سؤال في الدهان بس بسرعه أرجوكم؟

[aid904]

النهاردة روحت سلمت السيارة لبتاع الدوكو بعد شويه سمكرة خفيفه . المهم قولت أتفق معاة على الدهانات أنا قولتله نجيب سكنز قالي لا دي غليت بقت ب 320 جنيه نجيب أحسن أوميجا ب 95 جنيه قولت ماشي وبعدين سألته عن الورنيش قالي لا الدهان العادي في الاوميجا بيبقى فيه ورنيش منه فيه يا تري الكلام دة صح لان البيه مش عايز يجيب ورنيش أنا أتفقت معاة على 800 جنيه العربيه 127 أرجوكم الرد بسرعه علشان ألأحق أسحب العربيه

[zeyad1810]

اللى انا اعرفة ان البوية الميتالك هى اللى بتحتاج ورنيش

[Lord of the flies]

انا لسة راشش العربية من اسبوعين
جبت كيلو ونص اوميجا ب85 الكيلو و نص كيلو ورنيش و قالولى ان الونيش بيتخسب زى البوية فدفعت 85*2 على اساس كيلو ونص + نص =170.

بس معرفش اوميجا فية ورنيش ولا لاء

[aid904]

متشكر أوي لردكم
يعني أقدر أقول أن الراجل دة مش غشاش وفعلا أنا مش محتاج ورنيش مع دهان الفرن الاوميجا العادة أو بالكتير أجيب نص كيلو ورنيش لو حبيت صح الكلام!

[Adham]

السادة مابياخدش ورنيش
الميتاليك بس اللي بياخد ورنيش و بيبقى طبقة بتترش فوق البوية

و بالتالي ماينفعش تجيب نص كيلو بوية و يتحط عالبوية الميتاليك
و لا يترش فوقيها لأنها حاتنفس

الصنايعي بتاعك كلامة صح

السادة ورنيشة منة فية

[madvoodoo]

طيب يا شباب
السلام عليكم
انا عندي العربية كحلى سادة مش ميتالك والحمد لله العربية مش محتاجه سمكرة فانا من عايز اديها وش نضافة كحلي ميتالك افتح درجة بسيطة من لونها فايه المطلوب مني والموضوع ده هيكلفني قد ايه ولو حد عنده صنيعي كويس يقلي عليه
وبخصوص الرخصة لاون يتغير فيها من كحلي الى كحلي ميتالك ولا ده ملوش دعوة معلش اسالتي كتير علشان ديه اول مرة ارش فيها مستني نصيحتك

[MotorX]

انا كنت سألت في نفس الموضوع على المنتدى هنا واللي فهمته إن البوية الميتاليك هي اللي بتاخد ورنيش ، بس بعد البحث على الإنترنت و سؤال الصنايعية عرفت الآتي ، بصرف النظر عن المؤثرات الخاصة (Metallic ,Pearl effict) في طريقتين للدهان Basecoat/Clearcoat و Single Stage Painting ، الطريقة الأولى بتنفع للميتاليك والألوان العادية وبتبقالها بوية مخصوص و فيها بيدهن اللون وبعد كدة بترش ورنيش علشان اللمعة بس ده هايكلفك كتير لإن كأنك بترش العربية مرتين ، الطريقة التانية تنفع للألوان العادية ودي بتبقى البوية بتاعتها الورنيش منها فيها ، نوعين البوية دول موجودين في ماركة اسمها RM سعر كيلو البوية للنوعين 180 جنيه وفي نوعين ورنيش RM واحد الكيلو 110 والتاني 140 جنيه وطبعا الفرق في الجوده واللمعة.

[chihab18]

كليو الاوميجا 90 جنيه اجرة الفرن 40 جنيه كليو البك العلبه 10 تفرش العربيه والجالون 20 حنيه ايجار ماكنه الرش المسدس 50 جنيه الفلر 30 جنيه المعجون العلبه 27 جنيه سنفرة 1 جنيه اجرة الصنايعي في اليوم 40 جنيه
800 جنيه معقول للرش من برة و خليك في الاويجا علشان لو حصل حكه تشتري ربع رخيص وترمم وبعد مايخلص تلمعها بطاقيه صاروخ والورنيش يخلط مع البويه بنبه معينه تقريبا الكليو عليه ربع كليو ورنيش او ثمن كليو ورنيش حتلاقي العربيه بعدها مريا لامعه وابعد عن الميتاليك ؛
وفائده الفرن هو البعد عن التراب وحرارة الفرن الداخليه بس اهم شيء فك النواكل من برة ؛ وبالمناسبه سمعت صدفه من تجار سيارات ان سعر 127 بين التجار يتراوح من 9 الي 13 الف واذا كان رقم الكارتيرة موجود يبقي 18 الف . وربنا يوفقك ؛ والعربيه تاخذ حوالي كليو وربع بويه وخليه يدهنها وشين

