زياده ارتفاع العربيه عن الارض

[lightspeed]

السلام عليكم ورحمه الله وبركاته
كنت عاوز اسئل عن امكانيه تعليه العربيه عن الارض للوقايه من شوارعنا الجميله
يعنى مثلا عربيه زى الهوندا سيفيك94 او الانسر98
بحيث ان التعليه دى مضرش العربيه ولا العفشه ولا شكل العربيه
وجزاكم الله خيرا

[Nader]

كل ما هتعلي كل ما هتقلل الثبات.

انت بتتكلم عن عربية نوعها اية؟

[mohamed_88sk]

في حديدة بتتلحم فوق السوست اللي ورا عشان تعليها
عمي عملها في 128 بس منصحكش
لأن زي ما قال أستاذ نادر بتقلل الثبات خاااااااااالص
وكل ما تقلل أرتفاعها(تهبطها عالأرض) كل ما يزيد الثبات .

[Adham]

تضر العفشة و تبوظ ثبات العربية تماما
يسبب عومان
و ممكن يسبب تلف اجزاء من العفشة بسرعه جدا
مثل الجلب و البيض و الكبالن

[Adham]

في حديدة بتتلحم فوق السوست اللي ورا عشان تعليها
عمي عملها في 128 بس منصحكش
لأن زي ما قال أستاذ نادر بتقلل الثبات خاااااااااالص
وكل ما تقلل أرتفاعها(تهبطها عالأرض) كل ما يزيد الثبات .

في ال 128 العفشة مختلفة

يعني بتبقى العفشة ورا راكبة على سستة ورق واحدة بين العجلتين
ودي تعليها و تنشف العفشة بانك تزود ورقة سستة (يعني تبقى 4 ورقات بدل تلاتة مثلا) بس العفشة حاتنشف قوي مش بس تعلي العربية
و كمان تلاقي العجل اللي ورا قوس للداخل تبقى العربية مش راسية عالأرض خالص من ورا و من السهل جدا تتقلب
انما في الياباني (اللانسر و الكروللا) السست ورا يايات (تعليق مستقل Independant Suspention)
مش سستة ورق

[mohamed_88sk]

اها فعلا ملاحظ أنها مقوسه ...

[Xpert]

كل ما هاتعلي كل ما العربيه هاتعوم منك اكتر .... كل ما توطي كل ما العربيه ترسي معاك اكتر ... ممكن تحاول تشوف سوست نفس الارتفاع بس اتخن شويه stiffer springs لو انت هاتحمل حموله في العربيه ... انما لو هاتعلي علشان المطبات مانصحكش ...

[Adham]

اها فعلا ملاحظ أنها مقوسه ...

شفت بقى

اهو كدة يحصل التالي:

1- تأكل في الكاوتش من الحافه الخارجية بسرعه

2- ثبات وحش و العربية تعوم بسهولة

3- العفشة ناشفقة و بتدب ورا في اي مطب

4- معدل اهلاك عالي في عفشة العربية ككل وبالذات الجلب والمساعدين و المقصات تبقى عرضة للتلف

[Adham]

كل ما هاتعلي كل ما العربيه هاتعوم منك اكتر .... كل ما توطي كل ما العربيه ترسي معاك اكتر ... ممكن تحاول تشوف سوست نفس الارتفاع بس اتخن شويه stiffer springs لو انت هاتحمل حموله في العربيه ... انما لو هاتعلي علشان المطبات مانصحكش ...

معلم

و فية حاجة تانية شفتها برة بس مش عارف بتتباع هنا وللا لأ

عبارة عن جلب كدة بتتركب بين لفات يايات السستة تخليها ماتنضغطش مع المطبات, مش فاكر اسمها بصراحه
يعني لو ركبت واحدة بين لفتين سستة تققل نسبة انضغاط السستة
ولو ركبت واحدة تانية بين لفتين كمان تانيين في نفس السستة تقلل نسبة انضغاط السستة اكتر
و بالتالي العربية ماتوطاش في المطبات و الاهم العفشة تبقى ناشفة و تثبت العربية كأنك مركب مساعدين كوني

[banboty]

3- العفشة ناشفة و بتدب ورا في اي مطب

بالاضافة الى ان المساعد بقى مشدود لاعلى فبقى مش بياخد مشواره كله في امتصاصه للصدمات و المطبات

[alfa_we]

نصيحتى انك متعليش
انا كنت معلى عربيتى بيجو 305 وكنت ماشى بسرعة وفى الدوران عومت منى العربية ودخلت فى شجرة الحمد لله على كل شئ

[lightspeed]

شكرا اوى يا رجاله على ردودكم المفيده
وجزاكم الله خيرا
استاذ نادر انا بتكلم على العربيات اللى ارتفاعها قليل عن الارض مثلا الهوندا سفيك94
استاذ اكسبرت السوست دى تعملها كام؟
وبالنسبه للثبات مفيش حاجه يكون تاثيرها قليل على الثبات (مثلا اركب كاوتش اكبر و بحيث ميأثرش على العفشه)

[lightspeed]

نصيحتى انك متعليش
انا كنت معلى عربيتى بيجو 305 وكنت ماشى بسرعة وفى الدوران عومت منى العربية ودخلت فى شجرة الحمد لله على كل شئ

حصل خير والحمد لله على كل شيئ
بس حضرتك كنت معلى العربيه ازاى(مركب ايه يعنى؟)

[unixed]

فى حاجة أسماها عوالى بتركب فوق المساعدين علشان تعلى العربية شويةو كمان ممكن تغير العجل لمقاس أعلى أنا عندى نفس المشكلة وعملت كدة وفرقت معايا شوية والعربية مش بتعوم لأنها أصلا وطية ذيادة

[Xpert]

شكرا اوى يا رجاله على ردودكم المفيده
وجزاكم الله خيرا
استاذ نادر انا بتكلم على العربيات اللى ارتفاعها قليل عن الارض مثلا الهوندا سفيك94
استاذ اكسبرت السوست دى تعملها كام؟
وبالنسبه للثبات مفيش حاجه يكون تاثيرها قليل على الثبات (مثلا اركب كاوتش اكبر و بحيث ميأثرش على العفشه)

لاء مش عارف .. و غالباُ هاتحتاج تدور عليهم عند كذا واحد ..