اصلحها ولا ابيعها ولا اولع فيها واريح نفسى .. مستنى رايكم ...

[mr_mada]

السلام عليكم

فى البداية هيا عربية 128 موديل 1988 موتور 1100 سى سى اشترتها من 8 شهور ب 15.5

مكنش ليا فى العربيات اوى وقتها .. المهم العربية فضلت شغالة معايا حوالى 4 شهور كويسة

بس العجلتين الى ورا قالبين من تحت لجوه ومن وره لبره قلبتين فى واحد يعنى بعد ال 4 شهور

الكبالن باظط قولت اروح اغير كبالن واسيب موضوع العجل الى قالب ورا ده لبعدين ..

رحت للميكانيكى قلتله يغير الكبالن وهوه بيغيرها قالى خلى بالك علشان الشاسيه مفتوح فاحنا

نجيب اكس اطول شوية من الى راكب علشان ميحملش على الشاسيه وبما انى مش فاهم قلتله

تمام دوس يا معلم .. غير الاكس الشمال الى ادام بواحد اطول وغير صليبة كردان لنفس

المكان وغير الكبالن الاتنين .. طلعت اجرب العربية لقيتها بتتنطط فى الملفات على سرعة

رجعتله .. قالى ( ليس فى الامكان ابدع مما كان والشاسيه مفتوح ) المهم مشيت من عنده

وبعدها بقيت اسمع اصوات شخلله فى العربية فرحت لعفشجى غيرلى بطاحة ومقص للجنب

الشمال برده وقلتله على حوار الاكس الى الميكانيكى عمله قالى ده حمار فين الاكس القديم

ادتهوله فراح مركبه .. المهم طلعت من عنده جربت العربية لقيت الشخلله قلت قلت تمام

تانى يوم بجرى على البحر باليل 110 وداخل على ملف بسيط مش قاصى المهم حطيت سنت

الفرامل بتاعة الملف العربية عملت لقة كده جابتنى من اقصى الشمال لاقصى اليمين بعرض

6 حارات تقريبا حوالى 4 مرات كانت هتقلب وهتعدى الجزيرة وتروح الناحية التانية

المهم ربنا قدرنى ولميتها الحمد لله .. تانى يوم ببص على العربية لفت نظرى ان العجلة

الشمال الى ادام الى اتعمل فيها كل ده قالبة لجوه لدرجة انها ماشية على سيفها وده الى

كان هيموتنى مع العجلتين الى ورا الى اصلا قالبين من الاول .. الحمد لله .. المهم رجعتله

قالى دى الركبة الشمال عايزة تتغير انا كنت خلاص مش مقتن باى حاجة بيقولها

لانى داخله بالعربية بايظة والعجلتين الى مسطرة اخدها بعد ما صلحها بالعجلة قالبة لجوه

المهم رحت لعفشجى غيره قالى عمل رجلاش للمساعد القلبة قلت كتير عن الاول بس لسة

قالبة برده .. رحت لعفشجى تالت قالى الركبة الشمال عايزة تتغير وراح مغيرها .. وبرده

العجلة قالبة زى ماهيا .. رحت لعفشجى رابع قالى الركبة ملحومة غلط ومش فى مكانها

جيت بعدها واحد جاى عكس بربع نقل دخل فيا وش فى وش فى الجنب الشمال برده

راح الجنب كله مضغوط لوره .. وبعدها العربية جابت اسطوانة وديسك ..

وبعدها فى الشتواية الحلوة الى فاتت المية دخلت جواها مش عارف منين والارضية غرقت

فكيت الارضية لقيت صاج الارضية الى تحت السواق رايح فى داهية والى تحت الكرسى الى

جنبه ماسك نفسه شوية والباقى كويس والعتبة الشمال برده عاوزة تتغير ومعرفش اليمين ايه

نظامها ...


ملحوظات

* دفيرة الكهرباء الكهربائى قالى دى مش جويسة ومعمولة بلدى

* طبلة الكونتاكت كل شوية بتبوظ مغير 4 فى 8 شهور

* الرداتير الراجل قالى ده مهرى بس شغال معايا كويس بدون مشاكل

وحاليا مرمية زى الكلبة تحت البيت ...


مميزاتها .. او الحسنتين الى فيها

* ماتورها كويس

* بطارية كويسة

* 4 جنوط

* 4 فرد تيوبلس عريض

* 2 زجاج كهربا

* سنتر

* سروجى كويس



هل ممكن تبقى عربية ؟؟ ولا ابيعها ؟؟ ولا اولع فيها بجاز ؟؟؟؟؟


اسف للاطالة .. بس ده كله برده ميجيش حاجة من الى انا شوفته

بانتظار ردودكم وارائكم ....

[HAITHAM1985]

ولع فيها

[pro_samir]

واحد اعرفه اشتري 128 برضو كان احلي ما فيها الجنوط والفرش :)

وعمل نص عمره وعمل الشاسيه وصرف .. وفي الأخر زهق وباعها بعد شهر مرمطه بنص تمنها

بصراحه فلوس في الأرض ..