[Adham]

كليو الاوميجا 90 جنيه اجرة الفرن 40 جنيه كليو البك العلبه 10 تفرش العربيه والجالون 20 حنيه ايجار ماكنه الرش المسدس 50 جنيه الفلر 30 جنيه المعجون العلبه 27 جنيه سنفرة 1 جنيه اجرة الصنايعي في اليوم 40 جنيه
800 جنيه معقول للرش من برة و خليك في الاويجا علشان لو حصل حكه تشتري ربع رخيص وترمم وبعد مايخلص تلمعها بطاقيه صاروخ والورنيش يخلط مع البويه بنبه معينه تقريبا الكليو عليه ربع كليو ورنيش او ثمن كليو ورنيش حتلاقي العربيه بعدها مريا لامعه وابعد عن الميتاليك ؛
وفائده الفرن هو البعد عن التراب وحرارة الفرن الداخليه بس اهم شيء فك النواكل من برة ؛ وبالمناسبه سمعت صدفه من تجار سيارات ان سعر 127 بين التجار يتراوح من 9 الي 13 الف واذا كان رقم الكارتيرة موجود يبقي 18 الف . وربنا يوفقك ؛ والعربيه تاخذ حوالي كليو وربع بويه وخليه يدهنها وشين

مع احترامي

اجرة الفرن مابتقلش عن 80 جنية لو العربية صغيرة و تزيد لفوق ال 120 حسب العربية من حيث الحجم

انا مش عارف قصدك اية بكيلو البك

الدهان الفرن مش بيحتاج يتلمع بعد الدهان
التلميع يبقى لو بس مرمة (دهان جزء معين بس مش رفرف كامل او كبوت كامل) يبقى تلمع علشان تداري الدهان القديم و الجديد و اللحام حوالين المرمة

البوية السادة بتيجي ورنيشها منها فية, يعني مابيتحطش عليها ورنيش, أو بالأصح مابيترشش فوقها طبقة ورنيش زي الميتاليك
ولو رشيت ورنيش عالبوية السادة حاتبوظ (حاتنفس)
و العربية الفيورا تاخد كيلو و نص بوية سادة

الميتاليك بعد مابتترش (وهيه جوة الفرن) بيترش طبقة من الورنيش فوقها (ورنيش كلير كوت شفاف) و دة بيتباع لوحدة و العربية عامة لو صغيرة تاخد كيلو و ربع ورنيش و ممكن العربيات الكبيرة لغاية 2 كيلو تقريبا, لكن الورنيش لو زاد قوي مش كويس حيث ممكن يسيل اثناء الرش او يبقى سهل التقشير

ولو عاوز ترش العربية ميتاليك حاتكلفك اكتر علشان تكلفة الورنيش
و دة ممكن و سهل
بس المشكلة ان تغيير اللون يعيب العربية, حيث مش لونها الأساسي, و مختلف عن لون الدواخل

فائدة الفرن, غير الحماية من تراب الشارع, هيه ان الحرارة بتاعه الفرن بتعمل على تثبيت اللون عالسيارة و تدي اللمعه للون, كل حرارة الفرن ما تعلى كل ماللون يدي لمعه اكتر, بس لو تجهيز العربية ضعيف الستوك و الفللر ممكن يفتح (يطقطق) مع الحرارة العالية
يعني ممكن لغاية 55 درجة يبقى في السليم, و لو التجهيز قوي و العربية متأسسة كويس و معليهاش معجون كتير ممكن لغاية 70 درجة

