تحذير من مركز الصفا

[khaled_sabry]

مش عارف هل مستوى المركز بداء فعلا ينخفض ولا هما مالهمشى فى كربراتير السوليكس
انا كنت معجب جداا بالمركز ده علشان هو الكان الوحيد اللى لاقيته بيقيس العادم و بيظبط عليه الكربراتير
انا اول مره روحت للمركز ده كان من 4 سنين بالعربيه التيويتا (كورولا 1978) و ظبطولى الكربراتير و كنت اكثر معجب جداا بالظبطه دى و العربيه فاقت حالها اتغير بعدها
ثانى مره روحتلهم كان بنفس العربيه التيويتا و كان فيه عيب فى الكربراتير ان العربيه بتشرق بعد دقيقتين على السلانسيه - ظبطلولى العربيه و بقيت كويسه معايا لمدة شهر و بعد كده رجعت تانى لحالها
روحتلهم مره تانيه - اتظبطت المره دى لمدة اسبوع بس و بعد كده لخبطت تانى
كنت انا زهقت و اشتريت كربراتير جديد و قولت القديم باظ و مش نافع فيه تصليح

المره الثالثه روحتلهم بالبيجو (كربراتير سوليكس باب واحد ) لأنى كنت حاسس ان العربيه بتاكل بنزين كتير
روحت و بصراحه زى ماروحت زى ماجيت و معدل الاستهلاك واحد و نفس ظبطه العربيه واحده ده غير كمان انهم ماكنوش رابطين سلك الشفاط

قولت مش مشكله يمكن الصنايعي اللى حظى رمانى فى ايده كان غشيم و لا حاجه
المره الرابعه كانت من اسبوعين : لاقيت العربيه بتبلع بنزين (100 كيلو فى الصفيحه )قولت مابدهاش و شد الرحال على مركز الصفا
الراجل المفروض فك الكربراتير و نظفه و غيرنا البوجيهات
الظريف بقى ان لما بحاسب بسألهم عن الخصم بتاع نايل موتورز قالى لا ده كان السنه اللى فاتت و مافيش خصم دلوقتى
طلعت من عندهم ماكنتشى العربيه مظبوطه اوى و بقيت اسواء مما روحت بيها (يعنى روحت بيها و دفعت 115 جنيه علشان يبوظوه مش يصلحوها ) عندهم و عقبال ماوصلت البيت كانت العربيه بقيت متلته !!!!!
بصيت اتارى الباشا ماقرطشى على اول بوجيه ... و بالتالى نزل عليه زيت من الموتور
تانى يوم روحتلهم علشان كانت العربيه لسه ملخبطه
طلعلى نفس الشخص و بص فى العربيه تانى و فضل بتاع ساعه الا رببع يظبط فى العربيه و يقرى الجهاز بتاع العادم ده - و فى الاخر طلعت من عندهم و لسه العربيه ملخبطه و لسه حتى ماوصلتشى للحاله اللى كنت عليها قبل ما اروحلهم خالص
طيب نفسى افهم هو كان بيعمل ايه بالجهاز بتاع العادم ده بقى

قبل ما راوح روحت للميكانيكي محمد ندا فى الاربعين مافيش 10 دقايق ظبطلى العربيه و بقيت تمام من غير جهاز قياس العادم و لا حاجه خالص

فانا ماعرفشى حال المركز بقى سئ بالشكل ده (فى الفتره الاخيره تحديدا)
لأنك اول لما تروحلهم اول كلمه على لسانهم حنفك الكربراتير و ده يتكلف 100 جنيه
و مش فاهم ايه يعنى الفن فى فك الكربراتير و تنظيفه اللى بيخليهم ياخدو عليها 100 جنيه ... انا نفسى بعرف اعمل الحكايه دى فى 5 دقايق عادى و مش عاوزه صنعه
بس فى الاول كنت بقول ماشى مش مشكله ادفع مقابل انى باخد خدمه
لكن دلوقتى بقيت ادفع و مش باخد خدمه كمان
انا فعلا مش حروح هناك تانى

