البطارية انفجرت.......يا ترى ايه السبب؟؟

[الصيداح]

سلام الله عليكم

من كام يوم العربية مرضيتش تدور الصبحية ففكرته المارش لأنه كان علق مرة واحدة قبل كدة المهم زقيتها ودارت بسرعة
تاني يوم نفس الموضوع بس اكتشفت إن أنوار العربية ضعيفة والسارينة صوتها ضعيف والتسجيل مش شغال فشكيت إنها البطارية أو شحن الدينامو تعبان بس مؤشر شحن الدينامو كان عالي
المهم زقيتها ودارت وعلى هذا المنوال أربعة أيام
ملحوظة ...مؤشر الدينامو طول الوقت كان زي الفل
المهم النهاردة زقيتها ورحت بيها مشوار طويل شوية ولما روحت قلت يمكن تكون شحنت وبمجرد ما وصلت البيت وطفيت العربية دورت مارش كدة أشوفها هتدور ولا ﻷ
مدرتش غير بالشارع كله حواليا بعد صوت انفجار رهيب ودخانه كثير خارجة من كبوت العربية
فتحت الكبوت لقيت البطارية نصفين

1-فإيه سبب اللي حصل ده
2-هل ممكن يكون الدينامو شحنه زيادة
3-هل لو جبت بطارية جديدة في خطر
4-البطارية جافة تركية الصنع بقالها 3سنين فهل ده عمرها الإفتراضي
5-أي نوع تنصحوني بيه

أفيدوني بارك الله فيكم علشان أشتري واحدة جديدة النهاردة
وجزاكم الله خيرا

[shaddadfalcon1]

انا شايف ان دي حاجه مينكستش عليها ولازم ترفع قضيه علي الشركه اللي مصنعاها لانها كانت ممكن لاقدر الله تعمل مصيبه او تضيع العربيه كلها
لازم تعرف السبب طبعا بس حتي لو الشحن ذياده مش المفرض تنفجر يعني

[nab!l]

متابع

[Elawany13]

ياساتر يارب
انت حاولت تعملها توصيلة

[Land_Cruiser]

ممكن يكون ماس نتيجه اسلاك ملمسه . يستحسن توديها لكهربائى شاطر يبص على الكهربا و الضفيره و الدينامو و اعتقد العيب مش من البطاريه نفسها ولازم تعرف سبب المشكله قبل ما تجيب واحده تانيه لان الموضوع كده يقلق و خطر

[الصيداح]

يعني الموضوع فعلا خطير؟
إنتم قلقتوني ده أنا كنت هشتري واحدة وأركبها أنا وخلاص
طيب محدش يعرف سبب رئيسي للإنفجار ده يعني البطارية سخنت أوي مثلا؟

[Land_Cruiser]

يعني الموضوع فعلا خطير؟
إنتم قلقتوني ده أنا كنت هشتري واحدة وأركبها أنا وخلاص
طيب محدش يعرف سبب رئيسي للإنفجار ده يعني البطارية سخنت أوي مثلا؟

[gdwl]هو لو سائل او جزء معدنى وصل بين قطبى البطاريه ممكن يخليها تنفجر على فكره او لو حاجه معدن و صلت بين القطب الحر و جسم السياره ده برضه ممكن يؤدى للانفجار بتاع البطاريه . نصيحتى لازم تكشف على كهربه العربيه عند كهربائى شاطر يعنى يراجع على الضفيره اساسى و الدينامو و يقولك المشكله فين و الموضوع أكبر من ان بطاريه باظت و بعد ما يقولك العيب منين و يعالجه أبقى ركب بطاريه جديده و تبقى عرفت العيب منين حتى علشان تطمن على البطاريه الجديده بالمره و ان مش هيحصلها زى اللى قبلها لا قدر الله [/gdwl]

[momo44]

ممكن يكون ماس نتيجه اسلاك ملمسه . يستحسن توديها لكهربائى شاطر يبص على الكهربا و الضفيره و الدينامو و اعتقد العيب مش من البطاريه نفسها ولازم تعرف سبب المشكله قبل ما تجيب واحده تانيه لان الموضوع كده يقلق و خطر

+10000000000000

[lada2010]

البطارية دى اكيد سخنت جامد نتيجة عن تلامس او حدوث قافلة لها بص روح لكهربائى يعرف السبب الاول وخد البطارية اعمل لها لحام وروح اشترى بطارية جديدة واعطى لة القديمة بدل ماتغرم تمن البطارية كامل تستفيد ب 50 ج انت احق يهم

[الصيداح]

ربنا يجازيكم كل الخير على المتابعة
بس أنا معملتش أي جديد في كهرباء العربية يعني العربية ماشية بقالها 3 سنين كويس
بس أنا كنت بلاحظ إن البطارية في الأيام العادية دافية كدة أو سخنة شوية فهل ده طبيعي على فكرة البطارية نوعها إسمه helden على ما أظن وهي تركية الصنع
وهل ممكن القفلة دي أو التلامس اللي إحنا بنفترض إنه حدث ممكن يكون في حتة بعيدة عن البطارية يعني مثلا تلامس سلكين الموجب والسالب بتاع فانوس إشارة مثلا ؟؟؟؟

[akmm]

موضوع غريب فعلا لأن البطاريه تنفجر لو فيه شرز بجوار البخار الخارج من فتحات البطاريات السائله ولكن فى الحاله اللى امامنا البطاريه جافه ... واعتقد فعلا دى مشكله كهرباء خاصه بالعربيه وضرورى كهربائى يشيك عليها الأول ... وعن السؤال ان البطاريه تسخن من الإستعمال ... لأ ولكن بتكون سخونه البطاريه من السخونه المحيطه بالماتور من الداخل ولايمكن تؤدى إلى إنفجار البطاريه ومعمول حساب كده فى التصنيع لجسم ومكونات البطاريه .... والحمد لله ربنا سلم وجات على اد كده .

[الصيداح]

الحمد لله على كل حال
أنا إشتريت بطارية جافة من نوع
fulmen
إيطالي ب380 +القديمة
المهم أنا بقول للراجل بتاع البطاريات إن القديمة حصل إنها إنفجرت وكدة قاللي فعلا بتحصل لما البطارية تكون
إنتهت ومش نافعة تاني وإنت عمال تشحن فيها جامد وتستهلك فيها أكثر وأخدها وهي منفجرة ولم يعترض عليها وقاللي بتحصل فعلا
وإن لما البطارية الجافة تبوظ وعمرها الإفتراضي ينتهي أغيرها وما أزودش الإستهلاك عليها

المهم سألت ناس بتوع موتسيكلات عندنا في الحي قالولي فعلا بتحصل معاهم لما البطارية تبقى بتنتهي ويزود عليها الحمل وغالبا بتنفجر وإنت بتدور المارش يعني وإنت بتحمل عليها

عموما هو الكهرباء عندي سليمة فأنا جبت بطارية جديدة والحمد لله مفيش مشاكل
المهم حاذروا من موضوع البطاريات ده

[omaroof]

اى بطاريه بيكون عليها ضمان سنه واحده
ومتوسط عمر البطاريه سنتين
انما لو قعتدت 3 سنوات تبقى بت حلال واصيله
لكن شكلك كنت طمعان تقعد 4 سنين فماتحملتش الصدمه وانفجرت
الحمد لله على كل شى وربنا يستر مايكونش الانفجار ده اثر على حاجه تانيه وبالتوفيق