اشتري اي عربيه ولو قريبه منها في السعر .. بس تكون حاجه محترمه تحط فيها قرش تلاقية مش يقع في الأرض

انما دي .!.!.!. عربيه مفيهاش شاسيه هتتظبط ازاي طيب

[NaderNabil]

يا باشا في اول الموضوع كان عندي أمل في العربية...و كل ما أغوط فيه أكتر أفقد الامل...و دلوقتي بقولهاك:

بيع و إستريح

[houras1010]

وفر التعب والمصاريف دى يشتريها سمكري او عفشجى هيسلك فيها

[mr_mada]

بشكر جميع الاعضاء الى شاركو برايهم

هيا قدمها فقر طبعا لانى كل لما اصلح حاجة

تبوظ حاجة .. ولكن المهم دلوقتى لو بعتها مفيش امكانيات حاليا اجيب اى عربية تانية ايا كان نوعها

وطبعا بعد ما تعودت على عربية فى حياتى احساس مؤلم اوى انك ترجع تجرى ورا المواصلات فى الشارع

ده غير انى اشترتها ب 15.5 وصرفت عليها لحد دلوقتى 3 وطبعا مركبتش بيهم بنكلة

ولو بعتها وهيا عطلانة كده مش هتجيب اى فلوس وهتبقى الخسارة كبيرة اوى

فالسؤال الى بيطرح نفسه هنا هل ممكن لو صرفت عليها تكون عربية ولا برمى فلوس زيادة فى الاض

[AHMED REFAT]

كده بترمى فلوس زيادة فى الأرض ،، حاول تبيعهاعلى عيبها وبكل أمانة هاتخسر إقل من إللى هاتصرفه ده غير توفير التعب بتاعها وربنا يجيريك فى مصيبتك ويخلف عيلك بخير منها

[mohkhattab]

بص بما انا من مالكى 128 بقالى فترة و ليا خبرة طويلة فيها
انا بقولك بيعها

[aldesha989]

اتوكل على الله وبيعها وربنا ييسرلك الحال بواحده نضيفه

[lanos2004]

بيعها واشترى 127 افضل بكتير والشاسيه بتاعها مش بيفتح زى 128

[spownl]

بيعهلا بس بما يرضى الله حاول توضح للنا س كل العيوب اللى فيها علشان ربنا يباركلك

وقدر الله ما شاء فعل وربنا ها يباركلك ان شاء الله

[swimmer25]

معقول يا رجالة..دي 128 يعني بسيطة
يعني لو راح لسمكري محترم عدله الشاسيه بالمقاس وفكله الركبتين ولحمهم صح وبتاع الزوايا يستلم منه ويبص علي العفشة اللي محتاجة تغيير قبل ظبط الزوايا..الدنيا هتظبط جدا
المشكلة ان الراجل بيروح لسمكرية وعفشجية ضايعة..دلوه علي حد كويس وبيفهم

نفس السمكري يفور تحت الكرسي ويشوف البارومة فين تاني ويلحم اللي محتاج لحام بعد الكشف علي الشاسيه كله والحوض والشنطة لان ساعات كتير بيكون الشاسيه فيه شرخ او بارومة

بالنسبة للعجل ورا .. دي مشكلة سوست ورا.. صاحب العربية قبله اكيد كان داقق عليها جامد عشان ترفع العربية شوية عشان انتوا عارفين ال 128 العجل بيفتح مع الحمل الزيادة
هيروح لحداد او سمكري بيشتغل في السوست دي يطلعها ويظبطها عشان العجل يعدل شوية

وبعدين يظبط زوايا قدام وورا

إيه رأيكم ؟ عايزة بس سمكري وعفشجي وبتاع زوايا نضاف لأن الراجل باين عليه جديد ومش عارف حد كويس

[amagroup]

بص يا باشا في عربيات تركب فيها قطع الغيار وتنساها وفي مهما عملت عمر الحاجه قصير
من الاخر بقي 128 من العربيات المتعبه حبتين عشان عفشتها لو قدرت تبيعها اخلص منها بس المهم متخصرش الفلوس اللي انت دفعتها فيها اما اللي صلحتوا ربنا يعوض عليك او ييسر لك وتخده في سعرها
لو عاوز تجيب قديم او علي قد فلوسك ال131 افضل بس اخر موديل 1981 وانا بصراحه مكربتهاش من ساعه مبعتها من حوالي 2003 يااااه عمر والله

لو عاوز تجيب عربيه وانت وحظك "يعني حالتها من 60% وانت طالع" بس ممكن تظبط وتبقي زي الفل
اسكودا فيفورت او فليشيا موديل قريب مش فابيا عربيه جيده جدا وحتي لو فيها مشاكل ان شاء الله بتتصلح هي بس تكيفها مش قوي قوي بس تشيكي الماني يعني "تعظيم سلام" وان مجربها ولغايه دلوقتي بحلف بعفشتها

وربنا يوجهك للصح ان شاء الله

[mohnagy012]

انا من رايى تصلحها علشان كل اللى انت بتقوله سهل جدا يتعمل والشاسيه بيتعملو تقويات وبتبقى زى الفل على فكره هى مشاكل ال128 كتيره بس احسن عربيه فى قطع غيارها فى مصر رخيصه اولا وموجوده عند البقال بس انت دور على ناس فاهمه يشتغلو فى العربيه حتى لو حتغير ربع كامل بيتعمل بسهوله جدا وهو ده رايى بصراحه علشان انا معايا فلوريدا وهى الشاسيه بتعها زى 128 بس اقوى شويه وعربيه زى الفل هى صحيح قطع غيارها نادره شويه بس كويسه

[ramyayash]

طالما تاعباك بيعها .. مفيش كلام.. انت مهما عملت عمرها ما هتبقي زي النضيف