[alking_2006]

الرجاء قراءة الموضوع دا

http://www.nilemotors.net/Nile/288669-a.html

و اللى فيه خناقة ما بينى و بين مركز الصفا و هما بردو مصرين انهم مش غلطانين و انهم تمام التمام
و دى تجربة شخصية حصلت معايا
مركز سئ للغاية

[khaled_sabry]

الرجاء قراءة الموضوع دا

http://www.nilemotors.net/nile/288669-a.html

و اللى فيه خناقة ما بينى و بين مركز الصفا و هما بردو مصرين انهم مش غلطانين و انهم تمام التمام
و دى تجربة شخصية حصلت معايا
مركز زبالة الزبالة و صنايعية بصمجية

قريت موضوعك .. احمد ربنا انك روحت بعيب و اتصلح و اللى طلعلك مشاكل هايفه انا ماكنتش حلتفت اليها بصراحه

لكن تروح بعيب - مايتصلحشى و العيب يزيد كمان !!!!!
خلينا نتفق على حاجه ان معظم الصنايعيه بصمجيه بالذات فى الحجات اللى تتعلق بالظبط و الاحساس بالشئ
ده لأنهم بيعتمدو على حواسهم بالمقام الاول فى التظبيط
و بالتالى اللى عجبنى فى مركز الصفا فى الاول انهم عندهم سينسور بيعرفو بيه درجة العادم - و بالتالى بعدنا عن الاحساس و بقى فيه اسلوب شبهه علمى للظبط
لكن دلوقتى حتى مع وجود السينسور ده برضه مابقاش العربيه تتظبط
يعنى ايه اروح و اطلع من هناك و الاقى العربيه اسوء من الاول ؟؟ طيب ياخى اشتغلنى و خليها زى ماهى على الاقل
و اللى يحرق الدم فعلا 100 جنيه بتاعت الفك و التركيب دى

[alking_2006]

خلينا نتفق على حاجه ان معظم الصنايعيه بصمجيه بالذات فى الحجات اللى تتعلق بالظبط و الاحساس بالشئ
ده لأنهم بيعتمدو على حواسهم بالمقام الاول فى التظبيط
و بالتالى اللى عجبنى فى مركز الصفا فى الاول انهم عندهم سينسور بيعرفو بيه درجة العادم - و بالتالى بعدنا عن الاحساس و بقى فيه اسلوب شبهه علمى للظبط
لكن دلوقتى حتى مع وجود السينسور ده برضه مابقاش العربيه تتظبط
يعنى ايه اروح و اطلع من هناك و الاقى العربيه اسوء من الاول ؟؟ طيب ياخى اشتغلنى و خليها زى ماهى على الاقل
و اللى يحرق الدم فعلا 100 جنيه بتاعت الفك و التركيب دى

الذ حاجة ان برا اجدع اجدع ورشة هتاخد 40 جنيه او 50 بالكتييييييييير
فساعتها قولت خلاص مفيش مشكلة ادفع 100 جنيه بس اريح دماغى فترة
لقيت نفسى خسرت فلوس و وقت و قطع غيار ضيعوها و بردو الشغل مطلعش 100 100

اتفضل اقرا دول كمان لو حابب

http://www.nilemotors.net/Nile/266478-a.html

http://www.nilemotors.net/Nile/266475-a.html

http://www.nilemotors.net/Nile/263341-a.html

فيه ضحايا غيرنا كتيييييير :))))

[BODAAA]

معاك فى كل كلمة واللهى غرمونى بتاع 400 جنية وبعدين قطرت العربية للميكانيكى و طلع فى الاخر عيب فيوز طرمبة البنزين

[alking_2006]