و مافيش اي علاقة بين الرش في الفرن و فك النواكل
معلومة غير صحيحة ان العربية لازم يتشال منها النواكل و الزجاج و الفوانيش و غيرها علشان الرش, و الصنايعية بيقوللوا كدة للزبون علشان ياخدوا مصنعية فك و تركيب كبيرة, لكن في واقع الامر ان العربية في 55 درجة مئوية و مش محتاجة ان يتفك منها اي شيء, حيث الحرارة دي ما تفرقش كتير عن وقوف العربية في الشمس في يوم فظيع الحرارة, ساعتها حاتلاقي الصاج بتاعها سخن زي المكواة
يعني العربية بتخش الفرن زي ماهية بدون مايتفك من عليها اي شيء, بس بيتلزق ورق عالزجاج والفوانيس و الشبكة و الالمرايت و الكاوتش و كل ما يلزم
و المهم ان بس تتفصل بطارية العربية اول ما تخش الفرن علشان دة خطر جدا حيث ان التنر اللي في الرش قابل للاشتعال و لو حصل اي شرارة لأي سبب ان كان ممكن بخار التنر اللي في كابينة الفرن يشتعل (ينفجر) بس طبعا الصنايعية في مصر مايعرفوش الموضوع دة و مابيعملوهوش

[Adham]

و العربية تترش 3 وشوش بوية علشان "تتكفى"

الوش او الوشين الاولانيين بيبقوا "عفرة" يعني بيتفتح الهواء بتاع المسدس قوي و يبقة رزاز البوية خفيف قوي
و بعدين تاخد وش او وشين (رص) يعني بيتقفل الهواء و تتفتح البوية قوي و تبقى البوية خارجة كثيفة من المسدس و مركزة في خطوط مش عفرة (رزاز)

و لو لون ميتاليك
يبقى بعد رش اللون تتساب دقايق لغاية مالبوية تشمع عالعربية (ممكن تاخد لقطة سخن من الفرن) , و بعدين يترش الورنيش (بيبقى خلطة من نسبة ورنيش 2 : نسبة مُصلب 1 : نسبة تنر 1/2 ولو زاد التنر بيقلل لمعه الورنيش) برضة " يتعفر" وش عالعربية و بعدين يترش وش تاني "رص" كثيف "يكفي" العربية ورنيش
و بعدين يخرج الصنايعي من كابينة الفرن و يتطفي نورها و يتشغل "الولاعه" و يتسخن الفرن لدرجة الحرارة المطلوبة لمدة 20:30 دقيقة و في الاخر تاخد العربية هواء بارد علشان البوية "تعضم" قبل ماتخرج العربية من الفرن

[aid904]

معلومات أكتر من رائعه متشكر جدا جدا أيوة كدة الواحد يبقى فاهم بدل ما كنت حاسس أن الصنايعيه بيتكلموا بالالغاز لكم مني كل التقدير

[chihab18]

منك نستفيد يا اخ ادهم والبك هو البوتامين الاسود العازل
الفرن اجرته 40 اذا كان العربيه ترش من برة وثمانين ان كانت من جوة وبرة
فك النواكل من اجل ان الراجل يرش تحتها فلايترك لون مختلف تحتها ولاعلاقه لها بحرارة الفرن
فائده الفرن تسيح البويه والبعد عن التراب ومفروض ان الفرن الصح يكون المسدس اتوماتيك والتحكم فيه من علي بعد
اما في مصر اونطه واهو كله فرن ومحش عارف حاجه والسخونه لاعلاقه لها باللمعه اللمعه من التشطيب النهائي بعد كذا وش بويه ؛ فالتلميع هو مايظر السيارة مهما تعلي حرارة الفرن اللي هو مش حيزيد في مصر عن 50 درجه لان المعلم اللي ماسك المسدس قاعد جوه
وعموما شكرا علي المعلومات ياادهم باشا

[MotorX]

و العربية تترش 3 وشوش بوية علشان "تتكفى"

الوش او الوشين الاولانيين بيبقوا "عفرة" يعني بيتفتح الهواء بتاع المسدس قوي و يبقة رزاز البوية خفيف قوي
و بعدين تاخد وش او وشين (رص) يعني بيتقفل الهواء و تتفتح البوية قوي و تبقى البوية خارجة كثيفة من المسدس و مركزة في خطوط مش عفرة (رزاز)

و لو لون ميتاليك
يبقى بعد رش اللون تتساب دقايق لغاية مالبوية تشمع عالعربية (ممكن تاخد لقطة سخن من الفرن) , و بعدين يترش الورنيش (بيبقى خلطة من نسبة ورنيش 2 : نسبة مُصلب 1 : نسبة تنر 1/2 ولو زاد التنر بيقلل لمعه الورنيش) برضة " يتعفر" وش عالعربية و بعدين يترش وش تاني "رص" كثيف "يكفي" العربية ورنيش
و بعدين يخرج الصنايعي من كابينة الفرن و يتطفي نورها و يتشغل "الولاعه" و يتسخن الفرن لدرجة الحرارة المطلوبة لمدة 20:30 دقيقة و في الاخر تاخد العربية هواء بارد علشان البوية "تعضم" قبل ماتخرج العربية من الفرن

أستاذ أدهم ، واضح ان عندك خبرة كبيرة في مسألة الدهانات ، ياريت لو تعرف حد كويس بتاع دوكو يكون شغله نظيف وأجرته معقولة.

