صفاره

[khaled sabry]

السلام علكم و رحمة الله
الناهرده الصبح اول لما دورت و بسخن العربيه لاقيت صوت صفاره عاليه و بتزيد كل لما بزود بنزين
هى بالظبت نفس صوت الصفاره اللى بتطلع من السيور لما تكون مرخيه او قديمه
لكن الفارق ان الصوت مش بيروح مع RPM العالى بالعكس ده بيظهر بعد RPM 1500 و بيزيد بعد كده و استمر الصوت ده معايا لغايه لما روحت الشغل ( بس عقبال ماوصلت الشغل بقى الصوت يظهر بعد 2000 rpm و ده بعد ساعه سواقه )
مع العلم ان الناهرده اول مره تعمل الصوت ده ولما بصيت على السير لاقيته مشدود كويس
فياريت حديساعدنى لأنى حروح الميكانيكي الناهرده و مش عاوزه يحور عليا
هل ممكن يكون العيب فى رومان بلى حاجه مثلا ؟؟ ولو كده تتكلف كام الحوار ده (وقت و فلوس)

[khaled sabry]

ماحدش رد عليا للاسف
مش عارف ليه قسم الورشه مابقاش زى زمان ( و اقصد بزمان دى يعنى سنه 2009 و 2010 ) و بقيت المشاركه فيه قليله اوى
المهم بعد البحث على النت لاقيت ان مشكلتى تنحصر فى ثلاث حاجات
1- سيور 2- بلى الدينامو 3- بلى طلمبة الميه

طبعا السيور حوارها سهل لكن اللى كنت خايف منه هو الدينامو و طلمبة الميه
فقولت انزل اجرب فى وقت البريك علشان اطمن
فمن خلال المشاركات السابقه عرفت علشان تتأكد ان المشكله من السير تجرب الاتى
1- ترش ميه علي السير نفسه و العربيه دايره - عملتها و مافيش اى تأثير
2- ترش wd40 على الطنبوره من جوه - برضه عملتها و مافيش تأثير
3- اخر حاجه تحط حته شحم صغيره على السير - عملتها و الحمد لله الصوت اختفىىىى بس ربنا يستر و مايرجعشى الصوت تانى على السرعات العاليه و انا مروح

و الحمد لله كده اطمنت ان المشكله فى السيور يعنى كبيرها انى اغير السير كله و اريح دماغى