معاك فى كل كلمة والله غرمونى بتاع 400 جنية وبعدين قطرت العربية للميكانيكى و طلع فى الاخر عيب فيوز طرمبة البنزين

و الله حرام اللى بيحصل دا
و المشكلة ان المنتدى هنا عاملهم اعلان
ازاى مش عارف :(

[khaled_sabry]

و الله حرام اللى بيحصل دا
و المشكلة ان المنتدى هنا عاملهم اعلان
ازاى مش عارف :(

ماينفعشى نلوم المنتدى على اعلانه لأن عادى لو اى حد حب يعمل اعلان هنا حيتعمل و المنتدى مش مسئول عنه
بس يتهيألى كان فيه علاقة تجاريه ما بين المنتدى و بين المركز ده لأن المركز ده كان بيبيع استيكر نايل موتورز و عامل خصم عليه - لكن واضح ان العلاقه دى انتهت دلوقتى لان المركز مابقاش يبيع الاستيكرات و شال موضوع الخصم ده

الذ حاجة ان برا اجدع اجدع ورشة هتاخد 40 جنيه او 50 بالكتييييييييير
فساعتها قولت خلاص مفيش مشكلة ادفع 100 جنيه بس اريح دماغى فترة
لقيت نفسى خسرت فلوس و وقت و قطع غيار ضيعوها و بردو الشغل مطلعش 100 100

اتفضل اقرا دول كمان لو حابب

http://www.nilemotors.net/nile/266478-a.html

http://www.nilemotors.net/nile/266475-a.html

http://www.nilemotors.net/nile/263341-a.html

فيه ضحايا غيرنا كتيييييير :))))

الاسطى جمال اللى جنب بيتي ب 300 متر بيعرف يظبطلى الكربراتير زى الفل و كنت بستغليه علشان كان بياخد 50 جنيه و كنت بقول انه مش دقيق و ادفع اكتر فى الصفا لانه اكثر دقه
لكن دلوقتى بدفع اكتر و اخد خدمه زى الزفت و تضيع وقت مالا يقل عن ساعتين فى انتظار الكربراتير لما يطلع من الورشه (هما بيعملو فيه ايه جوه يستاهل ده )
و فى الاخر برجع لجمال الميكانيكي برضه زى البوبى

بس برضه خلينا نبقى منصفين - المركز ده من سنتين او 3 كان كويس و كنت بشوف مشاركات كتير اوى فى المنتدى بتشكر فيه ولما روحتلهم اول مره فعلا ظبطولى العربيه
لكن بعد كده واضح ان مستواه تراجع كثيرا او جاب صنايعيه اى كلام (و ده ظهر فى الثلاث مرات اللى روحتها بعد كده - و لا مره فيهم كانت النتيجه مرضيه ) بالاضافه الى غلو الاسعار (زياده ماهى غاليه اصلا ) اللى مالهوش مبرر
و كمان الجشع بتاعهم - يعنى مش معقوله كل العربيات اللى هناك بدون اثتثناء لازم اول خطوه الكربراتير يتفك - ليه مافيش حاجه اسمها ظبط مسمار الهواء الاول ؟؟
ملحوظه الجشع دى من زمان و الواحد كان بيتجاوز عنها علشان المستوى الفنى العالى لكن لما تراجع كمان المستوى ده يبقى معلشى المركز مابقاش ليه اى لازمه و اى ميكانيكي بصمجى برقبتهم مادام الموضوع بقى عك فى الاخر

[alking_2006]

محنا بنثير الموضوع دا هنا فى المنتدى علشان واضح ان مستوى الرقابة عندهم اصبح فى الضياع
احنا فى الاخر عايزين خدمة كويسة بسعر كويس
اتمنى انهم يحسنوا مستوى خدمتهم و يعاقبوا كل عامل مهمل عندهم لأننا مع الاسف اللى بنشيل ثمن الاهمال دا
و لكن المشكلة ان عندهم اصرار غريب انهم معندهمش مشكلة
و لكن المشكلة فينا احنا اننا حاسيين ان الاسعار بتاعتهم عاليه

