رجرجه مع الفرامل

[speed demon666]

يا جماعه انا كل ما اجي اهدي و انا على سرعه الدركسيون يتهز جامد في ايدي خرط الطنابير مرتين و رصصت و بردو لسه الرجرجه موجوده حد يؤلي ايه السبب . العربيه سيتروين ax

[sh_masry]

هات طنابير جديده و هو ده الحل على ما اعتقدت و الله اعلم

[m_mostafa4]

أخى العزيز أنا عندى نفس المشكلة و أنا كنت فاهم أنها مشكلة طنابير و لكن مهندس التوكيل قالى أن الطنابير سليمة و أن المشكلة فى الجنوط عشان مقوسة (يعنى مخبوطة) و قالى لما تستعدل الجنوط المشكلة هتروح بس صراحة أنا لسه ما عملتهاش - ممكن انت كمان يكون عندك مشكلة فى الجنوط فا يا ريت تبص على أساس المشكلة قبل ما تبدأ تصلحها يعنى ركز على الطنابير و على الجنوط وشوف مين فيهم السبب

[شريف]

الاول اية اخبار المساعدين الامامية
دوس على كل جنب من الكبوت و شوف مساعدالعربية هينزل معاك و يرجع مرة واحدة ولا كذا مرة
او اقعد دوس 10 مرات ورا بعض و شوف قوة الدوسة فى الاخر زى الاول ولا لا

[hazem_khidr]

انا راي من راي الاخ شريف المصري.
لو الجنط مش معدول العربيه حتترج في المشي كمان مش في الفرامل بس .
بص الرعشه دي ما بتجيش غير و انت بتضرب الفرامل يبقي العيب من الفرامل مش من حاجه تانيه و الطنابير هيا اللي بيمسك فيها التيل ف يبقي الاحسن انك تغيرها و المشكله حتروح ان شاء الله

[Abdallah]

مشى ايدك على الطنبورة من القلب الى الحرف ولو حسيت لن فى عالى وواطى يبقى الطنابير دى لازم تتغير لو مكانش يبقا الطنابير سليمة.
هتروح لاى حد عندى ترصيص موتسيكل وهوا هيشوف الجنط وهيقولك اذا كان بيرف ولا لاء
ممكن تكون عندك فردة كاوتش بايظة بس الاحتمال الاقرب للصواب فى رأى ان عندك فى حاجة غلط فى الفرامل الامامية يعنى الكلتش بتاعها بيمسك من فوق مثلا ومن تحت لاء, عموما بتاع الزوايا هيقولك ايه الى فيها والله المستعان.

[ahmed1981]

خرط الطنابير مرتين

هل اللي خرط الطنابير خرطهم على فلنشة يعني ثبتهم على المخرطة من المركز ولا ثبتهم من الحواف الخارجية
لو كان ثبتهم من الحواف الخارجية إذن عوضك على الله لأن الخراط كده خربهم وبوظهم
لما تخرط الطنابير تاني قولو إخرطهم على فلانشة ولا تنازل عن ذلك
ولكن الطنابير بعد خرطها مرتين تبقى جابت آخرها ولو كدة عليك تجيب طنابير جديدة أو إستيراد نضيفة
ولو العيب فضل موجود إخرطهم وقول للخراط على فلانشة لو قالك لا روح لغيرة
يمكن تسألني إزاي يكونوا جداد ويحتاجو خرط أقولك ده حصل معايا شخصيا ومع ناس أخرى والسبب هم الحرامية اللي بيصنعوها
المهم الكلام السابق عن تجربة ومعاناة لنفس مشكلك تماما
وفيه ملاحظة لو العيب كوتش أو جنوط أو مساعدين هتلاحظو بدون دوسة الفرامل أو مع دوسة الفرامل
لكن لو المشكلة تظهر بس لما تدوس فرامل إذن هية مشكلة طنابير من غير تفكير :D
والله أعلم

[discman]

العيب دة ممكن يكون عيب ماستر خلى بالك

[speed demon666]

اولا شكرا على السرعه في الرد . انا لسا مرصص و ملأتش اي رفا في الجنوط يعني كده خلصنا من بند , بس كنت عايز اعرف ايه الفرق بين نوعين الخرط الي قال عليهم الاخ ahmed1981 و شكرا

[ahmed1981]

1- النوع الأول من الخرط بيثبت الطنابير على المخرطة من الحواف الخارجية بتاعتها بالويم عشان الدوران يكون محوري والخرط يكون صح ولكن بالويم ده مبتنفعش خالص لأنه بكون فيه عالى وواطي في الطنبورة

2- النوع الثاني وهو المطلوب بيركب فلانشة على المخرطة يعني حلقة على حجم زور الطنبورة وبعدين يحشر فيها زور الطنبورة وبالتالي هيكون ماسك الطنبورة من مركزها وبتلف مظبوط على محورها وعند الخرط مش هيكون في عالى وواطي

ممكن يكون كلامي صعب شوية لكن الصنايعي الخراط هيفهم أول لم تقولو إخرطهم على فلانشة لو مفهمش إذن هو كفتجي
المهم أنا ممكن أدلك على واحد خراط فاهم الكلام ده وهتقوله على فلانشة هيطلع الفلانشة ويشتغل

في شارع جسر السويس وإنت متجه للعباسية جنب كوبري التجنيد قبل جراش أتوبيس الدلتا تخش يمين وتسأل على مخرطة مــــــخــــــتـــــــــار ولما تروح توديله الطنابير تقوله إعملهم على فلنشة ويا ريت تقف معاه وهو شغال

[Driver]

من تجارب عديدة....و مع احترامي للجميع....عملية الخرط....خرط :mrgreen: :mrgreen:
و هي عبارة عن بنج فقط...و بمجرد استعمالها فترة....ترجع ريما لعادتها القديمة
و التغيير هوه الحل الامثل والجذري اذا كان العيب منها...ولا انصح ابدا بالخرط.... 8)

[asaber]

علي فكره انا كان عندي نفس المشكله في العربيه واتصلحت
ولما سالتهم في التوكيل قالولي غيرنا صره العجله......
وانا في سؤال محيري من ساعتها
ايه هيه صره العجله دي؟

[ahmed1981]

صرة العجلة هي جزء بيركب فيه البلي من ناحية وبنربط فيه العجله من ناحية تانية

[asaber]

صرة العجلة هي جزء بيركب فيه البلي من ناحية وبنربط فيه العجله من ناحية تانية

الف شكر يا هندسه