا حازم دى عاملة 70000 بس مالحقش يا راجل

موضوع الموتور بيفوت ده معتقدش انو يكون بيفوت تماما

هو يغير الرشاشات برشاشات كويسة ومش لازم تكون GM الاصلية

[hazem_khidr]

يا راجل يا حازم دى عاملة 70000 بس مالحقش يا راجل

موضوع الموتور بيفوت ده معتقدش انو يكون بيفوت تماما

هو يغير الرشاشات برشاشات كويسة ومش لازم تكون GM الاصلية

يا وليد ما اخدش بالي من انها ماشيه اد ايه و بعدين ممكن كتر القرص علي العربيه و الحرق جامد يفوت الموتور في اول 10000 كيلو مش 70000 الف كمان انا قصدي مش مفوت بالمعني الاهر بس يكون في بستم مش كويس مش الموتور ضايع يعني.و عموما دا احتمال .عموما هيا رشاشات الهيونداي دي ممكن تكون هيا اللي عامله كده

[mtageldeen]

يا جماعة أنا عارف إن الموضوع قديم جداً

بس العجيب إن صاحب الموضوع لم يخبرنا عن حل مشكلته

يعني الواحد لما يكون عنده مشكله يسأل ويتمني إن الناس تساعده وأول ما يعرف الحل يسيب الناس اللي بتابع تضرب أخماس في أسداس

أنا أتمني إنها تكون ثقافة عامة (عرض المشكلة للبحث عن الحل ثم ذكر الحل) للفائدة

[magdy177]

لو الدخنه الصبح بس متخافشى لان ده معناه ان كاوتش احد الصبابات بيسرب بعض الزيت على وش البستم وبكده هتلاقى الزيت بيقل كل فتره والدخنه بتختفى باقى اليوم.........فممكن تغير طقم الكاوتش للصبابات مع تغيير وش السليندر...........او لا تهتم بس تلاحظ مستوى الزيت كل 1000 كم..........