[gadoo30]

انا رحتلهم بالدوجان من سنة كانت العربية حالتها زفت والميكانيكى بعد ما نظف الكربراتير قاللى دة واخد هوا ومقدرش العب فية المهم ... قبل الدخول قالولى على ال 100 جم قلت ماشى فك الكربراتير واختفى وبعدين رجع ببك سلانسية عادة قلتلة لا البيك بتاعى كهربا قالى بايظ قلتلة حط جديد ب 90 جم وجوان نص ب 15 جم وظبط العربية مية مية على بنزين 80 من اكتر من سنة وماشاء الله حلااااااوة والسحب والاستهلاك فلة شمعة منورة ما شاء الله وروحت المراجعة بعد اسبوعين والعربية فل لحد دلوقت بس فية زميلى راحلهم بلانوس دفع دم قلبة والعيب زى ما هو يبدو ان الموضوع حظوظ في الصنيعى اللى بيشتغل

[مركز الصفا]

مركز الصفا لتحليل ومعالجة عوادم السيارات

مش عارف هل مستوى المركز بداء فعلا ينخفض ولا هما مالهمشى فى كربراتير السوليكس
انا كنت معجب جداا بالمركز ده علشان هو الكان الوحيد اللى لاقيته بيقيس العادم و بيظبط عليه الكربراتير
انا اول مره روحت للمركز ده كان من 4 سنين بالعربيه التيويتا (كورولا 1978) و ظبطولى الكربراتير و كنت اكثر معجب جداا بالظبطه دى و العربيه فاقت حالها اتغير بعدها
ثانى مره روحتلهم كان بنفس العربيه التيويتا و كان فيه عيب فى الكربراتير ان العربيه بتشرق بعد دقيقتين على السلانسيه - ظبطلولى العربيه و بقيت كويسه معايا لمدة شهر و بعد كده رجعت تانى لحالها
روحتلهم مره تانيه - اتظبطت المره دى لمدة اسبوع بس و بعد كده لخبطت تانى
كنت انا زهقت و اشتريت كربراتير جديد و قولت القديم باظ و مش نافع فيه تصليح

المره الثالثه روحتلهم بالبيجو (كربراتير سوليكس باب واحد ) لأنى كنت حاسس ان العربيه بتاكل بنزين كتير
روحت و بصراحه زى ماروحت زى ماجيت و معدل الاستهلاك واحد و نفس ظبطه العربيه واحده ده غير كمان انهم ماكنوش رابطين سلك الشفاط

قولت مش مشكله يمكن الصنايعي اللى حظى رمانى فى ايده كان غشيم و لا حاجه
المره الرابعه كانت من اسبوعين : لاقيت العربيه بتبلع بنزين (100 كيلو فى الصفيحه )قولت مابدهاش و شد الرحال على مركز الصفا
الراجل المفروض فك الكربراتير و نظفه و غيرنا البوجيهات
الظريف بقى ان لما بحاسب بسألهم عن الخصم بتاع نايل موتورز قالى لا ده كان السنه اللى فاتت و مافيش خصم دلوقتى
طلعت من عندهم ماكنتشى العربيه مظبوطه اوى و بقيت اسواء مما روحت بيها (يعنى روحت بيها و دفعت 115 جنيه علشان يبوظوه مش يصلحوها ) عندهم و عقبال ماوصلت البيت كانت العربيه بقيت متلته !!!!!
بصيت اتارى الباشا ماقرطشى على اول بوجيه ... و بالتالى نزل عليه زيت من الموتور
تانى يوم روحتلهم علشان كانت العربيه لسه ملخبطه
طلعلى نفس الشخص و بص فى العربيه تانى و فضل بتاع ساعه الا رببع يظبط فى العربيه و يقرى الجهاز بتاع العادم ده - و فى الاخر طلعت من عندهم و لسه العربيه ملخبطه و لسه حتى ماوصلتشى للحاله اللى كنت عليها قبل ما اروحلهم خالص
طيب نفسى افهم هو كان بيعمل ايه بالجهاز بتاع العادم ده بقى