تحياتي

[Adham]

منك نستفيد يا اخ ادهم والبك هو البوتامين الاسود العازل
الفرن اجرته 40 اذا كان العربيه ترش من برة وثمانين ان كانت من جوة وبرة
فك النواكل من اجل ان الراجل يرش تحتها فلايترك لون مختلف تحتها ولاعلاقه لها بحرارة الفرن
فائده الفرن تسيح البويه والبعد عن التراب ومفروض ان الفرن الصح يكون المسدس اتوماتيك والتحكم فيه من علي بعد
اما في مصر اونطه واهو كله فرن ومحش عارف حاجه والسخونه لاعلاقه لها باللمعه اللمعه من التشطيب النهائي بعد كذا وش بويه ؛ فالتلميع هو مايظر السيارة مهما تعلي حرارة الفرن اللي هو مش حيزيد في مصر عن 50 درجه لان المعلم اللي ماسك المسدس قاعد جوه
وعموما شكرا علي المعلومات ياادهم باشا

ااااة انت قصدك البلاك
ايوة بس دة مالوش دعوة بالدهان, دةو بيترش برة الفرن او بالفرشاة و يتحبب بس تحت الرفارف و العتب و الشنطة لكن مش بيتحط تحت البوية الفرن خالص ماينفعش (يعني مش طبقة عالرفارف من برة او الكبوت من برة مثلا)

بص ياباشا
الموضوع مش رش برة و جوة
اي فرن (نضيف) يعني فرن بحقيقي مش حايبقى اقل من 80 جنية للعربية الصغيرة

لكن فرن فلاترة مابتتغيرش و بترمي تراب وحالتة كرب وولاعتة بايظة مثلا مش مقياس لأنة بالضبط زية زي قلتة و زي رش العربية في حارة الورشة

موضوع النواكل ان يترش تحتها يبقى تمام بس مش النواكل بس و لكن اي حاجة تانية تعوق الرش
زي مثلا الباكتات الكاوتش او الكاوتش حوالين الزجاج و غيرة و غيرة

بس دة يبقى وجع دماغ و كلة بيستسهل و بيرش و هيه راكبة بعد مايورق عليها لأن البوية اللي تحتها مش مرئية و مش حاتتشاف

مافيش حاجة اسمها مسدس اوتوماتيك و الرش من بعد دة في افلام الخيال العلمي بس ههههههههههههههه

في التوكيل العربيات بتترش برضة بمسدس ماسكة صنايعي ههههههههههه

اللمعه بتاعه البوية بتتأثر بالحرارة (تتناسب طرديا)
و اسأل صنايعي محترف بتاع دوكو فرن
او صاحب فرن

و تاني البوية الفرن مابتتلمعش بعد الرش زي البوية الدوكو السادة, البوية الدكو السادة بس اللي لازم تتلمع بعد الرش علشان تلمع

و الحرارة بتاعه الفرن بتترفع ل 55 درجة لما الصنايعي يخلص رش العربية و يطلع برة
لكن مش و هوة جوة الفرن

راجع تاني الخطوات اللي كتبتها

تحياتي

[Adham]

أستاذ أدهم ، واضح ان عندك خبرة كبيرة في مسألة الدهانات ، ياريت لو تعرف حد كويس بتاع دوكو يكون شغله نظيف وأجرته معقولة.

تحياتي

من عينيا, انا فية واحد بتاع دوكو كويس باتعامل معاه دايما

هوة في اربعه و نص على طريق السويس

وهو معروف قوى هناك
اتنين اخوات سيد و علي و عندهم ورشة كبيرة و فيها فرن نضيف

شغلهم نضيف و مصنعيتهم حنينة و بيراعوا ضميرهم في الشغل
انا باتعامل معاهم من سنة 92
ورشوللي ييجي 17 عربية مثلا ( لي و لمعارف كتير)