قبل ما راوح روحت للميكانيكي محمد ندا فى الاربعين مافيش 10 دقايق ظبطلى العربيه و بقيت تمام من غير جهاز قياس العادم و لا حاجه خالص

فانا ماعرفشى حال المركز بقى سئ بالشكل ده (فى الفتره الاخيره تحديدا)
لأنك اول لما تروحلهم اول كلمه على لسانهم حنفك الكربراتير و ده يتكلف 100 جنيه
و مش فاهم ايه يعنى الفن فى فك الكربراتير و تنظيفه اللى بيخليهم ياخدو عليها 100 جنيه ... انا نفسى بعرف اعمل الحكايه دى فى 5 دقايق عادى و مش عاوزه صنعه
بس فى الاول كنت بقول ماشى مش مشكله ادفع مقابل انى باخد خدمه
لكن دلوقتى بقيت ادفع و مش باخد خدمه كمان
انا فعلا مش حروح هناك تانى

السلام عليكم ورحمة الله وبركاته
شكراً على مشاركتك الكريمة
انا سأوضح لحضرتك بعض الأمور :
1 - المركز يعطيك ضمان اسبوعين على الشغل الذي تم في السيارة .
2 - الضمان يتجدد في حالة حضورك للمركزفي حالة استمرار وجود عيب بالشغل الخاص بنا .
3 - من حقك طلب تغيير الفني لعدم ثقتك فيه - ولدينا اللائحة لإمكانية تبديل الفني في حالة طلب العميل ذلك .
4 - من الحق العميل ان يدخل لمدير المركز مباشرة وعرض مشكلته عليه وسيباشر المدير متابعة السيارة بنفسه ، بل وقد يقوم بإصلاحها بيده .
5 - الأولوية القصوى لدينا في المركز هو راحة العميل وإطمئنانة على حالة سيارته
6 - هناك مهندس استقبال من مهامة الرئيسة مراجعة السيارة بعد انتهاء الفني من اصلاح السيارة وتجريبها مع العميل .
والآن بعد توضيح هذه الأمور هل يمكن ضمان راحة العميل ورضائه أكثر من ذلك......!!!!!!

[reda elgohary]

دوام الحال من المحال ،،وكلنا ذوو خطأ ويجب ع مركز الصفا مراجعة الآخطاء الفنية قبل تسليم السيارة للعميل أعنى تفعيل موضوع مهندس الاستقبال الذي يقوم بتجربة السيارة ،،وان شاء الله يكون المركز عند حسن ظن الجميع

[khaled_sabry]

دوام الحال من المحال ،،وكلنا ذوو خطأ ويجب ع مركز الصفا مراجعة الآخطاء الفنية قبل تسليم السيارة للعميل أعنى تفعيل موضوع مهندس الاستقبال الذي يقوم بتجربة السيارة ،،وان شاء الله يكون المركز عند حسن ظن الجميع

ماهو المهندس ده موجود
بيسمع شكوتك و بيسمع صوت الموتور
و مش بيقول حاجه غير "فك الكربراتير - حيكلفك 100 مصنعية الفك و التركيب" و بعد كده مش بشوفه
احنا كده كده عارفين ان المشكله من الكربراتير (امال احنا جايين ليه ) لكن المهاره المفروض تبقى ظبطه - خطوه التنظيف (اللى بتتكلف 100 جنيه مره واحده ) مش شايفلها لازمه فى 80% من الحالات لأن حتى لو كان الكربراتير نظيف بيتفك و يتنظف تانى !!!! و ده طبعا بيستهلك وقت و فلوس على الفاضى

[hugan]

يعني انا مالك لعربيات كرباتير من اكتر من 15 سنه
فيات 27
فيات 25
شاهين
بكل ثقه اقدر اقول ان مفيش حاجه اسمها ضبط واصلاح كربراتير بايظ
شغلانه كلها نصب في نصب
الكربراتير باظ والعربيه خرفت معاه
يتلصح اول مره
لو لقيت بعد التصليح ان العربيه منيله وزي ماهي
يبقي يتغير بجديد اواستيراد
ويفضل جديد
لانك هاتلاقي نفسك صرفت ضعف سعر الكرابرتير
ومفيش حاجه اتصلحت
غير المجهود والعطله وشغلك
تعليقي مالوش علاقه بالمركز من قريب او بعيد
انما تجربتي الشخصيه في تضليح كربراتير
وبنصح اي حد عنده كربراتير بايظ انه مايصلحش
لان الشغلانه كلها ضحك علي الزبون

[khaled_sabry]

1 - المركز يعطيك ضمان اسبوعين على الشغل الذي تم في السيارة .
2 - الضمان يتجدد في حالة حضورك للمركزفي حالة استمرار وجود عيب بالشغل الخاص بنا .

الضمان موجود صح لكن اول مره اسمع عن موضوع تجدد الضمان ده و مافيش حاجه بتتكتب فى الكارت توضح الحكايه دى
بالاضافه الى انى لما جيت فى اخر مره فى فتره الضمان ده طلعولى نفس مهندس الاستقبال بنفس الفنى

3 - من حقك طلب تغيير الفني لعدم ثقتك فيه - ولدينا اللائحة لإمكانية تبديل الفني في حالة طلب العميل ذلك .

مافيش اى حاجه توضح المعلومه دى هناك و ماشفتش اللائحه دى متعلقه فى اى حته - و اساسا المفروض يبقى ده اجراء تلقائى لأنى انا جاى بنفس العيب اللى الفنى ده فشل فى تغييره
يبقى حتجبهولى ليه تانى !!!!

6 - هناك مهندس استقبال من مهامة الرئيسة مراجعة السيارة بعد انتهاء الفني من اصلاح السيارة وتجريبها مع العميل .

مهندس الاستقبال ده ماشفتهوش الا و هو بيستقبل العربيه فقط
و كل وظيفته انه بيسمع منى الشكوى بتاعتى و بعد كده يشغل العربيه و يحط جهاز العادم و بعد كده يقولى المشكله فى الكربراتير (ما انا عارف) حنحتاج نفكه و ده حيكلفك 100 مصنعيه
و علاقتى بتنتهى بيه عند المرحله دى - لكن ماحدش بيعبرنى بعد ما الفنى بيخلص شغله
و الكلام ده اتكرر فى جميع المرات اللى اتعاملت فيها مع المركز ده (حوالى 4 او 5 مرات على مدار 3 سنين ) -
و اصلا منهم مره واحده بس (من ال 4 او 5 مرات ) اللى الفنى (وليس المهندس ) طلع معايا بالعربيه علشان يجربها

و كده كده انا فعلا عقدت العزم من قبل ما اعمل الموضوع ده على عدم الرجوع للمركز مره اخرى

[khaled_sabry]

بكل ثقه اقدر اقول ان مفيش حاجه اسمها ضبط واصلاح كربراتير بايظ
شغلانه كلها نصب في نصب
الكربراتير باظ والعربيه خرفت معاه
يتلصح اول مره
لو لقيت بعد التصليح ان العربيه منيله وزي ماهي
يبقي يتغير بجديد اواستيراد
ويفضل جديد

متفق معاك - و انا كنت لما بروحلهم كنت بأنشد ظبط "مثالى" للكربراتير باستخدام اجهزه قياس العادم اللى ماعرفشى حد تانى بيستخدمها غيرهم
لكن حتى الظبط ماكنتش بنوله